অসম লাইভ ২৪ঃ তাই শুই আছে, কাকো মতা নাই, কাৰো মাতো শুনা নাই ৷ প্ৰেমিক বিতোপনৰ কথাতো গুৰুত্ব দিয়া নাই তাই ৷ আজি তাই অভিমানো কৰা নাই বিতোপনক ৷ কিন্তু কি হৈছে তাইৰ ?
নগাঁৱৰ ৰহাত সংঘটিত হৈছে এক হৃদয়বিদাৰক ঘটনা ৷ ঘটনাটোৱে চকু সেমেকি তুলিব আপোনাৰো ৷ ৰহাৰ চাপৰমুখৰ দুগৰাকী প্ৰেমিক-প্ৰেমিকা বিতোপন আৰু প্ৰাৰ্থনা ৷ বিয়ালৈ মাথোঁ কেইটামান দিনহে বাকী আছিল ৷ বহুদিনীয়া সম্পৰ্ক আছিল দুয়োৰে ৷ দীৰ্ঘদিনীয়া প্ৰেমৰ সম্পৰ্ক এৰি এখন সুখৰ সংসাৰ গঢ়াৰ সপোন দেখিছিল প্ৰেমিকদ্বয়ে ৷ বিপদৰ সময়ত ইজনে সিজনৰ কাষত একেলগে আছিল ৷ একেলগে জীৱনৰ পথত খোজ দিয়াৰ পৰিকল্পনা লৈছিল প্ৰাৰ্থনা-বিতোপনে ৷ কিন্তু নিয়তি নিষ্ঠুৰ ৷ শুকুৰবাৰে জটিল ৰোগত আক্ৰান্ত প্ৰেয়সীগৰাকী প্ৰেমিক বিতোপনক এৰি অজান দেশলৈ গ’লগৈ ৷
কিন্তু প্ৰেয়সীৰ মৃ্ত্যুৰ পিছতো প্ৰেমিকে পূৰণ কৰিলে প্ৰেমিকাৰ আশা ৷ সুখৰ সংসাৰখন সম্পূৰ্ণ কৰিব নোৱাৰিলেও প্ৰেমিকাৰ আশা পূৰণ কৰিলে বিতোপনে ৷ কেৱল চিনেমাতে গভীৰ প্ৰেমৰ আভাস পোৱা নাযায় ৷ বাস্তৱত প্ৰেমৰ গভীৰতা প্ৰকাশ কৰি দেখুৱালে বিতোপনে ৷ মৃত প্ৰাৰ্থনাৰ কপালত পিন্ধাই দিলে সেন্দুৰ ৷ ডিঙিত পিন্ধাই দিলে মালা আৰু প্ৰাৰ্থনাৰ সন্মুখতে নিজেও পিন্ধি ল’লে মালা ৷ ঘূৰি নহা বাটেৰে যোৱা প্ৰেয়সীৰ প্ৰতি থকা মৰম, আদৰে কন্দুৱাই দিলে তাত উপস্থিত লোকসকলক ৷ প্ৰাৰ্থনাৰ বিয়াৰ সপোন পূৰণ কৰি আৱেগিক হৈ পৰিল প্ৰেমিক বিতোপন ৷ আৰু প্ৰেয়সী প্ৰাৰ্থনাক দিলে শেষ বিদায় ৷ মৃত্যুৱেও যেন কাঢ়ি নিব নোৱাৰিলে অপাৰগ প্ৰেমক ৷ প্ৰাৰ্থনাৰ শেষ প্ৰাৰ্থনা অতি বিতোপনেৰে পূৰণ কৰিলে প্ৰেমিক বিতোপন তামুলীয়ে ৷
সৌ সিদিনা দিল্লীত আকৌ ওলোটা দৃশ্যহে দেখিবলৈ পোৱা গৈছিল ৷ দীৰ্ঘদিনে একেলগে থকা প্ৰেমিকাক ৩৫ টুকুৰা কৰিছিল প্ৰেমিকৰূপী আফতাবে ৷ তেওঁ প্ৰেমিকে আছিলনে? প্ৰেমিকা শ্ৰদ্ধাক হত্যা কৰাৰ আগতে এবাৰো হাত কঁপি নুঠিল নেকি তেওঁৰ?
নগাঁৱৰ ঘটনাটোৱে প্ৰেমৰ প্ৰীতি নিদৰ্শন দেখুৱাই থৈ গ’ল নৱপ্ৰজন্মক ৷ বিবাহ সম্পূৰ্ণ নহ’লেও চিৰদিনৰ বাবে এক হ’ল বিতোপন-প্ৰাৰ্থনা৷ এয়াহে প্ৰেম ৷ এই প্ৰেমৰ কেতিয়াও নহয় মৃত্যু ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
