অসম লাইভ২৪ঃ বিশিষ্ট শিক্ষাবিদ, সাহিত্যিক, গৱেষক ড° শিৱনাথ বৰ্মনে বৃহস্পতিবাৰে বিয়লি ৫:৪০ বজাত শেষনিশ্বাস ত্যাগ কৰে৷ নেমকেয়াৰ হাস্পতালত চিকিৎসাধীন অৱস্থাত মৃত্যুক সাবটে শিক্ষাবিদগৰাকীয়ে৷
শুকুৰবাৰে নৱগ্ৰহ শ্মশানত বিশিষ্ট সাহিত্যিকগৰাকীৰ শেষকৃত সম্পন্ন হৈছে৷ শিৱনাথ বৰ্মনৰ মৃত্যুৰ পাছতেই শিৱনাথ বৰ্মনৰ জীৱনকালৰ বহু কথাই চৰ্চালৈ আহিছে৷ এগৰাকী সামাজিক মাধ্যম ইউজাৰকাৰীয়ে শিৱনাথ বৰ্মনৰ বিজ্ঞানমনস্কতাক লৈ লিখিছে বিশেষ কেইটিমান কথা৷
ইউজাৰকাৰীগৰাকীয়ে লিখিছে,‘কালি ৰাতি ডঃ শিৱনাথ বৰ্মন ছাৰৰ ঘৰত এজনে মৃতকৰ নীতি-নিয়মৰ কথা উলিয়াই আছিল৷ বাইদেৱে স্পষ্টকৈ কৈ দিলে, ‘তেখেতে তেনে নীতি-নিয়মৰ মাজত নাছিল৷ গতিকে সেইবোৰৰ প্ৰয়োজন নহ’ব৷ মাত্ৰ এনে এটা অনুষ্ঠান কৰিব লাগে, য’ত সকলো মানুহে অংশগ্ৰহণ কৰিব পাৰে৷’
ইপিনে শিৱনাথ বৰ্মনে জীৱনকালত প্ৰাপ্য সন্মান পাইছিলনে এই বিষয়টোও চৰ্চালৈ আহিছে৷ ইউজাৰকাৰীগৰাকীয়ে এই সন্দৰ্ভত লিখিছে, ‘এয়াই বিজ্ঞানমনস্ক পৰিয়াল! বহুতে আক্ষেপ কৰি আছে যে বৰ্মন ছাৰে প্ৰাপ্য মৰ্যাদা নাপালে৷ ‘প্ৰাপ্য মৰ্যাদা’ মানে আপোচৰ ৰাস্তা! যিসকল বুদ্ধিজীৱীয়ে জীৱিত কালতে সকলো ধৰণৰ মৰ্যাদা পাই গৈছে, আপুনি নিশ্চিত থাকক যে আপোনাৰ অজ্ঞাতে তেখেতে সকলো পক্ষৰ লগতেই আপোচ কৰি গৈছে৷ কিন্তু মৃত্যুৰ পিছতো বৰ্মন ছাৰৰ পৰিয়ালে ছাৰৰ জীৱন-দৰ্শনক ‘প্ৰাপ্য মৰ্যাদা’ ই দিছে৷ বেছিভাগ বুদ্ধিজীৱীয়ে লৈ ফুৰা তথাকথিত সেই মৰ্যাদা ছাৰে বিচৰাও নাছিল৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
