অসম লাইভ২৪ঃ ১৪ জুন, ২০২০। কৰ’না, লকডাউনৰ দৰে শব্দৰ সৈতে বিশ্ববাসী পৰিচিত হৈছিলহে মাত্ৰ। সেই সময়তে বলীউডৰ পৰা আহিছিল এটা অত্যন্ত বেয়া খবৰ। বান্দ্ৰাৰ ফ্লেটৰ পৰা উদ্ধাৰ হৈছিল অভিনেতা সুশান্ত সিং ৰাজপুতৰ ওলমি থকা দেহ। তৰুণ অভিনেতাজনে হঠাতেই কিয় ল’লে এনে সিদ্ধান্ত? সুশান্তৰ মৃত্যুৱে বলীউডৰ বহু নামী দামী অভিনেতা প্ৰযোজকৰ জীৱনলৈকো আনিছিল কলীয়া ডাৱৰ। সুশান্তই আত্মহত্যা কৰা নাই বলীউডেই হত্যা কৰিছে সুশান্তক। প্ৰায় আঢ়ৈ বছৰৰ অন্তত আকৌ এবাৰ চৰ্চালৈ আহিছে সুশান্তৰ মৃত্যু ৰহস্য।
মুম্বাইৰ কুপাৰ হাস্পতালৰ মৰ্গকৰ্মীয়ে কৰিছে চাঞ্চল্যকৰ দাবী। কুপাৰ হাস্পতালৰ কৰ্মীৰ দাবী সুশান্তৰ এয়া আত্মহত্যা নহয়, হত্যাই কৰা হৈছে সুশান্তক। মৰ্গত থওঁতেই তেওঁৰ মৃতদেহত একাধিক আঘাতৰ চিন দেখা পাইছিল বুলিও দাবী কৰিছে মৰ্গত কাম কৰা কৰ্মীজনে। মৰ্গকৰ্মী ৰূপকুমাৰ শ্বাহে এই সন্দৰ্ভত কয়, ‘সুশান্ত সিং ৰাজপুতৰ মৃত্যুৰ সময়ত মই কুপাৰ হাস্পতালৰ মৰ্গৰ কৰ্মী আছিলো। যেতিয়া সুশান্তৰ মৃতদেহ হাস্পতাললৈ হৈ অহা হৈছিল তেতিয়া কুপাৰৰ মৰ্গত আছিল সুশান্তসহ মুঠ ৫টা শৱদেহ। সুশান্ত শৰীৰৰ মৰোণোত্তৰ পৰীক্ষা কৰোতে মই তেওঁৰ দেহত আৰু ডিঙিত মুঠ তিনিটা আঘাতৰ চিন দেখিছিলো। মৰোণোত্তৰৰ সময়ত ভিডিঅ’ কৰি ৰখাটো প্ৰয়োজন। সুশান্তৰ শৰীৰটো দেখিয়েই আমাৰ ছিনিয়ৰে কৈছিল এয়া আত্মহত্যা হ’ব নোৱাৰে। হত্যাই হ’ব। কিন্তু উৰ্দ্ধতন কৰ্তৃপক্ষই কেৱল এখন ফটোহে তুলিবলৈ নিৰ্দেশ দিলে। আমি সাধাৰণ কৰ্মচাৰী সেয়ে ওপৰৰ পৰা যি আদেশ দিয়ে সেয়াই মানিব লাগে।’
মৰ্গকৰ্মীৰ এই দাবীৰ পাছতেই সুশান্তৰ অধিবক্তাই প্ৰতিক্ৰিয়াত কয়, ‘সুশান্তৰ মৃত্যু আত্মহত্যা নহয়। ইয়াৰ আঁৰত ষড়যন্ত্ৰ আছে। একমাত্ৰ কেন্দ্ৰীয় তদন্তকাৰী সংস্থাই এই সত্য উদঘাটন কৰিব পাৰিব।’ সুশান্তৰ এয়া আত্মহত্যা নহয় বুলি পৰিয়ালৰ লোকেও দাবী কৰিছিল। ২০২০ চনৰ আগষ্টত সুশান্ত জ্যেষ্ঠ ভগ্নী শ্বেতা সিংহ কীৰ্তিয়ে শ্বেয়াৰ কৰিছিল এটা বিশেষ ভিডিঅ’। সেই ভিডিঅ’টোত আছিল কুপাৰ হাস্পতালৰ এজন মৰ্গকৰ্মীৰো সাক্ষাৎকাৰ। সেই সাক্ষাৎকাৰত হাস্পতালকৰ্মীজনে দাবী কৰিছিল যে সুশান্তৰ মৃতদেহত একাধিক আঘাতৰ চিন আছে। এখন ভৰিও ভঙা আছিল সুশান্তৰ৷
উল্লেখ্য যে কিছুদিন পূৰ্বে সুশান্তৰ মেনেজাৰ দিশাৰ মৃত্যুৰ তদন্ত নতুনকৈ আৰম্ভ কৰিছে মহাৰাষ্ট্ৰ চৰকাৰে৷ সুশান্তৰ মেনেজাৰ দিশাইয়ো সুশান্তৰ আত্মহত্যাৰ কিছুদিন পূৰ্বেই সাবটি লৈছিল মৃত্যুক৷ মাত্ৰ ৬ দিনৰ ব্যৱধানত দুয়োৰে আত্মহত্যাই আছিলনে এয়া হত্যা আছিল সেই বিষয়টোক লৈ অব্যাহত আছে তদন্ত প্ৰক্ৰিয়া৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
