অসম লাইভ২৪ঃ মাতৃহাৰা হ’ল প্ৰধানমন্ত্ৰী মোদী৷ মাতৃৰ মৃত্যুৰ খবৰ পোৱা মাত্ৰকেই সকলো কাম এৰি দিল্লীৰ পৰা গুজৰাটৰ গান্ধী নগৰলৈ ৰাওনা হয় প্ৰধানমন্ত্ৰী মোদী৷ তাতেই মাতৃৰ শেষকৃত সম্পন্ন কৰি পুনৰ দেশৰ সেৱাত ব্ৰতী হোৱা দেখা গৈছে প্ৰধানমন্ত্ৰীগৰাকীক৷ প্ৰধানমন্ত্ৰীগৰাকীৰ মাতৃ হীৰাবেন মোদীৰ মৃত্যুত শোক প্ৰকাশ কৰিছে দেশৰ বিভিন্নজনে৷ হীৰাবেনৰ মৃত্যু শোকপ্ৰকাশ কৰিছে ৰাহুল গান্ধীয়েও৷ কংগ্ৰেছনেতা তথা সাংসদ ৰাহুল গান্ধীয়ে প্ৰধানমন্ত্ৰীৰ শোকস্তব্ধ পৰিয়াললৈ সমবেদনা জনাই কৰিছে বিশেষ প’ষ্ট৷
টুইটত ৰাহুলে লিখিছে, ‘প্ৰধানমন্ত্ৰী নৰেন্দ্ৰ মোদীৰ মাতৃ হীৰাবেন মোদীৰ মৃত্যুৰ খবৰ অত্যন্ত দুঃখজনক৷ এই কঠিন সময়ত মই তেওঁৰ পৰিয়ালক গভীৰ সমবেদনা জনোৱাৰ লগতে এমুঠি ভালপোৱা প্ৰেৰণ কৰিছো৷’ ৰাহুলৰ ওপৰিও কংগ্ৰেছ নেত্ৰী প্ৰিয়ংকা গান্ধী বাদ্ৰা, মল্লিকাৰ্জূন খৰ্গেকে ধৰি বহুকেইজন কংগ্ৰেছী নেতাইয়ো জনাইছে সমবেদনা৷
উল্লেখ্য যে ১৯২৩ চনৰ ১৮ জুনত জন্মগ্ৰহণ কৰিছিল হীৰাবেন দেবীয়ে৷ পাঁচজন পুত্ৰ আৰু এগৰাকী কন্যাৰে মুঠ ৬ টা সন্তানৰ মাতৃ হীৰাবেন দেৱী৷ কিছুদিন ধৰি স্বাস্থ্যৰ শাৰিৰীক অৱনতি ঘটিছিল হীৰাবেন দেৱীৰ৷ প্ৰধানমন্ত্ৰী মোদীয়েও বুধবাৰে আবেলি দিল্লীৰ পৰা গৈ আহমেদাবাদত উপস্থিত হৈছিল৷ মাতৃক দেখা কৰিবলৈ হাস্পতাললৈকো গৈছিল মোদী৷ তিনি ঘণ্টাতকৈও অধিক সময় হাস্পতালত মাতৃৰ কাষত আছিল মোদী৷ মাতৃৰ স্বাস্থ্য সম্পৰ্কত চিকিৎসকৰ সৈতে বাৰ্তালাপতো মিলিত হৈছিল মোদী৷
কিন্তু চিকিৎসকে অহোপুৰুষাৰ্থ কৰিও জীয়াই ৰাখিব নোৱাৰিলে প্ৰধানমন্ত্ৰীৰ মাতৃক৷ শতক গৰকা হীৰাবেন দেৱীয়ে বিদায় ল’লে ইহসংসাৰৰ পৰা৷ হাস্পতালৰ পৰা হীৰাবেন দেৱীৰ নশ্বৰ দেহ পোনতে লৈ অহা হয় মোদীৰ কনিষ্ঠ ভাতৃৰ বাসগৃহলৈ৷ তাতেই মাতৃৰ নশ্বৰ দেহত শেষ শ্ৰদ্ধা জনাই মোদীয়ে৷ তাৰ পৰাই মাতৃৰ নশ্বৰ দেহ কান্ধত তুলি গান্ধীনগৰৰ শ্মশানলৈ যায় প্ৰধানমন্ত্ৰী মোদী৷ তাতেই মাতৃক মুখাগ্নি কৰি শেষ বিদায় জনাই প্ৰধানমন্ত্ৰীগৰাকীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
