অসম লাইভ২৪ঃ পাঠানৰ চৰ্চা ঠিকেই চলিছে আমাৰ ৰাজ্যতো। শ্বাহৰুখে নকলেও নিজাকৈয়ে বহু শ্বাহৰুখ অনুৰাগীয়ে চলাইছে পাঠানৰ প্ৰচাৰ। কিন্তু জানেনে পাঠানতেই এটা উল্লেখনীয় চৰিত্ৰত অভিনয় কৰিছে এগৰাকী অসম সন্তানেও?
বুধবাৰে মুক্তিলাভ কৰিছে শ্বাহৰুখ খানৰ বহু বিতৰ্কিত ছবি ‘পাঠান’য়ে। তীব্ৰ বিৰোধিতা, বিতৰ্ক, বয়কট ট্ৰেণ্ডৰ মাজতে ছবিগৃহলৈ আহিল বলীউড বাদশ্বাহ শ্বাহৰুখৰ ‘পাঠান’। প্ৰচাৰ নাছিল। প্ৰচাৰৰ নামত কোনোধৰণৰ শ্ব’তো যোৱা নাছিল শ্বাহৰুখ। আনকি জনপ্ৰিয় কমেডী শ্ব’ কপিল শৰ্মাৰ শ্ব’তো ছবিৰ প্ৰমোছন কৰা নাছিল শ্বাহৰুখে। বিতৰ্ক, বয়কট আদিৰ জৰিয়তেহে মুক্তিৰ পূৰ্বে ছুপাৰহিট হৈ পৰিছিল শ্বাহৰুখৰ ‘পাঠান’ য়ে। বুধবাৰে দেশৰ প্ৰত্যেকটো ছবিগৃহতে পাঠান চাবলৈ দৰ্শকৰ ভিৰ।
‘পাঠান’ৰ প্ৰতিটো দৰ্শনীয়ে হাউছফুল। ‘পাঠান’ ছবিখনত অভিনয় কৰিছে শ্বাহৰুখ খানৰ লগতে দীপিকা পাডুকণ, জন আব্ৰাহাম, ছলমান খান, ডিম্পল কাপাডিয়া, আশুতোষ ৰাণা, সিদ্ধান্ত ঘেগাদমাল, গৌতম ৰোডে আদি তাৰকাই। তাৰমাজতেই বহুতেই নাজানিলেও এই ছবিখনতেই আছে অসম সন্তান দীগন্ত হাজৰিকাও। ‘পাঠান’ ছবিখনত অভিনয় কৰিছে অসমৰ দিগন্ত হাজৰিকায়ো। ছবিখনত শ্বাহৰুখ খানৰ সহযোগী হিচাপে অভিনয় কৰিছে দিগন্তই।
উল্লেখ্য যে, ২০১৬ চনত মুক্তিলাভ কৰা আশুতোষ গোৱাৰিকাৰৰ ‘মহেঞ্জদাৰো’ ছবিখনৰ জৰিয়তে বলীউদত খোজ পেলাইছিল দিগন্ত হাজৰিকাই। ঋত্বিক ৰোশনৰ লগত অভিনয় কৰাৰ পিছত এইবাৰ বলীউডৰ কিং খানৰ সৈতে দেখা গৈছে দিগন্তক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
