অসম লাইভ২৪ঃ আৰিফ আৰু সাৰছ পক্ষীটোৰ কাহিনী হয়তো নজনা মানুহ খুব কমেই ওলাব৷ মহম্মদ আৰিফৰ লগত বন্ধু হৈ পৰিছিল এটা সাৰচ পক্ষী। আৰিফ য’তেই যায় তালৈকে যায় পক্ষীটোৱে। এই ঘটনা আছিল উত্তৰ প্ৰদেশৰ। আমেথিৰ যুৱকজনে চৰাইটোক সংকটজনক অৱস্থাত উদ্ধাৰ কৰি সুস্থ কৰি তুলিছিল। তাৰপাছতেই দুয়োৰে মাজত গঢ়ি উঠিছিল বন্ধুত্ব৷
লাহে লাহে আৰিফ আৰু সাৰছৰ বন্ধুত্ব গাঢ় হ’ল৷ আৰিফেও পক্ষীটোৰ সৈতে বিভিন্ন সময়ত ভিডিঅ’ শ্বেয়াৰ কৰিছিল সামাজিক মাধ্যমত। বন বিভাগে এই বিষয়ে জানিব পাৰিছিল তেতিয়াই চৰকাৰী পক্ষই সাৰচটোক আৰিফৰ পৰা পৃথক কৰি চিৰিয়াখানাত ৰাখিছিল আৰু আৰিফলৈকো বন্যপ্ৰাণী ৰখাৰ অপৰাধত জাননীও প্ৰেৰণ কৰিছিল। ইপিনে আৰিফৰ পৰা বিচ্ছিন্ন কৰি অনাৰ বাবে চিৰিয়াখানাত খোৱা বোৱা এৰি দিছিল পক্ষীটোৱে। বহুতে পক্ষীটোক মুকলি কৰি দিয়াৰ বাবে আহ্বান জনাইছিল চৰকাৰক। কিন্তু চৰকাৰে সিদ্ধান্ত কোনো কাৰণতে সলাই নল’লে৷
শেহতীয়াকৈ সাৰছ আৰু আৰিফৰ আন এক হৃদয়স্পৰ্শী ভিডিঅ’ পোহৰলৈ আহিছে। আৰিফে কানপুৰৰ চিৰিয়াখানলৈ গৈ পিঞ্জৰাৰ ভিতৰত আৱদ্ধ হৈ থকা সাৰছ পক্ষীটোক লগ কৰে৷ ভিডিঅ’টোত দেখা পোৱা গৈছে যে আৰিফক দেখি সৰাছটোৱে আনন্দত উৰি আহিব চেষ্টা কৰিছে। বাৰে বাৰে আৰিফৰ ওচৰলৈ আহিব বিচাৰিও বিফল হৈছে পক্ষীটো। এই ভিডিঅ’টোৱে পুনৰ আৰিফ আৰু পক্ষীটোৰ মাজত থকা আন্তৰিকতাৰ কথাই তুলি ধৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
