অসম লাইভ২৪ঃ জোনমনি ৰাভাৰ মৃত্যুক লৈ উন্মোচিত হৈছে ন ন তথ্য। মাতৃয়ে এজনৰ পাছত আনজন অফিচাৰৰ নাম লৈছে জোনমনিৰ মৃত্যুক লৈ। জোনক হেঁচা দি দিয়েই হত্যা কৰিলে বুলিও জনাইছে মাতৃয়ে। ইপিনে মাহীয়েকে জোনৰ মৃত্যুক লৈ কয় যে, জোনমণিৰ শৰীৰত ৰ’ডেৰে মৰা দাগো আছিল। পৰিকল্পিতভাৱেই জোনমণিক হত্যা কৰাৰো অভিযোগ উত্থাপন কৰিছে জোনমণিৰ মাতৃয়ে।
এই সমগ্ৰ বিষয়ক লৈ আৰক্ষী সঞ্চালকপ্ৰধান জি পি সিঙে জোনমণি ৰাভাৰ দুৰ্ঘটনাৰ বিষয়টোৰ তদন্তৰ বাবে চি আই ডিক দায়িত্ব অৰ্পণ কৰিছে। আৰক্ষী সঞ্চালকপ্ৰধান জি পি সিঙে টুইটযোগে এই কথা উল্লেখ কৰিছে। জি পি সিঙে লগতে উল্লেখ কৰে যে ১৫ মে’ত উত্তৰ লখিমপুৰ আৰক্ষী থানাত এখন এজাহাৰ (FIR Nu 0183/2023) মৰ্মে ভাৰতীয় দণ্ডবিধিৰ u/s 120-B, 395,397,342,387 ধাৰাত গোচৰ পঞ্জীয়ন কৰা হৈছিল, য’ত অভিযুক্ত ৰূপে জোনমণি ৰাভাৰ নামো আছিল। ইয়াৰ অধীনত লখিমপুৰ আৰু নগাঁও আৰক্ষীয়ে আইনগত ব্যৱস্থা গ্ৰহণ কৰে। কিন্তু ইয়াৰ মাজতে ১৬ মে’ৰ পুৱাৰ ভাগত এছ আই জোনমণি ৰাভাৰ পথ দুৰ্ঘটনাত মৃত্যু হোৱাৰ তথ্য পোৱা গৈছে। FIR নং ০১৮৩/২০২৩ আৰু উপ–পৰিদৰ্শক জোনমণি ৰাভাৰ মৃত্যুৰ তদন্ত চি আই ডিয়ে অসমলৈ হস্তান্তৰ কৰাৰ সিদ্ধান্ত লৈছে।
উল্লেখ্য যে সামাজিক মাধ্যমত জোনমণি ৰাভাৰ মৃত্যুত তেওঁৰ বিৰুদ্ধে ৰুজু হোৱা গোচৰৰ প্ৰভাৱ থকাৰ সন্দেহ কৰা হৈছিল। সেয়ে আৰক্ষী সঞ্চালকপ্ৰধানৰ এই সিদ্ধান্তই ঘটনাৰ অন্তৰালত থকা সত্য উন্মোচিত কৰিব বুলি আশা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
