অসম লাইভ২৪ঃ এক কিঃগ্ৰাঃ আমৰ দাম ২.৫লাখ টকা। সামাজিক মাধ্যমত ভাইৰেল হৈ পৰিছে আমৰ এখন বিশেষ ফটো। ফটোত থকা আমটোৰ দামেই ২.৫লাখ। সামাজিক মাধ্যমত ফটোখন ভাইৰেল হোৱাৰ পাছতেই বাগানৰ পৰাই চুৰি হৈছে আমটো। ওড়িশাৰ নুয়াপাড়া জিলাত সংঘটিত হৈছে এই ঘটনা। ঘটনাত হতভম্ব হৈ পৰিছে আম বাগানখনৰ স্বত্ত্বাধিকাৰীও। আৰক্ষীৰ ওচৰত আম চুৰিৰ অভিযোগ দাখিল কৰিছে কৃষকজনে। আমৰ বাগান থকা কৃষকজনৰ নাম লক্ষ্মীনাৰায়ণ।
আমৰ খেতি তেওঁৰ ব্যৱসায়ো নহয় চখো। সম্প্ৰতি নিজৰ বাগানত ৩৮ বিধ বিৰল প্ৰজাতিৰ আমৰ খেতি কৰিছে লক্ষ্মীনাৰায়ণে। লক্ষ্মীনাৰায়ণে পোনতে তেওঁৰ বাগানত থকা আমৰ দাম ইমান বুলি ভৱা নাছিল। কিন্তু তেওঁৰ বাগানত থকা এবিধ আমৰ দাম যে প্ৰতি কিঃগ্ৰাঃৰ দাম ২ লাখতকৈয়ো অধিক বুলি গম পায় তেওঁ আনন্দত একো নাই হৈ পৰে। লগে লগেই সামাজিক মাধ্যমত তেওঁৰ বাগানত লাগি থকা আমৰ ফটো শ্বেয়াৰ কৰে। আমবিধৰ দামৰ কথাও তেওঁ পোষ্টটোত উল্লেখ কৰে। কিন্তু এই পোষ্টটোৰ বাবেই লক্ষ্মীনাৰায়ণ লোকচানৰ সন্মুখীন হ’ল।
তেওঁ সামাজিক মাধ্যমত আমৰ ফটো শ্বেয়াৰ কৰাৰ পাছতেই তেওঁৰ বাগানৰ পৰা এটা এটাকৈ বিশেষ আমবিধ হেৰাবলৈ ধৰে। বৰ্তমানলৈ ২.৫লাখ টকীয়া আমবিধৰ ৪টা হেৰাই যোৱা বুলি জানিবলৈ দিছে লক্ষ্মীনাৰায়ণে। ঘটনাক লৈ লক্ষ্মীনাৰায়ণে আৰক্ষীৰ কাষ চাপিছে। এজাহাৰত তেওঁ নিৰাপত্তাহীনতাৰ কথাও উল্লেখ কৰিছে। লক্ষ্মীনাৰায়ণৰ প্ৰশ্ন যে, এনেকৈ যদি খেতিৰ ফচল হেৰাই তেন্তে কৃষকে কেনেকৈ খেতি কৰিব? তেওঁক অৰ্থনৈতিক ক্ষতিপূৰণ কোনে দিব?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
