অসম লাইভ২৪ঃ বিবাহৰ আয়োজন ভৰপক। অতিথিৰে ঘৰ ভৰিছে। সকলো নীতি নিয়ম মানি বিবাহ সম্পন্নও হৈছে। কিন্তু বিয়াৰ নিশাই হঠাত পেটৰ বিষত বাগৰি পৰে কইনা। লগে লগেই কইনাক হাস্পতাললৈ লৈ যোৱা হয়। হাস্পতালত ভৰ্তি কৰাৰ পাছতেই কইনা এগৰাকী কন্যা সন্তানৰ মাতৃ হয়। ঘটনাত অবাক হৈ পৰিছে দৰাৰ লগতে দৰাৰ পৰিয়ালবৰ্গও।
খবৰ অনুসৰি বিবাহৰ সময়ত ৭মাহৰ অন্তঃসত্ত্বা আছিল কইনা। বিগত ২৬ জুনত নয়ডাৰ এজন যুৱকৰ সৈতে বিবাহপাশত আৱদ্ধ হৈছিল ছেকেন্দ্ৰাবাদৰ তৰুণীগৰাকী। ঘৰৰ পৰা পৰিয়ালৰ পছন্দমতেই তৰুণীগৰাকীৰ সৈতে বিবাহপাশত আৱদ্ধ হৈছিল যুৱকজন। কিন্তু বিবাহৰ প্ৰথম নিশাই অথন্তৰ লাগে। কইনাৰ শাৰীৰিক অৱস্থাৰ অৱনতি ঘটাত কইনাক হাস্পতালত ভৰ্তি কৰোৱা হয়। চিকিৎসকে জনাই যে ন’ বোৱাৰী অন্তঃসত্ত্বা। ৭মাহৰ অন্তঃসত্ত্বা বোৱাৰীগৰাকী। কইনা অন্তঃসত্ত্বা হোৱাৰ কথা স্বামীগৃহত গম পোৱা নাছিল যদিও কইনাৰ পিতৃ-মাতৃয়ে জানিছিল।
কন্যাৰ গৰ্ভাৱস্থাৰ কথা লুকুৱাই বিয়া দিছিল পিতৃৃ-মাতৃয়ে। এই খবৰ গম পোৱাৰ পাছতেই স্বামীগৃহৰ পৰা এই কথা কইনাৰ পিতৃ-মাতৃক জনায়। স্বামী পৰিয়ালৰ লোকসকলে কইনা চাবলৈ যাওঁতে তেওঁৰ এই অৱস্থাৰ কথা গম পোৱা নাছিল। কইনা দেখাত শকত বাবে এই সন্দৰ্ভত গম পোৱা নাছিল। ইতিমধ্যে ঘটনাক লৈ আৰক্ষীৰ কাষ চাপিছে পৰিয়ালটো। আৰক্ষীয়ে দুই পৰিয়ালকেই বিষয়টোক লৈ বুজাবুজিলৈ অহাৰ আহ্বান জনাইছে। বৰ্তমান কইনাৰ পৰিয়ালে নৱজাতক আৰু কন্যাক নিজ ঘৰলৈ লৈ আনিবলৈ হাস্পতালত উপস্থিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
