অসম লাইভ২৪ঃ ৰাজনীতিবীদসকল ৰাজনীতিতেই থাকিব নোৱাৰে কিয়? বাৰে বাৰে ৰাজনীতিবীদসকলে অভিনেতা হ’বলৈ কিয় যত্ন কৰে? দেশৰ প্রধানমন্ত্ৰীক সমালোচনা কৰি কৰি ৰাহুলো আগবাঢ়িছে একে বাটেৰেই। ৰাহুল যলৈকে নাযাওক কিয় কাষে কাষে থাকে কেইবাগৰাকীও ফটোগ্ৰাফাৰ। ৰাহুলেও মোদীকেই অনুসৰণ কৰিছে নেকি?
মোদীৰ সৈতে ৰাহুলৰ পাৰ্থক্য ক’ত? ফটো, ভিডিঅ’ ইত্যাদিয়েই যেন এতিয়া ৰাহুলৰো প্রধান অস্ত্ৰ। কেতিয়াবা যদি মেকানিকৰ সৈতে ৰাহুল। কেতিয়াবা ধাননি পথাৰত ৰাহুল। মণিপুৰৰ জনতাৰ অসহায় কান্দোনো ৰাহুলৰ পেজত। বুধবাৰে ভাইৰেল হৈছে ৰাহুল গান্ধীৰ এটা ভিডিঅ’। শ্বাহৰুখৰ জাৱানৰ পাছতেই ৰাহুলৰ ‘জাৱান’। ‘জাৱান’ৰ ট্ৰেইলাৰত থকা ডাইলগো এৰা নাই ৰাহুলৰ টীমে। জাৱানৰ বিশেষ ডাইলগটোত নিজা ভিডিঅ’ লগাইছে ৰাহুল গান্ধীয়ে।
ৰাহুলৰ দলে কিয় জাৱানৰ ডাইলগ লৈ নিজা ছবি তৈয়াৰ কৰিব বিচাৰিছে? এজন ৰাজনীতিবীদ ৰাহুলে কিয় বাৰে বাৰে অভিনেতা হ’ব খুজিছে? ৰাহুলৰ এই ভিডিঅ ভাইৰেল হোৱা মাত্ৰকেই উত্থাপিত হৈছে এনে কেইবাটাও প্ৰশ্ন। শ্বাহৰুখৰ ‘জাৱান’ৰ ট্ৰেইলাৰত সংক্ষিপ্তৰূপত ছবিখনৰ আভাষ দিয়া হৈছে৷ ছবিখনত শ্বাহৰুখৰ দুটা ৰূপ দেখা যাব৷ ভিলেইন আৰু হিৰো দুটা চৰিত্ৰতেই থাকিব শ্বাহৰুখ৷ শ্বাহৰুখৰ এই ছবিৰ ডাইলগ লগাই নিজা ভিডিঅ’ ৰাহুলে শ্বেয়াৰ কৰাক লৈ বহুতেই এতিয়া প্ৰশ্ন কৰিছে, ‘ৰাহুলে কি ৰূপৰ কথা জনতাক ক’ব খুজিছে? এজন জননেতাই নিজকে এনেকৈ উপস্থাপন কৰাটো সঠিক নহয়৷ এজন জননেতাই নিজক চিনি নাপালে জনতাই কেনেকৈ চিনি পাব?’
শাসক দল বিজেপিয়ে প্ৰত্যেকসময়তেই ৰাহুলৰ ভাৱমূৰ্তী বিনষ্ট কৰিবলৈ যত্ন কৰি থকাৰ সময়তে ৰাহুলে এই ভিডিঅ’ শ্বেয়াৰ কৰাত বহুতৰেই মনত প্ৰশ্ন, ৰাহুলে নিজেই প্ৰতিদ্বন্দীক সমালোচনা কৰাৰ সুযোগ দিয়াৰ আঁৰত কি কাৰণ? সামাজিক মাধ্যমত ভাইৰেল হৈয়েই ৰাজনীতিৰ পথাৰত জনপ্ৰিয়তা বঢ়াবলৈ যত্ন কৰিছে নেকি ৰাহুল গান্ধীয়ে? অৱশ্যে এটা কথাও ক’ব লাগিব যে এই ডিজিটেল যুগত সামাজিক মাধ্যমত সক্ৰিয় হ’লেহে ৰাজনৈতিক যুদ্ধখনত সৈনিক হৈ আগুৱাব পাৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
