অসম লাইভ২৪ঃ ৰাজধানী দিল্লীৰ পৰা কিছু নিলগতেই সংঘটিত হৈছে সাম্প্ৰদায়িক ঘটনা। জ্বলি উঠিছে হাৰিয়ানা। হাৰিয়ানাৰ নূহত সাম্প্ৰদায়িক সংঘৰ্ষত নিহত হৈছে কেইবাজনো লোক। শেহতীয়াতৈ গুৰগাঁৱত এটা মছজিদ জ্বলাই দিয়া হৈছে। এই আক্ৰমণত নিহত হৈছে এজন ইমামো। অশান্ত হৈ পৰিছে হাৰিয়ানা। হাৰিয়ানাৰ চৰকাৰে সেই এলেকাত নিৰাপত্তাৰক্ষীৰ সংখ্যা বৃদ্ধি কৰিছে।
হাৰিয়ানাৰ নূহত এই পৰিস্থিতিৰ সূত্ৰপাত হৈছিল বিশ্ব হিন্দু পৰিষদে উলিওৱা এটা ধৰ্মীয় শোভাযাত্ৰাক কেন্দ্ৰ কৰি। সেই বিশেষ ৰেলীটোত অংশ লৈছিল এজন অভিযুক্তই। বিগত এমাহ পূৰ্বে নূহত জুনায়েদ আৰু নাছিৰ নামৰ দুগৰাকী মুছলমান যুৱকক গাড়ীত সোমোৱাই জীৱন্ত অৱস্থাতেই জ্বলাই দিয়া হৈছিল। এই ঘটনাত জড়িত থকা প্ৰধান অভিযুক্ত মোনু মানেছৰ নামৰ ব্যক্তিজনে বিশ্ব হিন্দু পৰিষদৰ বিশেষ শোভাযাত্ৰাটোত অংশ লৈছিল। এই খবৰ ভাইৰেল হোৱাৰ পাছতেই হাৰিয়ানাত তীব্ৰ উত্তেজনাই বিৰাজ কৰিছিল।
কিন্তু মিও মুছলমান অধ্যুষিত নূহ আৰু মেওৱাট এলেকাত এই মিছিলৰ কথা গম পোৱা মাত্ৰকেই ক্ষুদ্ধ হৈ পৰে স্থানীয় বাসিন্দাসকল। ইয়াৰপাছতেই ‘বৃজ মণ্ডল জলাভিষেক যাত্ৰা’ নামেৰে বিশ্ব হিন্দু পৰিষদে ধৰ্মীয় ৰেলী কৰিছিল। কিন্তু এই ৰেলীক বাধা দিবলৈ একাংশ মুছলমান জনতাই চেষ্টা কৰে। এই বাধা দিয়াক কেন্দ্ৰ কৰিয়েই হিন্দু-মুছলমান দুই ফৈদৰ মাজত সংঘৰ্ষ হয়। শিল দলিওৱাৰ ওপৰিও বাটে পথে থকা বাহনো জ্বলাই দিয়ে দুই ধৰ্মৰ প্ৰতিবাদী জনতাই।
গুৰগাওঁ- আলোয়াড় ৰাষ্ট্ৰীয় ঘাইপথৰ বিস্তৃৰ্ণ এলেকাত আৰম্ভ হয় মহাৰণ। এই সংঘৰ্ষত দুগৰাকী হোমগাৰ্ড নিহত হোৱা বুলি প্ৰকাশ কৰিছে হাৰিয়ানা আৰক্ষীয়ে। এই ঘটনাত আহত হৈছে কেইবাগৰাকীও লোক। আহতসকলক ভৰ্তী কৰোৱা হৈছে স্থানীয় হাস্পতালত। গুৰগাঁৱৰ চেক্টৰ ৫৭ এলেকাত এটা মছজিদ জ্বলাই দিয়াত পৰিস্থিতি আৰু ভয়ানক হৈ পৰিছে। সেই মছজিদটো মেনেজিং কমিটিৰ চেয়াৰমেনে ৰাষ্ট্ৰীয় সংবাদমাধ্যমৰ আগত কৰিছে বিশেষ মন্তব্য।
মছজিদটো মেনেজিং কমিটিৰ চেয়াৰমেনে কয়, ‘মছজিদটো জ্বলাই দিয়াৰ সময়ত আমাৰ ইমাম মছজিদৰ ভিতৰতেই আছিল। মছজিদটোৰ ভিতৰত সেই সময়ত একাংশ সাধাৰণ জনতাও আছিল। এই আক্ৰমণত কেইবাজনো লোক আহত হৈছে আৰু ইমামৰ মছজিদৰ ভিতৰতেই মৃত্যু হৈছে।’ আঞ্জুমান জামে মছজিদৰ সেই আক্ৰমণত মৃত্যু হোৱা ইমামৰ ভাতৃয়েও সংবাদমাধ্যমৰ সন্মুখত দিয়া সাক্ষাৎকাৰত কয়, ‘মই এক মুহূৰ্তৰ বাবে ভাতৃৰ মৃতদেহটো দেখিছো। মৰোণোত্তৰ পৰীক্ষাৰ বাবে দেহটো লৈ যোৱা হৈছে। আমি মৃতদেহটো পোৱাৰ পাছতেই এফআইআৰ দিম।’
মছজিদ আক্ৰমণ কৰাৰ অভিযোগত ইতিমধ্যে কেইবাজনো লোক আটক কৰিছে হাৰিয়ানা আৰক্ষীয়ে। ইতিমধ্যে হাৰিয়ানাত মোবাইল ইণ্টাৰনেট সেৱা বন্ধ কৰি দিয়া হৈছে। হাৰিয়ানাৰ প্ৰায় এলেকাতেই জাৰি কৰা হৈছে কাৰফিউ। অনিল ভিজই জনোৱা অনুসৰি, পৰ্যাপ্ত আৰক্ষী মোতায়েন কৰা হৈছে। আশেপাশে থকা এলেকাসমূহতো আৰক্ষী মোতায়েন কৰা হৈছে। এই ঘটনাক পৰিকল্পিত ষড়যন্ত্ৰ আখ্যা দিছে হাৰিয়ানা চৰকাৰে। অনিল ভিজে এই সন্দৰ্ভত কয়, ‘এই কাজিয়া দেখিয়েই বুজা যায় যে এয়া এদিনতে হোৱা ঘটনা নহয়। বহু পৰিকল্পনা কৰি এই দাঙ্গা বঢ়োৱা হৈছে। নূহত হিন্দু-মুছলমানে বছৰ বছৰ ধৰি শান্তিৰেই বাস কৰি আহিছিল। কিন্তু এই দাঙ্গা দেখি লাগিছে কোনোৱে ইচ্ছা কৰি এই সম্পৰ্কৰ মাজত বিষ ঢালিছে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
