অসম লাইভ২৪ঃ চন্দ্ৰৰ মাটিত বিজয়গাঁথা লিখিছে ভাৰতৰ চন্দ্ৰযান-৩য়ে। ইছৰোৰ প্ৰশংসা কৰিছে এতিয়া দেশ বিদেশৰ বিজ্ঞানপ্ৰেমী প্ৰতিজন লোকেই। ইছৰোৰ প্ৰশংসাত পঞ্চমুখ এতিয়া ছোনীয়া গান্ধীও। ইছৰোৰ চেয়াৰমেন তথা চন্দ্ৰযান-৩ মিছনৰ প্ৰধান দায়িত্ব গ্ৰহণ কৰা এছ সোমনাথলৈ ছোনীয়া গান্ধীয়ে লিখিছে বিশেষ চিঠি। চিঠিত সোমনাথে লিখিছে, ‘আপোনাক কৈ বুজাব নোৱাৰো কেনেকৈ বুধবাৰৰ সন্ধিয়াটোত আমি ৰোমাঞ্চিত হৈ পৰিছিলো। এয়া আমাৰ বাবে অত্যন্ত গৌৰৱৰ মুহূৰ্ত। প্ৰতিজন ভাৰতবাসীৰ সৈতে আমিও অতিশয় উৎসাহিত হৈছো। বিশেষকৈ নৱ প্ৰজন্ম যেনেধৰণে আনন্দিত হৈছে সেই আনন্দ দেখি আমিও আনন্দিত হৈছো।’
ইয়াৰোপৰি চিঠিত ছোনীয়া গান্ধীয়ে লিখিছে, ‘যুগ যুগ ধৰি ইছৰোৰ অসাধাৰণ কৃতিত্বৰেই এয়া ফচল। যোগ্য নেতৃত্ব আৰু বিজ্ঞানীৰ অক্লান্ত পৰিশ্ৰমৰ ফলতেই এই সাফল্য আহিছে। ৬ দশক ধৰি ইছৰোৱে চলোৱা নিৰৱচ্ছিন্ন সংগ্ৰামেই এই সফলতা আনিছে। আমি এতিয়া সাফল্যৰ শিখৰত উপনীত হৈছো।মই ইছৰোৰ পৰিয়ালৰ প্ৰতিজন সদস্যক শুভেচ্ছা জনাইছো। এই গৰ্বৰ মুহূৰ্তত আপোনালোকৰ সৈতে আমিও আনন্দ কৰিছো।’
চন্দ্ৰযান-৩ লেণ্ড কৰাৰ পাছতেই ইছৰোৰ চেয়াৰমেন এছ সোমনাথক ফোন কৰিছিল প্ৰধানমন্ত্ৰী নৰেন্দ্ৰ মোদীয়েও। ফোনত ইছৰোৰ চেয়াৰমেনক তেওঁ কয়, ‘সোমনাথ জী আপোনাৰ নাম সোমনাথ আৰু সোমনাথ নামটোৱেই চন্দ্ৰৰ সৈতে জড়িত। আপোনাৰ লগতে আপোনাৰ এই পৰিয়ালৰ প্ৰতিজন সদস্যক লৈ আমি গৰ্বিত। মোৰ তৰফৰ পৰা আপোনাক অভিনন্দন।’
চেয়াৰমেন এছ সোমনাথৰ ওপৰত সমগ্ৰ বিশ্বৰে দৃষ্টি নিবদ্ধ হৈ আছিল। ২০ বছৰ পূৰ্বে চন্দ্ৰ জয়ৰ সপোন দেখিছিল ইছৰোই। আৰু এই সপোনটোৱেই সাৰ্থক হ’ল এছ সোমনাথৰ নেতৃত্বত। তেওঁ ভাৰতৰ মুন মিছনৰ মাষ্টাৰমাইণ্ড। চন্দ্ৰৰ মাটিত চন্দ্ৰযান-৩ ৰ লেণ্ডাৰ বিক্ৰমে ভৰি থওঁতেই স্বাস্তিৰ নিশ্বাস এৰিছে ইছৰো প্ৰধান এছ সোমনাথে।বিক্ৰমে লেণ্ডিং কৰাৰ পাছতে এছ সোমনাথে কয়, ‘ইণ্ডিয়া ইজ অন মুন নাও।’ তাৰপাছতেই তেওঁ কয়, ‘চন্দ্ৰযান-৩ৰ দৰে এটা মিছনৰ ক্ষেত্ৰত আমাক যিসকলে সহায় সহযোগিতা কৰিছে তেওঁলোককো অশেষ ধন্যবাদ। আমাৰ সফলতাৰ বাবে দেশ বিদেশৰ যিসকললোকে শুভেচ্ছা বাৰ্তা প্ৰেৰণ কৰিছে তেওঁলোককো অশেষ ধন্যবাদ। চন্দ্ৰযান-৩ ৰ সাফল্যৰ অংক প্ৰথমে কৰা হৈছিল চন্দ্ৰযান-১ মিছনৰ পৰাই। এই সফলতা ভাৰতৰ বাবেই নহয় সমগ্ৰ বিশ্বৰ বাবেই অতি গুৰুত্বপূৰ্ণ মিছন।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
