অসম লাইভ২৪ঃ নাৰী স্বাধীনতাৰ হকে মাত মাতি শান্তিৰ নোবেল লাভ কৰিবলৈ সক্ষম হৈছে ইৰাণী যুৱতী নাৰ্গিছ মহম্মদীয়ে। নাৰ্গিছ এতিয়াও কাৰাবন্দী। ইৰাণৰ মহিলাৰ স্বাধীনতাৰ হৈ যুঁজাৰ বাবে তেওঁক ৩১ বছৰৰ কাৰাদণ্ড বিহিছে ইৰাণ প্ৰশাসনে। ইৰাণত নাৰীৰ ব্যক্তিস্বাধীনতা সঁচাকৈয়ে নাই নেকি? এটা উদাহৰণেই আপোনাক এই কথা বুজাই দিব। হিজাৱবিহীন হোৱাৰ অপৰাধত আৰু এগৰাকী কিশোৰীক মাৰধৰৰ অভিযোগ ইৰাণ আৰক্ষীৰ বিৰুদ্ধে। অভিযোহ অনুসৰি ১ অক্টোবৰত ইৰাণৰ তেহৰাণৰ এটা মেট্ৰ’ ষ্টেচনত হিজাব ভালধৰণে পৰিধান নকৰাৰ বাবে লোহাৰ ৰ’ডেৰে মূৰত আঘাত কৰা হৈছে যুৱতীগৰাকীৰ। এই আঘাতৰ পাছতেই যুৱতীগৰাকী বৰ্তমানলৈকে ক’মাতেই আছে। কিন্তু এই অভিযোগ বাৰে বাৰে নস্যৎ কৰি আহিছে ইৰাণ আৰক্ষীয়ে।
এই ঘটনাক লৈ জাঙুৰ খাই উঠিছে এতিয়া ইৰাণৰ মানৱঅধিকাৰ কৰ্মীও। বিগত বৰ্ষৰ ছেপ্টেম্বৰ মাহত হিজাৱ পৰিধান নকৰাৰ বাবেই এগৰাকী ২২ বছৰীয়া যুৱতীক আৰক্ষীয়ে মৰিয়াই মৰিয়াই হত্যা কৰিছিল। সেই একেই ঘটনাৰেই যেন পুনৰাবৃত্তি ঘটিছে। বিগত বৰ্ষত আৰক্ষীয়ে কৰা এই বৰ্বৰ কাণ্ডক লৈ দেশখনৰ নানান প্ৰান্তত অব্যাহত আছে হিজাৱ বিৰোধী আন্দোলনো। ইৰাণৰ সংখ্যালঘু সম্প্ৰদায়ভুক্ত লোকৰ দাবী যে ১ অক্টোবৰ দেওবাৰে তেহৰাণ মেট্ৰ’ ষ্টেচনৰ পৰা ট্ৰেইনত উঠাৰ সময়তে ১৬ বছৰীয়া আৰমিতা গেৰাভাণ্ডেৰ ওপৰত আৰক্ষীয়ে আক্ৰমণ চলায়। এই আক্ৰমণত ট্ৰেনত উঠাৰ সময়তেই অচেতন হৈ পৰে যুৱতীগৰাকী। ইৰাণৰ সংবাদমাধ্যমে প্ৰকাশ কৰা অনুসৰি আৰমিতা ইৰাণৰ পশ্চিমাঞ্চলৰ বাসিন্দা।
ফজৰ হাস্পতালত অচেতন আৰমিতাক ভৰ্তি কৰোৱা হয়। অভিযোগমতে কিশোৰীৰ মাতৃ শ্বাহিন আহমাদিককো কিন্তু আৰক্ষীয়ে এৰি নিদিলে। কন্যাক হাস্পতালত ভৰ্তী কৰায় হাস্পতাল চৌহদত থকা মাতৃকো গ্ৰেপ্তাৰ কৰে আৰক্ষীয়ে। আৰমিতাৰ ঘৰৰ পৰা কেইবাটাও ফোন বাজেয়াপ্ত কৰিছে আৰক্ষীয়ে। আৰমিতাৰ সৈতে সম্পৰ্কীত সকলো ব্যক্তিৰ সৈতেই সোধপোছ অব্যাহত ৰাখিছে আৰক্ষীয়ে। আৰমিতাৰ হৈ মাত মতা সাংবাদিককো আটক কৰিছে ইৰাণ আৰক্ষীয়ে।
উল্লেখ্য যে প্ৰায়সংখ্যক সূত্ৰৰ দাবী যে হিজাৱ পৰিধান নকৰাৰ বাবেই মেট্ৰ’ ষ্টেচনত কিশোৰীক ধাক্কা মৰা হৈছিল। ধাক্কা মৰাতেই শান্ত নাথাকি মূৰত লোহাৰ ৰ’ডেৰে মাৰি দিয়া হৈছিল যুৱতীগৰাকীৰ। মঙলবাৰে নিশা এক্স হেণ্ডেলত অচেতন পাৰমিতাৰ এখন ছবি ভাইৰেল হৈ পৰিছে। এই ছবি কিমান সঁচা সেই সম্পৰ্কে এতিয়াও কোনো স্পষ্ট তথ্য লাভ কৰিব পৰা নাই। ছবিত দেখা অনুসৰি, মূৰত বেণ্ডেজ বন্ধা এগৰাকী কিশোৰী হাস্পতালৰ বিছনাত আছে। শ্বাস-প্ৰশ্বাসৰ বাবে বিশেষ পাইপ বা নলী লগাই থোৱা আছে। ইৰাণৰ সংবাদ সংস্থাই পোনতে এই ছবি শ্বেয়াৰ কৰিছিল যদিও সেই ছবিৰ বাবেই তেওঁলোকৰ ভিতৰৰ কেইবাগৰাকী সাংবাদিকক গ্ৰেপ্তাৰ কৰা হৈছে।
ইৰাণ প্ৰশাসনে দাবী কৰামতে আৰমিতাৰ এক দূৰ্ঘটনাহে হৈছিল। আৰমিতাৰ মাতৃয়েও তেওঁৰ ভাষ্যত এয়া এক দূৰ্ঘটনা বুলিয়েই জনাইছে। আৰমিতাৰ শাৰীৰিক অৱস্থাক লৈ ইৰাণৰ তৰফৰ পৰা এটা বিশেষ ভিডিঅ’ শ্বেয়াৰ কৰা হৈছে। সেই ভিডিঅ’টোক কিন্তু বিবিচিয়ে সম্পাদিত এক ভিডিঅ’ বুলি দাবী কৰিছে। বিশেষ ভিডিঅ’ত থকা মাতৃৰ ভাষ্য অনুসৰি, ‘মোৰ কন্যাৰ ৰক্তচাপ কমি গৈছে। কিন্তু কি হৈছে মই ক’ব পৰা নাই।’ আনহাতে যিখন মেট্ৰ’ত ঘটনাটো সংঘটিত হৈছে সেই মেট্ৰ’ কৰ্তৃপক্ষই মাৰধৰৰ কথাটো অস্বীকাৰ কৰিছে। এই সকলোবোৰৰ মাজতেই মেট্ৰ ষ্টেচনৰ দুগৰাকী কিশোৰীৰ সৈতে ট্ৰেইনত উঠা দেখা গৈছে হিজাবহীন আৰমিতাক। ট্ৰেইনত উঠাৰ সময়ত সম্পূৰ্ণ সুস্থই দেখা গৈছে আৰমিতাক। তাৰ কিছু সময় পাছত আৰমিতাক অচেতন দেখা গৈছে। অচেতন আৰমিতাক ধৰি ধৰি প্লেটফৰ্মলৈ নমাই অনা দেখা গৈছে আৰমিতাক। সেই ফুটেজত কিন্তু কেনেকৈ অচেতন হ’ল আৰমিতা সেই ছবি নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
