মণিপুৰত ভুৱা আৰু বিষাক্ত সুৰা সেৱনৰ ফলত সংঘটিত হৈছে এক ভয়ংকৰ ঘটনা। বিষাক্ত সুৰা পান কৰি ইতিমধ্যে ১৫জন লোকৰ মৃত্যু হোৱাৰ বিপৰীতে ১৮০জনতকৈ অধিক লোক অসুস্থ হৈ চিকিৎসালয়ত ভৰ্তি হ’বলগীয়া হৈছে। ৰাজ্যখনৰ চাণ্ডেল জিলাৰ চাকপিক্ৰং মহকুমা আৰু ইয়াৰ দাঁতিকাষৰীয়া অঞ্চলত সংঘটিত হৈছে এই ঘটনা। এই ঘটনাই সমগ্ৰ মণিপুৰতে তীব্ৰ চাঞ্চল্যৰ সৃষ্টি কৰিছে। ঘটনাৰ গুৰুত্ব উপলব্ধি কৰি ৰাজ্য চৰকাৰে জৰুৰীকালীন স্বাস্থ্যসেৱাৰ ব্যৱস্থা গ্ৰহণ কৰিছে। লগতে ভুৱা সুৰা প্ৰস্তুত আৰু বিতৰণৰ সৈতে জড়িত লোকসকলৰ বিৰুদ্ধে কঠোৰ ব্যৱস্থা গ্ৰহণৰ প্ৰস্তুতি চলাইছে।
এই ঘটনাৰ পিছতে শুকুৰবাৰে মণিপুৰৰ মুখ্যমন্ত্ৰী যুমনম খেমচান্দ সিঙে লামফেলপাটৰ শ্বিজা হাস্পতাল আৰু চাজিৱাৰ বাবিনা হাস্পতাল পৰিদৰ্শন কৰে। দুয়োখন চিকিৎসালয়ত উপস্থিত হৈ মুখ্যমন্ত্ৰীগৰাকীয়ে চিকিৎসাধীন ৰোগীসকলৰ স্বাস্থ্যৰ বুজ লোৱাৰ লগতে চিকিৎসা ব্যৱস্থাৰো পৰ্যালোচনা কৰে।
মুখ্যমন্ত্ৰীয়ে সামাজিক মাধ্যম এক্সত প্ৰকাশ কৰা তথ্য অনুসৰি, শ্বিজা হাস্পতালত ১৪০জনতকৈ অধিক আৰু বাবিনা হাস্পতালত ৪১জনতকৈ অধিক ৰোগীক ভৰ্তি কৰোৱা হৈছে। তেওঁ কয় যে চিকিৎসকসকলে ৰোগীসকলক নিৰন্তৰ নিৰীক্ষণ কৰি আছে। দুয়োখন চিকিৎসালয়ৰ কৰ্তৃপক্ষক ৰোগীসকলক উন্নত চিকিৎসা সেৱা আৰু প্ৰয়োজনীয় সকলো সহায় আগবঢ়াবলৈ নিৰ্দেশ দিয়া হৈছে।
তদন্তৰ নিৰ্দেশ মুখ্যমন্ত্ৰীৰ, দোষীয়ে পাব কঠোৰ শাস্তি
বিষাক্ত সুৰা সেৱনৰ ফলত হোৱা এই ঘটনাক গুৰুত্বসহকাৰে লৈছে মণিপুৰ চৰকাৰে। মুখ্যমন্ত্ৰীগৰাকীয়ে ঘটনাটোৰ তদন্তৰ নিৰ্দেশ দিয়াৰ লগতে ইয়াৰ সৈতে জড়িত দোষীসকলক কোনো কাৰণতে ৰেহাই দিয়া নহ’ব বুলি স্পষ্ট কৰি দিছে। তেওঁ জানিবলৈ দিয়ে যে বিশেষজ্ঞ চিকিৎসকৰ নেতৃত্বত এটা চিকিৎসকৰ দল অত্যাৱশ্যকীয় ঔষধ আৰু চিকিৎসা সামগ্ৰীসহ চাণ্ডেল জিলালৈ প্ৰেৰণ কৰা হৈছে। আক্ৰান্ত লোকসকলক উন্নত চিকিৎসা প্ৰদান কৰাৰ লগতে অঞ্চলটোত স্বাস্থ্যসেৱাৰ ব্যৱস্থা অধিক শক্তিশালী কৰাৰ বাবেও পদক্ষেপ গ্ৰহণ কৰা হৈছে। লগতে, অসুস্থ লোকসকলৰ আশু আৰোগ্য কামনা কৰাৰ লগতে মৃত্যুক সাবটি লোৱা লোকসকলৰ পৰিয়াললৈ গভীৰ সমবেদনা জ্ঞাপন কৰে মুখ্যমন্ত্ৰীগৰাকীয়ে।
এতিয়াও সংকটজনক কেইবাজনো
আৰক্ষীৰ তথ্য অনুসৰি, বিষাক্ত সুৰা সেৱনৰ ফলত অসুস্থ হোৱা অধিকাংশ লোকেই আদবয়সীয়া পুৰুষ। সুৰা সেৱনৰ পিছতে তেওঁলোকৰ পেটৰ তীব্ৰ বিষ, মূৰ ঘূৰোৱা আৰু উশাহ-নিশাহ লোৱাত অসুবিধাকে ধৰি বিভিন্ন শাৰীৰিক সমস্যা দেখা দিয়ে। হঠাতে বৃহৎ সংখ্যক ৰোগী চিকিৎসালয়ত উপস্থিত হোৱাত শ্বিজা হাস্পতালত যথেষ্ট চাপৰ সৃষ্টি হয়। হাস্পতালখনৰ যুটীয়া পৰিচালন সঞ্চালক ডাঃ চেতন খুণ্ডোংবামে জানিবলৈ দিয়া মতে, পৰিস্থিতি নিয়ন্ত্ৰণৰ বাবে ৰাজ্যৰ স্বাস্থ্য বিভাগ, আঞ্চলিক চিকিৎসা বিজ্ঞান প্ৰতিষ্ঠান (RIMS) আৰু জৱাহৰলাল নেহৰু চিকিৎসা বিজ্ঞান প্ৰতিষ্ঠানৰ (JNIMS) সৈতে সমন্বয় ৰক্ষা কৰি কাম কৰি থকা হৈছে।
ইতিমধ্যে একাংশ ৰোগীক আন চিকিৎসালয়লৈ স্থানান্তৰ কৰা হৈছে। আনহাতে, যিসকল ৰোগীৰ অৱস্থা অধিক সংকটজনক আৰু জীৱনদায়িনী চিকিৎসা তথা হিম’ডায়েলাইছিছৰ প্ৰয়োজন হৈছে, তেওঁলোকক শ্বিজা হাস্পতালতে বিশেষ চিকিৎসা প্ৰদান কৰা হৈছে।
সামগ্ৰিকভাৱে, মণিপুৰৰ এই ঘটনাই অবৈধভাৱে প্ৰস্তুত কৰা ভুৱা সুৰাৰ ভয়ংকৰ পৰিণতি পুনৰ এবাৰ পোহৰলৈ আনিছে। এতিয়া চৰকাৰী তদন্তত এই বিষাক্ত সুৰা ক’ৰ পৰা আহিছিল, কোনে প্ৰস্তুত কৰিছিল আৰু ইয়াৰ বিতৰণৰ আঁৰত কোন কোন জড়িত আছিল, সেই সকলো তথ্য পোহৰলৈ অহাৰ অপেক্ষা কৰিছে ৰাজ্যবাসীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
















