সাগৰীয় ঘূৰ্ণী বতাহ ‘আকৱান’ৰ প্ৰভাৱত দেশৰ কেইবাখনো ৰাজ্যত বতৰ ভয়ংকৰ ৰূপ ধাৰণ কৰিছে। প্ৰতি ঘণ্টাত প্ৰায় ১২০ কিলোমিটাৰ বেগেৰে আগবাঢ়িছে এই ঘূৰ্ণী বতাহ। ঘূৰ্ণী বতাহৰ প্ৰভাৱত সাগৰত প্ৰচণ্ড লহৰৰ সৃষ্টি হৈছে, আনহাতে বহু অঞ্চলত নেৰানেপেৰা বৰষুণ আৰু ধুমুহাই জনজীৱন বিপৰ্যস্ত কৰি তুলিছে। বতাহৰ গতিবেগ ক্ৰমাৎ বৃদ্ধি পোৱাৰ লগতে পাৰাস্তম্ভও দ্ৰুতগতিত নিম্নগামী হৈছে।
ঘূৰ্ণী বতাহৰ সম্ভাৱ্য বিপদৰ প্ৰতি লক্ষ্য ৰাখি প্ৰশাসনে ব্যাপক সতৰ্কতামূলক ব্যৱস্থা গ্ৰহণ কৰিছে। প্ৰায় ৩ লাখ লোকক নিৰাপদ স্থানলৈ উদ্ধাৰ কৰা হৈছে। উদ্ধাৰ আৰু সাহায্য অভিযানৰ বাবে ৪২৩টা উদ্ধাৰকাৰী দল সাজু কৰি ৰখাৰ লগতে ৯ হাজাৰৰো অধিক আশ্ৰয় শিবিৰ নিৰ্মাণ কৰিছে প্ৰশাসনে।
অন্ধ্ৰপ্ৰদেশ আৰু ওড়িশাত ঘূৰ্ণী বতাহৰ প্ৰভাৱ অধিক ভয়ংকৰ হোৱাৰ আশংকা কৰা হৈছে। বতৰ বিজ্ঞান কেন্দ্ৰই দুয়োখন ৰাজ্যতে হাই এলাৰ্ট জাৰি কৰিছে। বিশেষকৈ উত্তৰ অন্ধ্ৰপ্ৰদেশত ঘূৰ্ণী বতাহে ভয়ংকৰ ৰূপ ধাৰণ কৰাৰ আশংকা আছে। অন্ধ্ৰপ্ৰদেশৰ নেল্লোৰ আৰু বিশাখাপট্টনমৰ বহু অঞ্চলত ঘূৰ্ণী বতাহৰ প্ৰভাৱ পৰিব পাৰে বুলি আশংকা কৰা হৈছে।
ওড়িশাৰ ১৩খন জিলাত ৰেড এলাৰ্ট জাৰি কৰা হৈছে। পৰিস্থিতিৰ প্ৰতি লক্ষ্য ৰাখি ছখন জিলাত ১৯ নৱেম্বৰৰ পৰা ২১ নৱেম্বৰলৈ বিদ্যালয় বন্ধ ঘোষণা কৰা হৈছে। ঘূৰ্ণী বতাহৰ প্ৰভাৱত বহু ৰে’লৰ চলাচল বাতিল কৰা হৈছে, যাৰ ফলত যাত্ৰীসকলৰ যাত্ৰাত অসুবিধাৰ সৃষ্টি হৈছে। ঘূৰ্ণী বতাহৰ প্ৰভাৱ পুৰীৰ ধৰ্মীয় স্থানসমূহতো পৰিছে। সুৰক্ষা আৰু প্ৰতিকূল বতৰৰ বাবে বহু মন্দিৰত ১৮ নৱেম্বৰৰ পৰা দৰ্শনাৰ্থীৰ প্ৰৱেশ নিষিদ্ধ কৰা হৈছে। সৰ্বজনবিদিত গুণ্ডিচা মন্দিৰতো প্ৰৱেশ বন্ধ কৰি দিয়া হৈছে। আনহাতে, পুৰীৰ জগন্নাথ মন্দিৰতো বিশেষ দৰ্শন বন্ধ ৰখাৰ নিৰ্দেশনা জাৰি কৰা হৈছে।
ঘূৰ্ণী বতাহৰ প্ৰভাৱ অসমতো পৰিব পাৰে বুলি আশংকা কৰা হৈছে। ৰাজ্যৰ বিভিন্ন স্থানত প্ৰচণ্ড বৰষুণ হোৱাৰ আশংকা আছে। সেয়ে বতৰ পৰিস্থিতিৰ প্ৰতি লক্ষ্য ৰাখি জনসাধাৰণক সতৰ্ক আৰু সচেতন হৈ থাকিবলৈ আহ্বান জনোৱা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
















