অহা ১০ বছৰলৈ থাকিব কেৱল NDA চৰকাৰ, শ্বাহ-গাডকাৰী-সীতাৰমণে হেৰুৱাব পাৰে পদবী, দেখা যাব নতুন মুখ
২০২৪ চনৰ লোকসভা নিৰ্বাচনৰ ফলাফলৰ পিছত আজি এন ডি এৰ বৈঠক অনুষ্ঠিত হয়। এই সময়ছোৱাত নীতিশ কুমাৰ, চন্দ্ৰবাবু নাইডু, একনাথ সিণ্ডে, অজিত পাৱাৰ, চিৰাগ পাছৱান, জিতন ৰাম মাঞ্জীৰ দৰে বহু ডাঙৰ নেতাই এন ডি এক সমৰ্থন কৰিছিল। এই বৈঠকতে নৰেন্দ্ৰ মোডীক তৃতীয়বাৰৰ বাবে দলৰ নেতৃত্ব হিচাপে সৰ্বসন্মতি সাপেক্ষে নিৰ্বাচিত কৰা হয়। যাৰ ফলত মোডীয়েই প্ৰধানমন্ত্ৰী হিচাপে শপত লোৱাটো নিশ্চিত হৈ পৰে।
অৱশ্যে এই সময়ছোৱাত নৰেন্দ্ৰ মোডীৰ ভাষণ ওপৰত সকলোৰে দৃষ্টি নিৱদ্ধ হৈ পৰে। মোদীয়ে সকলো মিত্ৰশক্তিক ধন্যবাদ জনাই ভাষণ আৰম্ভ কৰে। এন ডি এক সম্বোধন কৰি মোদীয়ে কয় যে ভাৰতৰ মহান গণতন্ত্ৰৰ শক্তি হ’ল দেশৰ ২২খন ৰাজ্যৰ মানুহে এন ডি এক চৰকাৰ গঠনৰ সুযোগ দিছে। আমাৰ এই মিত্ৰতা সঁচাকৈয়ে ভাৰতৰ আত্মা আৰু শিপাৰ শিপাই আছে। আমাৰ দেশৰ ১০খন ৰাজ্যত জনজাতীয় লোকৰ সংখ্যা নিৰ্ণায়ক। ইয়াৰে ৭ খন ৰাজ্যত এন ডি এ চৰকাৰ গঠন হৈছে।
প্ৰধানমন্ত্ৰী মোদীয়ে কয় যে গোৱাৰ পৰা উত্তৰ-পূৰ্বাঞ্চললৈকে বহু ৰাজ্যত বৃহৎ সংখ্যক খ্ৰীষ্টান ভাই-ভনী আছে। আমি তাতো এন ডি এ হিচাপে সেৱা আগবঢ়াই আছো। ভাৰতৰ মিত্ৰতাৰ ইতিহাসত নিৰ্বাচনৰ পূৰ্বে মিত্ৰতা কেতিয়াও ইমান সফল হোৱা নাই। এন ডি এৰ মিত্ৰতা যিমান সফল হৈছে।
প্ৰধানমন্ত্ৰী মোদীয়ে কয় যে চৰকাৰ চলাবলৈ সংখ্যাগৰিষ্ঠতা প্ৰয়োজনীয়। কিন্তু দেশ চলাবলৈ সৰ্বসন্মতি অতি গুৰুত্বপূৰ্ণ। স্বাধীনতাৰ ৭৫ বছৰৰ ভিতৰত এন ডি এ তিনিটা দশক ধৰি চৰকাৰী হৈ আছে। এইটো কোনো স্বাভাৱিক কথা নহয়। অটল বিহাৰী বাজপেয়ী, বালা চাহেব ঠাকৰে, জৰ্জ ফাৰ্নাণ্ডেছৰ দৰে লোকে সিঁচা বীজক দেশৰ জনসাধাৰণে জলসিঞ্চন কৰি ডাঙৰ গছলৈ ৰূপান্তৰিত কৰিছে।
লগতে ইয়াকো কয় যে, অহা ১০ বছৰলৈ এন ডি এ হিচাপে দেশত শাসনভাৰত থাকি চৰকাৰ চলাব। অহা ১০ বছৰত নাগৰিকৰ জীৱনলৈ সুশাসন, উন্নয়ন আৰু জীৱনৰ মান আৰু অধিক উনন্ত কৰি অনাৰ বাবে যৎপৰোনাস্তি চেষ্টা কৰিব এন ডি এ চৰকাৰে।
এই বৈঠকতে নিশ্চিত কৰা হব কেন্দ্ৰীয় চৰকাৰৰ মন্ত্ৰীত্ব পদৰ প্ৰাৰ্থীৰ নাম। নীতিশ কুমাৰ আৰু চন্দ্ৰবাবু নাইডুৱে বিচৰা মন্ত্ৰী পদ তথা মোদীক মত দিয়াৰ চৰ্ত সাপেক্ষে কেইবাটাও গুৰুত্বপূৰ্ণ পদবী বিজেপিৰ হাতৰ পৰা যাব। নীতিশ-নাইডুৱে এই ক্ষেত্ৰত অতি গুৰুত্বপূৰ্ণ গৃহ, বিত্ত, ৰেলৱে, গড়কাপ্তানী, আদি পদবী বিচাৰিছে। যদিহে দাবী পূৰণ হয়, তেন্তে অমিত শ্বাহ, নিৰ্মলা সীতাৰমণ, নীতিন গাডকাৰী আদিৰ দৰে শীৰ্ষ নেতাই হেৰুৱাব পাৰে পূৰ্বৰ পদ। অৱশ্যে এতিয়ালৈকে কেবিনেট সদস্য সন্দৰ্ভত কোনো আনুষ্ঠানিকভাৱে ঘোষণা কৰা নাই এন ডি এৰ ফালৰ পৰা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
