অন্ধ্ৰ প্ৰদেশৰ বিশাখাপট্টনমত গুৱাহাটীৰ ছাত্ৰী তথা নৃত্যশিল্পী হিমাশ্ৰী বড়োৰ ৰহস্যজনক মৃত্যুৰ ঘটনাই নতুন মোৰ লৈছে। এই ঘটনাৰ তদন্তৰ দাবীত দিছপুৰ আৰক্ষী থানাত এজাহাৰ দাখিল কৰিছে সদৌ অসম কৰিঅ’গ্ৰাফাৰ এছ’চিয়েচনে। বিশাখাপট্টনমৰ ইভেণ্ট মেনেজাৰ গোবিন্দ নামৰ ব্যক্তিজনৰ বিৰুদ্ধে উত্থাপন হৈছে কেইবাটাও গুৰুতৰ অভিযোগ।
অভিযোগ অনুসৰি, অসমৰ পৰা বহু যুৱক-যুৱতীক নৃত্যৰ অনুষ্ঠানত অংশগ্ৰহণ কৰোৱাৰ বাবে দক্ষিণ ভাৰতলৈ লৈ যোৱা হৈছিল। কিন্তু অনুষ্ঠান শেষ হোৱাৰ পিছতো প্ৰতিশ্ৰুতি অনুসৰি পাৰিশ্ৰমিক নিদিয়াৰ অভিযোগ উঠিছে। কেৱল সেয়াই নহয়, কেইবাগৰাকীও নৃত্যশিল্পীক শাৰীৰিকভাৱে নিৰ্যাতন চলোৱাৰ লগতে বলপূৰ্বকভাৱে দৰৱ সেৱন কৰোৱাৰো অভিযোগ উত্থাপন কৰিছে হিমাশ্ৰীৰ সৈতে যোৱা আন একাংশ নৃত্যশিল্পীয়ে।
নৃত্যশিল্পীসকলে জনোৱা অনুসৰি, হিমাশ্ৰীয়ে ১৮ তাৰিখে এটা অনুষ্ঠানত নৃত্য পৰিৱেশন কৰিছিল। কিন্তু তেওঁৰ সেই অনুষ্ঠান আয়োজকৰ পছন্দ নোহোৱাৰ বাবে পাৰিশ্ৰমিক বন্ধ কৰি ৰখাৰ ভাবুকি দিয়া হৈছিল বুলি অভিযোগ উঠিছে। আনকি হিমাশ্ৰীৰ সৈতে অন্ধ্ৰ প্ৰদেশলৈ যোৱা দুগৰাকী নৃত্যশিল্পীক আয়োজকে শাৰীৰিকভাৱে প্ৰহাৰ কৰাৰো অভিযোগ উত্থাপন হৈছে।
ইয়াৰ উপৰি, তুলনামূলকভাৱে ক্ষীণ গঢ়ৰ কেইবাগৰাকীও নৃত্যশিল্পীক শকত আৰু স্বাস্থ্যৱান দেখুৱাবলৈ গোবিন্দই অবৈধভাৱে আৰু বলপূৰ্বকভাৱে দৰৱ সেৱন কৰোৱাইছিল বুলি অভিযোগ কৰিছে তেওঁলোকৰ একাংশই। বিশাখাপট্টনমত থকা এগৰাকী যুৱতীয়েও সদৌ অসম কৰিঅ’গ্ৰাফাৰ এছ’চিয়েচনৰ সদস্যৰ সৈতে টেলিফোনিক বাৰ্তালাপত শাৰীৰিক নিৰ্যাতনৰ অভিযোগ উত্থাপন কৰা বুলি জানিব পৰা গৈছে।
আনহাতে, হিমাশ্ৰী বড়োৰ ৰেলযাত্ৰাক লৈও কেতবোৰ কথা পোহৰলৈ আহিছে। হিমাশ্ৰীৰ বান্ধৱী জ্যোতিৰ চিনাকি অবিনাশ নামৰ এজন যুৱকে তেওঁক ৰেলত উঠাই দিছিল বুলি জানিবলৈ দিছে এগৰাকী নৃত্যশিল্পীয়ে। অৱশ্যে, হিমাশ্ৰীয়ে ফোনযোগে সেই যুৱকজনক চিনি নাপায় বুলি জনোৱা বুলি নৃত্যশিল্পীগৰাকীয়ে সাংবাদিকৰ আগত সদৰী কৰে।
হিমাশ্ৰীৰ মৃত্যুৰ প্ৰকৃত কাৰণ কি? তেওঁৰ সৈতে যোৱা নৃত্যশিল্পীসকলৰ ওপৰত সঁচাকৈয়ে নিৰ্যাতন চলোৱা হৈছিল নেকি? পাৰিশ্ৰমিকক লৈ হোৱা বিবাদৰ সৈতে এই ঘটনাৰ কোনো সম্পৰ্ক আছে নেকি? এই সকলোবোৰ দিশৰ নিৰপেক্ষ তদন্তৰ দাবী উত্থাপন হৈছে। অৱশ্যে, ইভেণ্ট মেনেজাৰ গোবিন্দৰ বিৰুদ্ধে উত্থাপিত অভিযোগসমূহ তদন্তৰ জৰিয়তে নিশ্চিত হোৱাটো প্ৰয়োজন। আৰক্ষীৰ তদন্তৰ পিছতহে ঘটনাটোৰ প্ৰকৃত সত্য পোহৰলৈ আহিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
