এবছৰলৈ প্ৰতিবাদ কৰিব নোৱাৰিব অভিজিত দীপকেই!

দিল্লীৰ যন্তৰ মন্তৰত প্ৰতিবাদ কৰিবলৈ যোৱাৰ পূৰ্বে আটক কৰা CJPৰ তিনিজন নেতা অভিজিত দীপকে, আশুতোষ ৰাংকা আৰু সৌৰভ দাসক চৰ্তসাপেক্ষে মুকলি কৰি দিয়া হৈছে। বিশেষ কাৰ্যবাহী দণ্ডাধীশৰ আদালতে তেওঁলোকক ভাৰতীয় নাগৰিক সুৰক্ষা সংহিতাৰ ১২৬ নং ধাৰাৰ অধীনত বণ্ডত স্বাক্ষৰ কৰিবলৈ নিৰ্দেশ দিয়ে। এই বণ্ড অনুসৰি, তেওঁলোকে এবছৰৰ বাবে শান্তি ভংগ কৰিব পৰা কোনো কামত লিপ্ত নহ’ব বুলি প্ৰতিশ্ৰুতি দিব লাগিব। এই ঘটনাৰ পিছতে এটা প্ৰশ্ন উত্থাপন হৈছে—বণ্ডত স্বাক্ষৰ কৰাৰ অৰ্থ এয়াই নেকি যে তিনিওজন নেতাই এবছৰৰ বাবে কোনো প্ৰতিবাদত অংশগ্ৰহণ কৰিব নোৱাৰিব? তেওঁলোকে চৰ্ত উলংঘা কৰিলে কি হ’ব? এই সন্দৰ্ভত অধিবক্তা অংকিতা তিৱাৰীয়ে আগবঢ়োৱা ব্যাখ্যা অনুসৰি বণ্ডত স্বাক্ষৰ কৰাৰ অৰ্থ প্ৰতিবাদ কৰাৰ অধিকাৰ সম্পূৰ্ণৰূপে হেৰুৱাই পেলোৱা নহয়।

মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত দিল্লীৰ যন্তৰ মন্তৰত প্ৰতিবাদৰ আহ্বান জনোৱা হৈছিল। কিন্তু প্ৰতিবাদৰ বাবে প্ৰয়োজনীয় অনুমতি নথকাৰ বাবে আৰক্ষীয়ে তাত প্ৰতিবাদকাৰীসকলক সমবেত হোৱাত বাধা দিয়ে। ১০ অক্টোবৰত CJPৰ নেতা অভিজিত দীপকে, আশুতোষ ৰাংকা আৰু সৌৰভ দাসক আটক কৰা হয়। তেওঁলোকৰ বিৰুদ্ধে ভাৰতীয় নাগৰিক সুৰক্ষা সংহিতাৰ ১২৬ আৰু ১৭০ নং ধাৰাৰ অধীনত ব্যৱস্থা গ্ৰহণ কৰা হয় বুলি উল্লেখ কৰা হৈছে। পিছত দেওবাৰে পুৱা তিনিওজনকে বিশেষ কাৰ্যবাহী দণ্ডাধীশৰ আদালতত হাজিৰ কৰোৱা হয়। আদালতে তেওঁলোকক চৰ্তসাপেক্ষে মুকলি কৰি দিয়ে আৰু শান্তি ভংগ কৰিব পৰা কামৰ পৰা আঁতৰি থাকিবলৈ নিৰ্দেশ দিয়ে। লগতে যন্তৰ মন্তৰলৈ যোৱাৰ ক্ষেত্ৰতো নিষেধাজ্ঞা আৰোপ কৰা হৈছে বুলি জানিব পৰা গৈছে।

এই গোচৰটো বুজিবলৈ হ’লে দুটা আইনী ধাৰাৰ বিষয়ে জনাটো প্ৰয়োজন।
১২৬ নং ধাৰা: ভাৰতীয় নাগৰিক সুৰক্ষা সংহিতাৰ এই ধাৰাৰ অধীনত কোনো ব্যক্তিয়ে শান্তি ভংগ কৰিব পাৰে বুলি আশংকা থাকিলে, নিৰ্দিষ্ট পৰিস্থিতিত কাৰ্যবাহী দণ্ডাধীশে সেই ব্যক্তিৰ পৰা শান্তি বজাই ৰখাৰ বণ্ড বিচাৰিব পাৰে। এই বণ্ডৰ ম্যাদ সৰ্বাধিক এবছৰ হ’ব পাৰে। সহজ ভাষাত ক’বলৈ গ’লে, ব্যক্তিজনে নিৰ্দিষ্ট সময়ছোৱাত শান্তি ভংগ নকৰাৰ প্ৰতিশ্ৰুতি দিব লাগে। এই ব্যৱস্থাৰ উদ্দেশ্য হৈছে সম্ভাৱ্য সংঘাত বা অশান্তি ৰোধ কৰা।

১৭০ নং ধাৰা: ভাৰতীয় নাগৰিক সুৰক্ষা সংহিতাৰ এই ধাৰা অনুসৰি, কোনো আৰক্ষী বিষয়াই কিছুমান নিৰ্দিষ্ট পৰিস্থিতিত কোনো ব্যক্তিয়ে গ্ৰেপ্তাৰযোগ্য অপৰাধ সংঘটিত কৰাৰ পৰিকল্পনা কৰিছে বুলি জানিলে, সেই অপৰাধ সংঘটিত হোৱাটো ৰোধ কৰিবলৈ ৱাৰেণ্ট অবিহনে আটক কৰিব পাৰে। অৱশ্যে এই ব্যৱস্থা আইনৰ নিৰ্ধাৰিত চৰ্ত আৰু সীমাৰ ভিতৰতহে প্ৰযোজ্য। আটক কৰাৰ পিছত সংশ্লিষ্ট ব্যক্তিক আইন অনুসৰি প্ৰয়োজনীয় সময়ৰ ভিতৰত উপযুক্ত কৰ্তৃপক্ষৰ সন্মুখত হাজিৰ কৰাব লাগে।

আইনৰ দৃষ্টিত শান্তি ভংগ মানে কি?

সাধাৰণ ভাষাত শান্তি ভংগ মানে এনে কাম কৰা, যাৰ ফলত ৰাজহুৱা স্থানত অশান্তি, সংঘাত বা হিংসাৰ পৰিস্থিতিৰ সৃষ্টি হ’ব পাৰে। উদাহৰণস্বৰূপে— ৰাজহুৱা স্থানত এনে আচৰণ কৰা, যাৰ ফলত সংঘাত বা মাৰপিটৰ পৰিস্থিতি সৃষ্টি হয়। হিংসা সংঘটিত কৰিবলৈ উচটনি দিয়া। দুটা গোট বা সম্প্ৰদায়ৰ মাজত উত্তেজনা বৃদ্ধি কৰা। আনক ভাবুকি দি ৰাজহুৱা শান্তি বিঘ্নিত কৰাৰ পৰিস্থিতি সৃষ্টি কৰা। অৱশ্যে কোনো বক্তব্য, শ্লোগান বা প্ৰতিবাদে কেৱল চৰকাৰ বা প্ৰশাসনক অসন্তুষ্ট কৰিলেই সেয়া শান্তি ভংগ বুলি গণ্য নহয়। কোনো কাৰ্যৰ আইনী মূল্যায়ন কৰিবলৈ হ’লে ঘটনাৰ প্ৰকৃত পৰিস্থিতি, প্ৰযোজ্য আইন আৰু উপলব্ধ তথ্য বিবেচনা কৰিব লাগে।

বণ্ডত স্বাক্ষৰ কৰিলে এবছৰলৈ প্ৰতিবাদ কৰিব নোৱাৰিবনে? এইটোৱেই বৰ্তমানৰ আটাইতকৈ গুৰুত্বপূৰ্ণ প্ৰশ্ন। অধিবক্তা অংকিতা তিৱাৰীৰ ব্যাখ্যা অনুসৰি, শান্তি বজাই ৰখাৰ বণ্ডত স্বাক্ষৰ কৰাৰ অৰ্থ এয়া নহয় যে সংশ্লিষ্ট ব্যক্তিয়ে এবছৰলৈ সকলো ধৰণৰ প্ৰতিবাদৰ পৰা আঁতৰি থাকিব লাগিব। গণতান্ত্ৰিক ব্যৱস্থাত নাগৰিকে শান্তিপূৰ্ণভাৱে প্ৰতিবাদ কৰাৰ অধিকাৰ লাভ কৰে। সেয়েহে, কেৱল বণ্ডত স্বাক্ষৰ কৰাৰ বাবেই কোনো ব্যক্তিৰ শান্তিপূৰ্ণ প্ৰতিবাদৰ অধিকাৰ স্বয়ংক্ৰিয়ভাৱে শেষ হৈ নাযায়। কিন্তু ইয়াৰ অৰ্থ এইটোও নহয় যে তেওঁলোকে যিকোনো স্থানত, যিকোনো সময়তে নিজৰ ইচ্ছামতে প্ৰতিবাদ কৰিব পাৰিব। প্ৰতিবাদৰ বাবে প্ৰযোজ্য অনুমতি, স্থান আৰু আন আইনী চৰ্তসমূহ মানি চলিব লাগিব। বণ্ডত থকা নিৰ্দিষ্ট চৰ্তসমূহো উলংঘা কৰিব নোৱাৰিব। অৰ্থাৎ, শান্তিপূৰ্ণভাৱে নিজৰ দাবী উত্থাপন কৰা আৰু হিংসা বা অশান্তিৰ সৃষ্টি কৰা—এই দুয়োটাৰ মাজত স্পষ্ট পাৰ্থক্য আছে।

যদি কোনো ব্যক্তিয়ে বণ্ডত স্বাক্ষৰ কৰাৰ পিছত তাৰ চৰ্ত উলংঘা কৰে, তেন্তে তেওঁৰ বিৰুদ্ধে আইনী ব্যৱস্থা গ্ৰহণ কৰা হ’ব পাৰে। অৱশ্যে কি ব্যৱস্থা গ্ৰহণ কৰা হ’ব, সেয়া উলংঘাৰ প্ৰকৃতি, প্ৰযোজ্য আইন আৰু গোচৰৰ পৰিস্থিতিৰ ওপৰত নিৰ্ভৰ কৰিব। পৰিস্থিতি অনুসৰি সংশ্লিষ্ট ব্যক্তিক আটক বা গ্ৰেপ্তাৰ কৰা, বণ্ডৰ ধনৰ সন্দৰ্ভত ব্যৱস্থা গ্ৰহণ কৰা অথবা নতুন অপৰাধ সংঘটিত হ’লে তাৰ বাবে পৃথক আইনী ব্যৱস্থা লোৱা হ’ব পাৰে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ