জীৱনত সফলতা লাভ কৰিবলৈ হ’লে কঠিন পৰিস্থিতিৰ সন্মুখীন হৈও হাৰ মানিব নালাগে। দৃঢ় ইচ্ছাশক্তি, কঠোৰ পৰিশ্ৰম আৰু পৰিয়ালৰ ত্যাগে যে মানুহক সফলতাৰ শিখৰলৈ লৈ যাব পাৰে, তাৰ এক সুন্দৰ উদাহৰণ হৈছে আৰতি মহতো নামৰ যুৱতীগৰাকী। আৰ্থিক অভাৱৰ মাজতো পঢ়া-শুনা অব্যাহত ৰাখি অৱশেষত তেওঁ ডক্টৰেট ডিগ্ৰী লাভ কৰিবলৈ সক্ষম হৈছে। তেওঁৰ সফলতাৰ কাহিনীত আটাইতকৈ বিশেষ কথাটো হ’ল, যিখন প্ৰতিষ্ঠানত আৰতিৰ মাতৃয়ে দীৰ্ঘদিন ধৰি চাফাই কৰ্মী হিচাপে কাম কৰি আহিছে, সেই একেখন প্ৰতিষ্ঠানৰ পৰাই আৰতিয়ে অভিযান্ত্ৰিক বিষয়ত পি এইচ ডি সম্পূৰ্ণ কৰিছে। এই ঘটনা ঝাৰখণ্ডৰ।
ঝাৰখণ্ডৰ ৰাঁচী জিলাৰ অংগাদা ব্লকৰ তুৰুপ গাঁৱৰ বাসিন্দা আৰতি মহতো। তেওঁ ৰাঁচীৰ BIT মেছৰা (Birla Institute of Technology, Mesra)ৰ পৰা বি টেক আৰু এম টেক সম্পূৰ্ণ কৰাৰ পিছত একেখন প্ৰতিষ্ঠানৰ পৰাই পি এইচ ডি ডিগ্ৰী লাভ কৰে। কিন্তু এই সফলতাৰ আঁৰত আছে বহু বছৰীয়া সংগ্ৰাম, মাতৃৰ অসীম ত্যাগ আৰু শিক্ষাৰ প্ৰতি আৰতিৰ একাগ্ৰতা।
আৰতিৰ সফলতাৰ আঁৰত তেওঁৰ মাতৃ ৰাণু দেৱীৰ অৱদান আটাইতকৈ বেছি। প্ৰায় ২৬ বছৰ ধৰি ৰাণু দেৱীয়ে বিআইটি মেছৰাত চাফাই কৰ্মী হিচাপে কাম কৰি আহিছে। আৰতিৰ ভাষ্য অনুসৰি, তেওঁৰ মাতৃ আনুষ্ঠানিকভাৱে শিক্ষিত নহয়। স্বামীৰ মৃত্যুৰ পিছত পৰিয়ালটোক পোহপাল দিবলৈ তেওঁ স্বামীৰ কৰ্মস্থলীত কাম কৰিবলৈ আৰম্ভ কৰিছিল। সেই সময়ত ৰাণু দেৱীৰ উপাৰ্জন যথেষ্ট কম আছিল। কিন্তু সীমিত উপাৰ্জনেৰে সন্তানকেইটাক ডাঙৰ-দীঘল কৰাৰ লগতে তেওঁলোকৰ পঢ়া-শুনাৰ খৰচ বহন কৰাটো সহজ নাছিল। তথাপি তেওঁ হাৰ নামানিলে। নিজৰ কষ্ট আৰু প্ৰয়োজনীয়তাক আওকাণ কৰি সন্তানকেইটাক শিক্ষিত কৰাৰ সপোন দেখিছিল। আৰতি পৰিয়ালটোৰ একমাত্ৰ কন্যা আৰু তিনিটা সন্তানৰ ভিতৰত দ্বিতীয়। তেওঁৰ জ্যেষ্ঠ ভাতৃয়ে বৰ্তমান এখন দোকান চলাই আছে। আনহাতে, সৰু ভায়েকে অভিযান্ত্ৰিক বিষয়ত বি টেক কৰি আছে।
আৰতিৰ পৰিয়ালৰ আৰ্থিক অৱস্থা ইমানেই দুৰ্বল আছিল যে পৰিয়ালৰ সদস্যসকলে পঢ়া-শুনাৰ লগতে কৃষিকাৰ্যতো সহায় কৰিবলগীয়া হৈছিল। ধান ৰোৱা আৰু ধান চপোৱাৰ দৰে কামো তেওঁলোকে কৰিছিল। আনকি প্ৰতিদিনে নদী পাৰ হৈ পঢ়িবলৈ যাবলগীয়া হৈছিল। আৰতিৰ এই সংগ্ৰামৰ কাহিনীয়ে প্ৰমাণ কৰে যে আৰ্থিক অভাৱে সপোন পূৰণৰ পথত বাধাৰ সৃষ্টি কৰিব পাৰে, কিন্তু দৃঢ় মনোবল আৰু পৰিশ্ৰমেৰে সেই বাধা অতিক্ৰম কৰাটো সম্ভৱ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
