সাধাৰণভাৱে জ্বৰৰ সৈতে ডেঙ্গি জ্বৰৰ খুব বেছি পাৰ্থক্য নাই৷ ঋতু সলনিৰ সময়ত প্ৰায় মানুহৰেই জ্বৰ হোৱাটো স্বাভাৱিক লক্ষণ যদিও ৰাজ্যত ডেঙ্গিৰ ভয়াৱহতা থকাৰ বাবে এই জ্বৰক সাধাৰণ বুলিও উপেক্ষা কৰিব নোৱাৰি৷ ডেঙ্গিয়ে আপোনাৰ শৰীৰত বাহ বান্ধিছে নেকি সেই কথা বুজি উঠাৰ পূৰ্বেই বহু লোকে মৃত্যুকো সাবটি লয়৷
সাধাৰণ জ্বৰ আৰু ডেঙ্গি জ্বৰৰ পাৰ্থক্য নথকা নহয়৷ সেয়ে ডেঙ্গিৰ কিছু লক্ষণ আপুনি নিজাকৈ জানি থোৱাটো খুবেই প্ৰয়োজন৷ ডেঙ্গি হ’লে সমগ্ৰ শৰীৰত বিষ হয়৷ ইয়াৰ পুৰ্বে ডেঙ্গিৰ প্ৰচলিত নাম আছিল হাড়ভঙা জ্বৰ৷ ইয়াৰ সৈতে শৰীৰৰ বিভিন্ন স্থান ৰঙাও হৈ পৰে৷
ভাইৰেল জ্বৰৰ ক্ষেত্ৰত চৰ্দি, ডিঙিবিষ, শৰীৰৰ হালকা বিষ, দুৰ্বলতাৰ দৰে উপসৰ্গ থাকে৷ কিন্তু ডেঙ্গি ৰোগীৰ ক্ষেত্ৰত জ্বৰৰ তীব্ৰতা বহু বেছি হয়৷ জ্বৰ অহাৰ ২৪ ঘণ্টাৰ পৰা ৪৮ ঘণ্টাৰ মাজত সমগ্ৰ শৰীৰৰ ৰঙা ৰঙা ফোঁহা উলাই৷ ইয়াৰ লগতে দেহৰ গাঁঠিসমূহত বিষ অনুভূত হয়৷
ডেঙ্গিৰ উপসৰ্গসমূহ কি কি?
১) জ্বৰ, মূৰৰ বিষ. হাত-ভৰিৰ বিষৰ লগতে চকুৰ ভিতৰতো বিষ অনুভূত হয়৷
২) বমি বমি ভাৱ আৰু খাদ্যগ্ৰহণৰ অৰুচি৷ গাঁঠিৰ বিষ৷
৩) গাত ৰঙা ফোঁহা, ডায়েৰিয়া, খজুটি আদি হ’ব পাৰে৷
৪) দাঁতৰ আলু, মলদ্বাৰ, নাকেৰে তেজ ওলোৱা৷
৫) ডিঙিৰ বিষ, সেপ গিলোতে কষ্ট হোৱা৷
চিকিৎসকৰ মতে ডেঙ্গিৰ এটা মাৰাত্মক দিশ হৈছে মেক্ৰফেজ এক্টিভেছন ছিনড্ৰোম৷ ইয়াত যকৃতৰ উৎসেচক ক্ষৰণ মাৰাত্মক পৰিমাণে বাঢ়ি যায়৷ ইয়াৰোপৰি এলডিএইচ, ট্ৰাইগ্লিছাৰাইডৰ মাত্ৰাও বাঢ়ি যায়৷ একেদৰে তেজত ফেৰিটিনেৰ মাত্ৰাও বাঢ়ি যায়৷ ইয়াৰ ফলত শৰীৰত ছাইটোকইন তৈয়াৰ হয়৷ চিকিৎসকে কয় যে, এই ক্ষেত্ৰত ৰোগীক ষ্টেৰয়েড দিবলগীয়া হয়৷ সামগ্ৰিক ভাৱে এই পৰিস্থিতিত ৰোগীৰ অস্থিমজ্জাৰ সমস্যাই দেখা দিয়ে৷ প্লেটলেটৰ সংখ্যা যদি শৰীৰত ঠিকেই থাকে তেন্তে চিন্তাৰ কাৰণ নাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
