কেদাৰনাথ পথত ব্যাপক ভূমিস্খলনত ৫ জন নিহত, ৩ আহত; অধিক তীৰ্থযাত্ৰী আবদ্ধ হোৱাৰ আশংকা
কেদাৰনাথৰ সোণপ্ৰয়াগ আৰু গৌৰীকুণ্ডৰ মাজত হোৱা ব্যাপক ভূমিস্খলনত ৫জন লোকে প্ৰাণ হেৰুৱাইছে; তেওঁলোকৰ মৃতদেহ উদ্ধাৰ কৰা হৈছে। প্ৰথম অৱস্থাত এজন লোকৰ মৃত্যু হোৱা বুলি খবৰ পোৱা গৈছিল, পিছত মৃত্যুৰ সংখ্যা তিনিজনলৈ বৃদ্ধি পায়। এতিয়া এই সংখ্যা পাঁচজনলৈ বৃদ্ধি পাইছে।
কেদাৰনাথ যাত্ৰা পথত সোণপ্ৰয়াগ আৰু গৌৰিকুণ্ডৰ মাজত হোৱা প্ৰচণ্ড বৰষুণৰ ফলত ভূমিস্খলনত ৫জন লোকৰ মৃত্যু হয়। এই পাঁচোটা মৃতদেহ উদ্ধাৰ কৰি জিলা প্ৰশাসনক গতাই দিয়ে এছডিআৰএফে। ধ্বংসাৱশেষৰ তলত অধিক তীৰ্থযাত্ৰী আবদ্ধ হ’ব পাৰে বুলি মঙলবাৰে ৰুদ্ৰপ্ৰয়াগ আৰক্ষীয়ে প্ৰকাশ কৰে।
সোমবাৰে নিশাৰ ভাগত সংঘটিত হৈছিল এই ঘটনা। আজি মঙলবাৰে পুৱা উদ্ধাৰ অভিযান পুনৰ আৰম্ভ হোৱাৰ লগে লগে ধ্বংসাৱশেষৰ পৰা তিনিগৰাকী মহিলাসহ মুঠ ৫ তীৰ্থযাত্ৰীৰ মৃতদেহ উলিয়াই অনা হয়।
ৰুদ্ৰপ্ৰয়াগৰ জিলা দুৰ্যোগ ব্যৱস্থাপনা বিষয়া নন্দন সিং ৰাজৱাৰে এই দুৰ্ঘটনাটো সন্ধিয়া প্ৰায় ৭.২০ বজাত সংঘটিত হয় বুলি জানিবলৈ দিয়ে। এই তথ্য লাভ কৰাৰ লগে লগে ৰাজ্যিক দুৰ্যোগ সঁহাৰি বাহিনী আৰু ৰাষ্ট্ৰীয় দুৰ্যোগ সঁহাৰি বাহিনীৰ জোৱানসকলে উদ্ধাৰ অভিযান আৰম্ভ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
