কোন হ’ব ঝাৰখণ্ডৰ পৰৱৰ্তী মুখ্যমন্ত্ৰী, আজি প্ৰথম চৰণৰ ভোটগ্ৰহণ
ঝাৰখণ্ড বিধানসভা নিৰ্বাচন ২০২৪ৰ প্ৰথম পৰ্যায়ৰ ভোটগ্ৰহণ আজি। পুৱা ৭ বজাৰ পৰা আৰম্ভ হৈ সন্ধিয়া ৫ বজালৈকে চলিব ভোটদান। ৰাজ্যিক মুখ্য নিৰ্বাচনী বিষয়া কে. ৰবি কুমাৰে কয় যে আজি ৮১খন বিধানসভাৰ আসনৰ ভিতৰত ৪৩খন বিধানসভা আসনত ভোটগ্ৰহণ আৰম্ভ হৈছে।
মুঠ ২.৬০ কোটি ভোটাৰৰ ভিতৰত ১.৩৭ কোটি ভোটাৰে আজি ৬৮৩ জন প্ৰাৰ্থীৰ ভাগ্য নিৰ্ণয় কৰিব। অহা ২০ নৱেম্বৰত ৩৮খন আসনত দ্বিতীয় পৰ্যায়ৰ ভোটগ্ৰহণ অনুষ্ঠিত হ’ব। ২৩ নৱেম্বৰত মহাৰাষ্ট্ৰৰ সমান্তৰালকৈ ঝাৰখণ্ড বিধানসভা নিৰ্বাচনৰো ফলাফল ঘোষণা কৰা হ’ব।
প্ৰথম পৰ্যায়ৰ ভোটগ্ৰহণৰ বাবে ৯৫০টা ভোটগ্ৰহণ কেন্দ্ৰ নিৰ্মাণ কৰা হৈছে। ১৮ অক্টোবৰত প্ৰথম পৰ্যায়ৰ ভোটগ্ৰহণৰ বাবে অধিসূচনা জাৰি কৰা হৈছিল। মনোনয়নৰ অন্তিম তাৰিখ আছিল ২৫ অক্টোবৰ। প্ৰাৰ্থীত্ব প্ৰত্যাহাৰৰ অন্তিম তাৰিখ আছিল ৩০ অক্টোবৰ।
ঝাৰখণ্ডত চলিত বিধানসভাৰ কাৰ্যকাল ২০২৫ চনৰ ৫ জানুৱাৰীত শেষ হ’ব। আজি ২০১৯ চনৰ নিৰ্বাচনত প্ৰথম পৰ্যায়ৰ ৪৩খন আসনৰ ভিতৰত বিজেপিয়ে মাত্ৰ ১৩খন আসনহে লাভ কৰিছিল। গ্ৰেণ্ড এলায়েন্সে ২৫খন আসন লাভ কৰিছিল।
প্ৰথম পৰ্যায়ৰ ভোটগ্ৰহণত চম্পাই সোৰেণ, বন্না গুপ্তা, সৰ্যু ৰায়, চম্পাই সোৰেণৰ পুত্ৰ বাবুলাল সোৰেন, ৰামদাস সোৰেন, পূৰ্ণিমা দাস, ডাঃ অজয় কুমাৰ, মংগল কালিন্দিৰ দৰে হাই প্ৰফাইল প্ৰাৰ্থীৰ আজি ভাগ্য নিৰ্ণয় কৰিব ভোটাৰে।
আনহাতে ৰাজ্যখনত ৬৮৩ জন প্ৰাৰ্থীৰ ভিতৰত আছে ৬০৯ জন পুৰুষ, ৭৩ জন মহিলা আৰু এজন তৃতীয় লিংগৰ লোক। প্ৰথম পৰ্যায়ত ভোটগ্ৰহণ হ’বলগীয়া ৪৩খন আসনৰ ভিতৰত ২০খন আসন অনুসূচিত জনজাতিৰ বাবে আৰু ৬খন আসন অনুসূচিত জাতিৰ বাবে সংৰক্ষিত।
প্ৰথম পৰ্যায়ত আজি ১৩ নৱেম্বৰত কোদৰমা, বৰকথা, বৰহী, বৰকাগাঁও, হাজৰিবাগ, ছিমৰিয়া, চতৰা, বাহাৰাগোৰা, ঘাটশিলা, পোটকা, জগছলাই, জমছেদপুৰ পূৱ, জামছেদপুৰ পশ্চিম, ইচাগড়, চেৰাইকেলা, চৈবাছা, মাজগাঁও, জগন্নাথপুৰ, মনোহৰপুৰ, চক্ৰধৰপুৰ , খাৰছানৱা। ৰাঁচী, হাতিয়া, কাংকে, মন্দাৰ, ছিছাই, গুমলা, বিষুণপুৰ, ছিমডেগা, কোলেবিৰা, লোহৰদগা, মণিকা, লাতেহাৰ, পাংকি, দলটেনগঞ্জ, বিষ্ৰমপুৰ, ছাটাৰপুৰ, হুছেইনবাদ, গড়োৱা, ভৱনাথপুৰ বিধানসভাৰ আসনত ভোটগ্ৰহণ অনুষ্ঠিত হ’ব।
প্ৰথম পৰ্যায়ত মুঠ ৪৩খন আসনৰ ভিতৰত জেএমএমই ২৩খন আসনত আৰু কংগ্ৰেছে ১৭খন আসনত প্ৰাৰ্থী প্ৰক্ষেপ কৰিছে। আনহাতে ৰাষ্ট্ৰীয় জনতা দলে মুঠ পাঁচখন আসনত প্ৰাৰ্থী প্ৰক্ষেপ কৰিছে, ইয়াৰে দুখন গ্ৰেণ্ড এলায়েন্সৰ প্ৰাৰ্থীৰ বিৰোধী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
