পুনৰ আহিল AFSPA, এইবাৰ সম্পূৰ্ণ ৰাজ্যত নহয়, ৬খন থানা এলেকাত এই বিশেষ আইন
পুনৰ আহিল সশস্ত্ৰ বাহিনী বিশেষ ক্ষমতা আইন। এইবাৰ অৱশ্যে সম্পূৰ্ণ ৰাজ্যখনত নহয়, উত্তৰ-পূৱৰ ৰাজ্য মণিপুৰৰ ছটা থানা এলেকাত পুনৰ সশস্ত্ৰ বাহিনী (বিশেষ ক্ষমতা) আইন (AFSPA) জাৰি কৰিছে কেন্দ্ৰীয় চৰকাৰে।
এই আইনৰ অধীনত কোনো এলেকাক ‘অশান্ত’ বুলি ঘোষণা কৰি সেই এলেকাত এই বিশেষ আইন জাৰি কৰে। বিশেষকৈ উগ্ৰবাদীৰ উপদ্ৰব বৃদ্ধি পালে সেই উপদ্ৰৱ নিয়ন্ত্ৰণৰ বাবে এই সশস্ত্ৰ বাহিনী বিশেষ ক্ষমতা আইন জাৰি কৰে।
কেন্দ্ৰীয় গৃহ মন্ত্ৰালয়ৰ এক অধিসূচনাত কোৱা হৈছে যে মণিপুৰত চলি থকা জাতিগত হিংসা আৰু অস্থিৰ পৰিস্থিতিৰ প্ৰতি লক্ষ্য ৰাখি এই সিদ্ধান্ত লোৱা হৈছে। যাতে সকলো সোনকালে নিয়ন্ত্ৰণ কৰিব পৰা যায়।
আফছপা পুনৰ জাৰি কৰা অঞ্চলসমূহৰ ভিতৰত ইম্ফল পশ্চিম জিলাৰ ছেকমাই আৰু লামছাং; ইম্ফল পূৱ জিলাৰ লামছাই, জিৰিবাম জিলাৰ জিৰিবাম, কাংপকপি জিলাৰ লেইমাখং, বিষ্ণুপুৰ জিলাৰ মইৰাং অঞ্চল অন্তৰ্ভুক্ত।
মণিপুৰ চৰকাৰে ১ অক্টোবৰত ৰাজ্যৰ বেছিভাগ ঠাইতে আফছপা কাৰ্যকৰী কৰিছিল। কিন্তু সেই সময়ত ১৯টা থানা এলেকা ইয়াৰ বাহিৰত ৰখা হৈছিল, য’ত এই ছটা থানা এলেকাও আছিল। ইয়াৰ পাছতে গৃহ মন্ত্ৰালয়ে এই ছটা থানা এলেকাকো নতুন অধিসূচনাত অন্তৰ্ভুক্ত কৰে।
বৰ্তমানে আফছপাৰ বাহিৰত ৰখা ১৯টা থানা অঞ্চলৰ ভিতৰত ইম্ফল, লামফল, চিটি, সিঞ্জামেই, ছেকমাই, লামছাং, পাটছ’ই, ৱাংগোই, পোৰোমপাট, হাইংগাং, লামলাই, ইৰিলবুং, লেইমাখং, থৌবাল, বিষ্ণুপুৰ, নামবোল, মৈৰাং, কাকচিং আৰু জিৰিবাম আদি অঞ্চল আছে।
উল্লেখ্য যে, বৰ্তমানে মণিপুৰত জাতিগত হিংসা আৰম্ভ হোৱাৰ পৰাই পৰিস্থিতি ভয়াৱহ হৈ আছে। বিগত সোমবাৰে নিৰাপত্তাৰক্ষীৰ সৈতে হোৱা এনকাউণ্টাৰত ১১ জন সন্দেহযুক্ত উগ্ৰপন্থী নিহত হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
