অতিকে শোকাৱহ, নাও ডুবি প্ৰাণ হেৰুৱালে ২৫ গৰাকীকৈ লোকে, সন্ধানহীন বহুতো
মঙলবাৰে মধ্য কংগোৰ ফিমি নদীত লোকৰে ভৰা এখন নাও ডুবি অতিকে শোকাৱহ দুৰ্ঘটনা সংঘটিত হয়। দুৰ্ঘটনাত শিশুসহ ২৫জনকৈ লোকৰ মৃত্যু হোৱাৰ লগতে বহুতো লোক সন্ধানহীন হৈ পৰে। কংগোৰ ৰাজধানী কিনছাছাৰ উত্তৰ-পূবত অৱস্থিত ইনোংগো চহৰৰ সমীপত এই ঘটনা সংঘটিত হয়।
বিষয়া তথা স্থানীয় বাসিন্দাৰ মতে, দুৰ্ঘটনাৰ সময়ত নাওখনত ১০০ জনতকৈ অধিক লোকে যাত্ৰা কৰি আছিল। দুৰ্ঘটনাৰ পিছত বৰ্তমানেও অব্যাহত আছে নিৰুদ্দেশ হোৱা লোকৰ সন্ধান। মৃতকৰ সংখ্যা আৰু অধিক বৃদ্ধি পাব বুলি আশংকা ব্যক্ত কৰিছে বিষয়াসকলে।
নাওখনত অত্যধিক লোক থকাৰ বাবেই নাওখনত অতিৰিক্ত বোজা পৰিছিল। এই পৰ্যন্ত ২৫ জন লোকৰ মৃতদেহ উদ্ধাৰ কৰা হৈছে। জানিব পৰা মতে কেৱল শতাধিক লোকেই নহয়, নাওখনত বহুতো সামগ্ৰীয়ো ভৰ্তি কৰি লৈছিল যাৰ ফলতেই নাওখন ডুব যায়।
উল্লেখ্য যে, কংগোত এইটো বছৰৰ চতুৰ্থটো শোকাৱহ নাও দুৰ্ঘটনা । এই অঞ্চলটো নদীৰে আগুৰি আছে আৰু ইয়াৰ মানুহবোৰ মুখ্যত নদী পৰিবহণৰ ওপৰত নিৰ্ভৰশীল।
কংগো চৰকাৰে সঘনাই অতিৰিক্ত বোজা সন্দৰ্ভত সতৰ্কতা কৰি আহিছে কিন্তু তথাপি কানসাৰ নাই নাও ব্যৱসায়ী সকলৰ। যাৰ ফলতে পুনৰ এইটো দুৰ্ঘটনা সংঘটিত হয়।
এতিয়া জল পৰিবহণৰ সুৰক্ষা ব্যৱস্থা উলংঘা কৰাসকলক শাস্তি দিয়াৰ প্ৰতিশ্ৰুতি দিছে প্ৰশাসনৰ ফালৰ পৰা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
