দেশৰ জনগণক স্বাস্তি দিবলৈ ডাঙৰ ঘোষণা কৰিলে ৰিজাৰ্ভ বেংক অৱ ইণ্ডিয়াই৷ দীৰ্ঘ পাঁচ বছৰৰ পাছত ৰেপো ৰেট কমালে দেশৰ শীৰ্ষ বেংকে৷ আৰ বি আইৰ গভৰ্নৰ সঞ্জয় মলহোত্ৰাই শুকুৰবাৰে মুদ্ৰানীতি কমিটিৰ বৈঠকৰ পাছত জনাই যে ২৫ বেছিচ পয়েণ্ট কমোৱা হৈছে ৰেপো ৰেট৷ নতুন ৰেপো ৰেট হ’ব ৬.২৫শতাংশ৷ এই ঘোষণাৰ পাছতেই ঋণত সুদৰ হাৰ কমাব লাগিব বাণিজ্যিক বেংকসমূহেও৷ ইয়াৰ ফলত বাহন, ঘৰৰ ঋণ কিছুপৰিমাণে সস্তা হ’ব জনতাৰ বাবে৷
বিগত বুধবাৰে বৈঠকত বহিছিল দেশৰ শীৰ্ষ বেংকৰ কেন্দ্ৰীয় মুদ্ৰানীতি কমিটি৷ আৰ বি আইৰ নতুন গভৰ্নৰ সঞ্জয় মলহোত্ৰাৰ এয়া প্ৰথম এম পি চি বৈঠক৷ আৰ বি আইৰ সুদৰ হাৰক ৰেপো ৰেট বুলি কোৱা হয়৷ দেশৰ চৰকাৰী আৰু বেচৰকাৰী বেংকসমূহক ৰিজাৰ্ভ বেংকে যি সুদৰ হাৰত ঋণ দিয়ে তাকেই ৰেপো ৰেট বুলি কোৱা হয়৷ আৰ্থিক বিশ্লেষকে ধাৰণা কৰিছিল যে ৰেপো ৰেট ২৫ বেচিছ পয়েণ্ট কমাব পাৰে কেন্দ্ৰীয় বেংকে৷ কাৰণ বিগত ১ ফেব্ৰুৱাৰী শনিবাৰে সংসদত উত্থাপন কৰা বাজেটত কেন্দ্ৰীয় বিত্তমন্ত্ৰীয়ে বাৰ্ষিক ১২ লাখ টকা পৰ্যন্ত আয়ত এক টকাও কৰ দিব নালাগে বুলি ঘোষণা কৰিছিল৷
সেই ঘোষণাতেই স্বাস্তি পাইছিল মধ্যবিত্তৰ মানুহে৷ সকলোৱে তাৰপিছত অপেক্ষা কৰিছিল আৰ বি আইয়ে সুদ কমাবনে নাই! শুকুৰবাৰে সুদৰ হাৰ কমোৱাৰ কথা আনুষ্ঠানিক ঘোষণা কৰিছে এম পি চিয়ে৷ এই ঘোষণাৰ পূৰ্বে ৰেপো ৰেট আছিল ৬.৫শতাংশ৷ ২০২৩ চনৰ ফেব্ৰুৱাৰী মাহৰ পৰা সেয়া অপৰিবৰ্তিত আছিল৷ ২০২০ চনৰ মে মাহত কভিড মহামাৰীৰ সময়ত শেষবাৰৰ বাবে ৰেপো ৰেট কমোৱা হৈছিল৷ প্ৰায় ১১ বাৰকৈ ৰেপো ৰেট অপৰিবৰ্তিত ৰাখিছিল ৰিজাৰ্ভ বেংকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
