কেৱল ৰাজাই নহয়, হত্যাৰ পৰিকল্পনা আছিল অইন এগৰাকী নাৰীকো! মুখামুখি জেৰাত আৰক্ষীৰ সন্মুখত কি কি কৈছে ৰাজে? আৰক্ষীয়ে দিছে কেইবাটাও তথ্য

আৰক্ষীৰ এই দাবী সোনমৰ চৰ্চিত প্ৰেমিক ৰাজ কুশৱাহাৰ ষড়যন্ত্ৰৰ জাল বহু গভীৰ আছিল৷ ৰাজে অইন এগৰাকী মহিলাক হত্যাৰ ষড়যন্ত্ৰ কৰিছিল, যাতে সেই মহিলাৰ মৃতদেহক সোনমৰ বুলি ক’ব পাৰে৷ ইয়াৰপাছতেই হয়তো কেইদিনমান লুকাই থকাৰ পাছত আকৌ আৰামদায়ক জীৱন জীয়াই থাকিলেহেতেন সোনমে৷ অৱশ্যে কিছু কাৰণবশত সেই পৰিকল্পনা সফল নহ’ল৷

আৰক্ষীয়ে জনাইছে যে ৰাজা ৰঘুবংশী হত্যাৰ ঘটনাৰ মূল ষড়যন্ত্ৰকাৰী আছিল ৰাজ কুশৱাহা৷ আৰু এই ভয়ংকৰ ষড়যন্ত্ৰত তেওঁ কাষত আছিল ৰাজাৰ পত্নী সোনম ৰঘুবংশী নিজেই৷ বৰ্তমান সোনম, ৰাজ কুশৱাহা আৰু তেওঁলোকৰ তিনি ছুপাৰী কিলাৰ এতিয়া আৰক্ষীৰ জিম্মাত আছে৷ বুধবাৰে অভিযুক্তসকলক ৮দিনৰ আৰক্ষী জিম্মাৰ নিৰ্দেশ দিছে আদালতে৷ এই সময়ত জেৰা চলাই থকা হৈছে আটাইকেইটা হত্যাকাৰীকেই৷

মেঘালয় আৰক্ষীয়ে তথ্যৰ অন্তত জনাইছে, ৰাজ কুশৱাহাৰ প্লেন অন্য আছিল৷ অইন এগৰাকী মহিলাক হত্যা কৰাৰ পাছত সেই দেহ সোনমৰ সজাই পুৰি দিয়া হ’ব যাতে কোনোৱে চিনাক্ত কৰিব নোৱাৰে৷ আৰু সেই মৃতদেহকেই সকলোৰে সন্মুখত সোনমৰ বুলি দেখুওৱা হব৷ তেতিয়া আৰক্ষীৰ তদন্তও অন্যফালে ঘূৰিব৷

কেইদিনমান নিজকে বোৰ্খাৰ আঁৰত ৰাখি পাছলৈ কেছ ঠাণ্ডা হ’লে দুয়োৱে আৰামেৰে জীৱন কটাব৷ কিন্তু অভিযুক্তৰ প্লেন সফল নহল৷ সোধপোছৰ প্রথম দিনাই সোনম, ৰাজ আৰু তিনি অভিযুক্তই জনাইছে যে বোৰ্খা পিন্ধিয়েই মেঘালয়ৰ পৰা পলাইছিল সোনমে৷ ইয়াৰপাছতেই ট্ৰেইন, টেক্সি, বাছ সলাই সলাই মধ্যপ্ৰদেশত উপস্থিত হয়৷

সোনম আৰু ৰাজাৰ আৰু এটা প্লেনো আছিল৷ সেই প্লেনমতে সকলোকে দেখুৱাব খুজিছিল যে পাহাৰীয়া নদীত সোনমৰ দেহ উটি গৈছে৷ কিন্তু সেয়াও সফল নহল৷ ১৯ মেত সোনম আৰু ৰাজা অসম পোৱাৰ পূৰ্বেই সেই স্থানলৈ গৈছিল ৰাজ আৰু তিনি ভাৰাতীয়া হত্যাকাৰী৷ প্ৰথমে গুৱাহাটীতেই ৰাজাক মাৰি পেলোৱাৰ পৰিকল্পনা কৰিছিল আটাইয়ে৷ কিন্তু সফল নহল৷ সোনমৰ কথামতেই ৰাজা মেঘালয়ৰ ছহৰালৈ গৈছিল৷ আৰু তাতেই অসমৰ পৰা ক্ৰয় কৰা গছ কটা অস্ত্ৰৰে ৰাজাক হত্যা কৰা হয়৷

২৩ মেৰ দুপৰীয়া ২ বজাৰ পৰা ২ বাজি ১৮ মিনিটৰ ভিতৰত সোনমৰ সন্মুখতেই হত্যা কৰা হল ৰাজাক আৰু তেওঁৰ দেহ এটা খাদত পেলাই দিয়া হল৷ ইয়াৰপাছতেই আকাশ নামৰ হত্যাকাৰীক সোনমে নিজৰ ৰেইনকোটটো দিয়ে৷ কাৰণ আকাশৰ কাপোৰত তেজৰ দাগ লাগিছিল৷ ৰেইনকোটতো তেজৰ দাগ থকাৰ বাবে আকাশে সেই ৰেইনকোট পেলাই দিয়ে৷ আৰু স্কুটিত উঠি জলপ্ৰপাতৰ কাষৰ পৰা আঁতৰি আহে৷ তাতেই পেলাই থৈ আহে ৰাজা আৰু সোনমে ভাড়া কৰা স্কুটি৷ ইফালে সোনমক বিচাৰি ফুৰাৰ সময়তে আৰক্ষীয়ে বিচাৰি পায় ৰেইনকোট আৰু স্কুটিখন৷