ছৌদি আৰৱ, কুৱেট, সংযুক্ত আৰৱ আমিৰশাহি, কাটাৰৰ দৰে পশ্চিম এছিয়াৰ দেশসমূহত লেথাৰিকৈ আক্ৰমণ চলাইছে ইৰানে৷ ওলোটাই আক্ৰমণ কৰিছে ইজৰায়েল আৰু আমেৰিকাইয়ো৷ এই পৰিস্থিতিত ব্যাপক প্ৰভাৱ পৰিছে অসামৰিক বিমান পৰিবহণ পৰিসেৱাত৷ পৰিসেৱা সংকটত বহু ভাৰতীয় বিভিন্ন দেশত আৱদ্ধ হৈ পৰিছে৷ আৰু বহু বিদেশী আৱদ্ধ হৈ পৰিছে ভাৰতত৷ এইবাৰ তেওঁলোকৰ বাবে সুখবৰ শুনাইছে ইণ্ডিগো, এয়াৰ ইণ্ডিয়াই৷ বুধবাৰৰ পৰা ডুবাই, আবুধাবি, শাৰজাহসহ পশ্চিম এছিয়াৰ বিভিন্ন স্থানৰ পৰা বিশেষ বিমান চলোৱাৰ ঘোষণা কৰা হৈছে৷
কোন বিমান সংস্থাই কিমান বিমান চলাইছে সেই তালিকাও প্ৰকাশ কৰা হৈছে৷ পৰিকল্পনা অনুসৰি পশ্চিম এছিয়াৰ বিভিন্ন দেশত ৫৮খন বিমান চলাব এয়াৰ ইণ্ডিয়াই৷ আৰু পশ্চিম এছিয়াৰ ৮টা গন্তব্যলৈ বিমান চলাব ইণ্ডিগোই৷ ভাৰতৰ অসামৰিক বিমান পৰিবহন মন্ত্ৰণালয়ৰ তৰফৰ পৰা জনোৱা হৈছে যে নিৰাপদে যাত্ৰীসকলক এক স্থানৰ পৰা অন্য স্থানলৈ স্থানান্তৰৰ দায়িত্ব ভাৰতৰ বিমান সংস্থাসমূহে লৈছে৷
এয়াৰ ইণ্ডিয়াই জনাইছে যে বিমান পৰিচালনা বহু বিষয়ৰ ওপৰত নিৰ্ভৰ কৰে৷ বিশেষ বিমানসমূহে ভাৰত আৰু অন্য দেশৰ সংশ্লিষ্ট কৰ্তৃপক্ষৰ অনুমোদন মৰ্মেই চলোৱা হৈছে৷ এয়াৰ ইণ্ডিয়াই জনাইছে যে দিল্লী আৰু মুম্বাইৰ পৰা জেড্ডা পৰ্যন্ত এক ৰাউণ্ড ট্ৰিপ পৰিচালনা কৰা হব৷ ইয়াৰোপৰি মাস্কাটত এয়াৰ ইণ্ডিয়াৰ নিৰ্ধাৰিত বিমান পৰিচালনাৰ পৰিকল্পনা কৰা হৈছে৷ ইণ্ডিগোই জনাইছে যে বুধবাৰে তেওঁলোকে ইউৰোপৰ নিৰ্বাচিত ৰুটসমূহৰ সৈতে পশ্চিম এছিয়াৰ ৮ স্থানলৈ বিমান পৰিচালনা কৰিব৷
২৮ ফেব্ৰুৱাৰীৰ পৰা ইৰানৰ সৈতে সামৰিক সংঘাত আৰম্ভ হৈছে আমেৰিকা আৰু ইজৰায়েলৰ৷ এতিয়াও সংঘাত শেষ হোৱাৰ কোনো লক্ষণ দেখা যোৱা নাই৷ বৰং দুই তৰফৰ পৰাই আক্ৰমণ চলাইচে৷ ইজৰায়েলৰ ওপৰিও উপসাগৰীয় অঞ্চলত আমেৰিকাৰ ঘনিষ্ঠ দেশসমূহত আক্ৰমণ চলাইছে ইৰানে৷ সামৰিক সংঘাতৰ বাবে বিমান পৰিসেৱা বিপুলভাৱে ক্ষতিগ্ৰস্থ হৈছে বুলি উপসাগৰীয় অঞ্চলত বিভিন্ন সংবাদমাধ্যমত দাবী কৰা হৈছে৷ প্ৰসংগত পশ্চিম এছিয়াৰ এক বিশাল অংশজুৰি আকাশসীমা বন্ধ৷ তাৰ মাজত বিশেষ বিমান চলোৱাৰ সিদ্ধান্ত লৈছে ভাৰতীয় দুই বিমান সংস্থাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
