হিন্দু ধৰ্মত প্ৰায় সমগ্ৰ বছৰজুৰি নানান উৎসৱ চলিয়েই থাকে৷ যাৰ ভিতৰত এক গুৰুত্বপূৰ্ণ উৎসৱ হৈছে অক্ষয় তৃতীয়া৷ ব’হাগ মাহৰ শুক্লপক্ষৰ তৃতীয়া তিথিত অক্ষয় তৃতীয়াৰ উৎসৱ পালিত হয়৷ বিশ্বাস অনুসৰি যিকোনো কাম সম্পন্ন কৰাৰ বাবে এইদিনটো অত্যন্ত শুভ বুলি ধাৰণা কৰা হয়৷ লক্ষ্মী-নাৰায়ণৰ আৰাধনা আৰু নতুন সামগ্ৰী ক্ৰয় কৰাৰ বাবেও এই দিনটো শুভ বুলি ধাৰণা কৰা হয়৷ কথিত আছে যে এই শুভ তিথিত ক্ৰয় কৰা সামগ্ৰীৰ ফল চিৰস্থায়ী হয়৷ বিশেষকৈ এই দিনটোত সোণ ক্ৰয় কৰা খুবেই শুভ৷
অক্ষয় তৃতীয়া ২০২৬ কেতিয়া?
আগন্তুক ১৯ এপ্ৰিল অসমীয়াৰ ৫ ব’হাগত অক্ষয় তৃতীয়াৰ শুভ তিথি পৰিছে৷
অক্ষয় তৃতীয়াৰ তিথি কিমান ক্ষণ থাকিব?
১৯ এপ্ৰিলৰ দিনৰ ১ বাজি ১৩ মিনিট ১৮ ছেকেণ্ডৰ পৰা ২০ এপ্ৰিলৰ পুৱা ৫ বাজি ৫১ মিনিট ৫৮ ছেকেণ্ড পৰ্যন্ত তৃতীয়া থাকিব৷
সোণ ক্ৰয়ৰ শুভ সময়
১৯ এপ্ৰিলৰ পুৱা ১০.৪৯ৰ পৰা ২০ এপ্ৰিলৰ পুৱা ৫ বাজি ৫১ মিনিট পৰ্যন্ত আৰু ২০ এপ্ৰিলৰ পুৱা ৫ বাজি ৫১ মিনিটৰ পৰা ৭ বাজি ২৭ মিনিটলৈ থাকিব সোণ ক্ৰয়ৰ শুভ সময়৷
অক্ষয় তৃতীয়াৰ ৰীতিনীতি
সংস্কৃত অনুসৰি অক্ষয় শব্দৰ অৰ্থ হৈছে যাৰ কোনো ক্ষয় নাই৷ অৰ্থাৎ যি কেতিয়াও শেষ নহয়৷ সেয়ে ধাৰণা কৰা হয় অক্ষয় তৃতীয়াত কৰা যিকোনো কাম অক্ষয় থাকে৷ ইয়াৰ সৈতে শাস্ত্ৰমতে অক্ষয় তৃতীয়া সুখ প্ৰদানকাৰী আৰু পাপ নাশকাৰী তিথি৷ অক্ষয় তৃতীয়াৰ দিনা ব্যৱসায়ীয়ে লক্ষ্মী-গণেশ পুজাৰ আয়োজনো কৰে৷ বহুতে কেৱল ব্যৱসায়িক প্ৰতিষ্ঠানতেই নহয়, ঘৰতো পূজাৰ আয়োজন কৰে৷ ইয়াৰোপৰি বিভিন্ন মন্দিৰত ভক্তই ভিৰ কৰে৷ বিশ্বাস কৰা হয় যে এই দিনটোত সোণ ক্ৰয় কৰিলে পৰিয়াললৈ সুখ সমৃদ্ধি আহে৷
অক্ষয় তৃতীয়াত এনে কাম কৰক যাৰ বাবে আপোনাৰ পূণ্য লাভ হয়৷ এই দিনটোত ঈশ্বৰৰ উপাসনা, উপাসনা আৰু ধ্যান কৰক৷ নিজৰ আচৰণত মিঠা ভাৱ ৰাখক৷ সম্ভৱ হ’লে কাৰোবাক সহায় কৰক৷ যিয়ে আপোনাৰ দুৱাৰলৈ খালি হাতে আহে তেওঁলোকক পাৰ্যমানে দান কৰক৷ অক্ষয় তৃতীয়াত সোণ বা মূল্যবান সামগ্ৰী কিনা শুভ বুলি ধাৰণা কৰা হয়৷
অক্ষয় তৃতীয়াৰ গুৰুত্ব কি?
এই পূজাৰ সৈতে জড়িত হৈ আছে পুৰাণৰ কথা৷ শুনা যায় মহাভাৰতত কৌৰৱৰ হাতত পাশা খেলত হাৰি ১২ বছৰৰ বাবে বনবাস আৰু এবছৰৰ বাবে অজ্ঞাতবাসলৈ যাবলৈ বাধ্য হৈছিল পাণ্ডৱসকল৷ তেওঁলোক বনবাসত থকাৰ সময়ত আকৌ কৌৰৱসকলৰ চক্ৰান্তত মুনি দুৰ্বাসাই তেওঁৰ শিষ্যসকলক লৈ এনিশা পাণ্ডৱসকলৰ ঘৰত আশ্ৰয় গ্ৰহণ কৰিবলৈ যায়৷ কিন্তু সেই সময়ত পাণ্ডৱসকল খুবেই অভাৱী আছিল৷ ঘৰত নাছিল এমুঠিও অন্ন৷ ক্ষুধাৰ্ত মুনি দুৰ্বাসাই অভিশাপ দিব ভাৱি ভয় খাই আছিল পাণ্ডৱ আৰু দ্ৰৌপদীয়ে৷ ঠিক সেই সময়তে শ্ৰীকৃষ্ণই আহি ভাতৰ চৰুৰ তলত লাগি থকা একমাত্ৰ ভাতৰ দানাও খায় পেলায়৷ আৰু অবাক কৰা বিষয় যে তাতেই পেট ভৰি যায় দুৰ্বাসা আৰু তেওঁৰ শিষ্যসকলৰ৷ দুৰ্বাসাৰ অভিশাপৰ পৰা এই অক্ষয় তৃতীয়াৰ দিনাই পাণ্ডৱসকল ৰক্ষা পৰিছিল৷ সেয়ে এই দিনটোক শুভ বুলি ধাৰণা কৰা হয়৷
আৰু অন্য এক চলিত পৌৰাণিক কথা অনুসৰি বিষ্ণুৰ নৱম অৱতাৰ কৃষ্ণই দ্বাপৰ যুগত জন্মগ্ৰহণ কৰে মৰ্ত্যত৷ তেওঁৰ সুদামা নামৰ এজন দৰিদ্ৰ ব্ৰাহ্মণ বন্ধু আছিল৷ সুদামাই এদিন ভুলবশত কৃষ্ণৰ সকলো খাদ্য খাই পেলায়৷ ইয়াৰপাছতেই তেওঁ শ্ৰীকৃষ্ণক খাদ্য দিবলৈ এমুঠি চাউল লৈ তেওঁৰ ঘৰলৈ আহে৷ তেওঁক খোৱাবৰ বাবে বন্ধু সুদামাই লৈ অনা চাউলমুঠি দেখি মুগ্ধ হয় শ্ৰীকৃষ্ণ৷ ইয়াৰপাছতেই শ্ৰীকৃষ্ণৰ আশীৰ্বাদত সুদামাৰ সমস্ত দাৰিদ্ৰতা দূৰ হয়৷ ধাৰণা কৰা হয় এই দিনটো আছিল অক্ষয় তৃতীয়া৷ ব’হাগৰ শুক্লপক্ষৰ তৃতীয়া তিথি৷ সেয়ে এই দিনটো শুভ৷ ইয়াৰোপৰি শুনা যায় অক্ষয় তৃতীয়াৰ দিনাই পৰশুৰামেও জন্মগ্ৰহণ কৰিছিল সেইবাবেও এই দিনটো শুভ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
