অসম লাইভ ২৪ঃ ঘৃণাৰ ৰাজনীতিৰ কেন্দ্ৰলৈ পৰিণত হৈছে উত্তৰ প্ৰদেশ। মুখ্যমন্ত্ৰী যোগী আদিত্যনাথলৈ ১০৪ প্ৰাক্তন IAS বিষয়াই পত্ৰ লিখি অভিযোগ কৰিছে যে বিবাদমান ধর্মান্তৰণ বিৰোধী অধ্যাদেশে ৰাজ্যখনক ঘৃণা, বিভাজন আৰু কট্টৰতাৰ কেন্দ্ৰলৈ পৰিণত কৰিছে। মুখ্যমন্ত্ৰী যোগীলৈ পত্ৰ লিখোতাসকলৰ ভিতৰত আছে প্ৰাক্তন ৰাষ্ট্ৰীয় সুৰক্ষা উপদেষ্টা শিৱশংকৰ মেনন, প্ৰাক্তন বিদেশ সচিব নিৰুপমা ৰাওঁ, প্ৰধানমন্ত্ৰীৰ প্ৰাক্তন উপদেষ্টা টিকেএ নায়াৰ। পত্ৰৰ মাধ্যমেৰে তেওঁলোকে অবৈধ ধর্মান্তৰণ বিৰোধী অধ্যাদেশখন প্ৰত্যাহাৰৰ আৱেদন জনাইছে। হস্তাক্ষৰকাৰীসকলে পত্ৰত এইটোও উল্লেখ কৰিছে যে মুখ্যমন্ত্ৰীৰ লগতে অন্য নেতাসকলে সংবিধান সম্পর্কে নিজকে পুনবাৰ শিক্ষিত কৰাৰ আৱশ্যকতা আছে, যিহেতু তেওঁলোকে সংবিধানক সমর্থন কৰাৰ শপত লৈছিল। বর্তমান উত্তৰ প্ৰদেশৰ চৰকাৰী প্ৰতিষ্ঠানসমূহ সাম্প্ৰদায়িকৰ বিহত ডুব গৈ আছে। পত্ৰত মুখ্যমন্ত্ৰীক উদ্দেশ্যি IAS বিষয়াসকলে লিখিছে— ‘উত্তৰ প্ৰদেশৰ যুৱ ভাৰতীয়ৰ বিৰুদ্ধে আপোনাৰ প্ৰশাসনে কৰা জঘণ্য অত্যাচাৰৰ এক শৃংখলা গঢ়ি উঠিছে; যিসকলে কেৱল এখন স্বাধীন ৰাষ্ট্ৰৰ স্বাধীন নাগৰিক হিচাপে জীৱন অতিবাহিত কৰিব বিচাৰে।’ উল্লেখ্য যে ইয়াৰ পূর্বেও ৪ গৰাকী প্ৰাক্তন ন্যায়াধীশে ধর্মান্তৰণ বিৰোধী অধ্যাদেশখনক সমালোচনা কৰি অংসাবিধানিক আখ্যা দিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
