অভিনেত্ৰী তথা উদ্যোগী প্ৰিয়ংকা চোপ্ৰা জোনাছৰ গ্ল’বেল হেয়াৰকেয়াৰ ব্ৰেণ্ড ‘Anomaly’ক ক্ৰয় কৰি ৰিলায়েন্স ৰিটেলে এক বৃহৎ আৰু উল্লেখযোগ্য পদক্ষেপ গ্ৰহণ কৰিছে। এই চুক্তিৰ জৰিয়তে ৰিলায়েন্সে নিজৰ সৌন্দৰ্য্য আৰু ব্যক্তিগত যত্নৰ ব্যৱসায় আৰু অধিক শক্তিশালী কৰাৰ প্ৰচেষ্টা ত্বৰান্বিত কৰিছে। বৃহস্পতিবাৰে কোম্পানীটোৱে ঘোষণা কৰে যে এই ক্ৰয়ত ‘Anomaly’ৰ ট্ৰেডমাৰ্ক, সকলো ব্ৰেণ্ড ৰাইট, আৰু ডিজিটেল প্লেটফৰ্ম অন্তৰ্ভুক্ত কৰা হৈছে। অৰ্থাৎ ৰিলায়েন্স ৰিটেইলৰ হাতত এতিয়া ব্ৰেণ্ডটোৰ সম্পূৰ্ণ মালিকীস্বত্ব থাকিব। অৱশ্যে এই চুক্তিৰ মূল্য সন্দৰ্ভত কোনো তথ্য প্ৰদান কৰা হোৱা নাই।
ৰিলায়েন্স ৰিটেলে কয় যে এতিয়া তেওঁলোকে নিজৰ বিস্তৃত খুচুৰা নেটৱৰ্ক আৰু অনলাইন প্লেটফৰ্মৰ জৰিয়তে Anomaly ক দ্ৰুতগতিত সম্প্ৰসাৰণ কৰিব। ইয়াৰ ভিতৰত কোম্পানীটোৰ বিউটি প্লেটফৰ্মো আছে, যাৰ জৰিয়তে গ্ৰাহকে অনলাইন আৰু অফলাইন দুয়োটাতে বজাৰ কৰিব পাৰে। ২০২১ চনত প্ৰিয়ংকা চোপ্ৰাই মুকলি কৰিছিল Anomaly ব্ৰেণ্ড। ব্ৰেণ্ডটোৱে বিশেষভাৱে ৰাসায়নিক মুক্ত আৰু চুলিৰ যত্নৰ সামগ্ৰী তৈয়াৰ কৰে, যাৰ মূল্য সাধাৰণ জনতাৰ হাতৰ মুঠিত। মুকলিৰ পিছৰে পৰা এই ব্ৰেণ্ডটোৱে কেইবাখনো দেশত স্বীকৃতি লাভ কৰিছে।
এই কথা কয় পৰিচালক ঈশা আম্বানীয়ে
ৰিলায়েন্সৰ সঞ্চালক ঈশা আম্বানীয়ে কয় যে, তেওঁলোকৰ পৰ্টফলিঅ’ত Anomaly ক যোগ কৰাটো কোম্পানীটোৰ বাবে এক কৌশলগত সিদ্ধান্ত। তেওঁ বুজাই দিলে যে উচ্চমানৰ, সুলভ মূল্য, আৰু বিশ্বব্যাপী স্বীকৃতিৰ বাবে ব্ৰেণ্ডটো গ্ৰাহকৰ মাজত জনপ্ৰিয় পছন্দ হোৱাৰ সম্ভাৱনা আছে। প্ৰিয়ংকা চোপ্ৰাৰ সৈতে সহযোগিতাই ভাৰতত ব্ৰেণ্ডটো দ্ৰুতগতিত সম্প্ৰসাৰণ কৰিব বুলিও তেওঁ উল্লেখ কৰে। কোম্পানীটোৱে নিজৰ তথ্য আৰু গ্ৰাহকৰ অন্তৰ্দৃষ্টি ব্যৱহাৰ কৰি নিজৰ উপস্থিতি আৰু অধিক বৃদ্ধি কৰিব আৰু আন্তঃৰাষ্ট্ৰীয় বজাৰত নিজৰ উপস্থিতি শক্তিশালী কৰিব।
ভাৰতীয় বজাৰত গুৰুত্ব থাকিব
ৰিলায়েন্স ৰিটেলে স্পষ্ট কৰি দিয়ে যে ভাৰত এতিয়া Anomaly ৰ সৰ্ববৃহৎ ফোকাচ মাৰ্কেট হ’ব। ভাৰতীয় গ্ৰাহকৰ চুলি আৰু মূৰৰ ছালৰ প্ৰয়োজন অনুসৰি নতুন সামগ্ৰীও প্ৰস্তুত কৰিব কোম্পানীটোৱে। ইয়াৰ উপৰিও উত্তৰ আমেৰিকা, যুক্তৰাজ্য, আৰু মধ্যপ্ৰাচ্যৰ দৰে বজাৰলৈও এই ব্ৰেণ্ডৰ সম্প্ৰসাৰণ ঘটিব। প্ৰিয়ংকা চোপ্ৰাই ব্ৰেণ্ডৰ সৈতে জড়িত হৈ থাকিব আৰু ক্ৰিয়েটিভ ডাইৰেক্টৰ হিচাপে কাম কৰিব। প্ৰডাক্ট ডিজাইন, নতুন আইডিয়া, ব্ৰেণ্ড ডাইৰেকচনত তেওঁ মূল ভূমিকা পালন কৰিব।
প্ৰিয়ংকাই কয় যে এয়া Anomalyৰ বাবে এটা ডাঙৰ টাৰ্নিং পইণ্ট। ব্যক্তিগত ধাৰণা হিচাপে আৰম্ভ হোৱা এই ব্ৰেণ্ডটো এতিয়া বিশ্বব্যাপী পৰিচয়ত পৰিণত হৈছে বুলি তেওঁ বুজাই দিয়ে। ৰিলায়েন্সৰ সৈতে অংশীদাৰিত্বৰ ফলত ব্ৰেণ্ডটোৱে আৰু অধিক লোকৰ কাষ চাপিব পাৰিব। এই চুক্তিয়ে ৰিলায়েন্স ৰিটেইলৰ সৌন্দৰ্য আৰু ফেশ্বন খণ্ডত দ্ৰুত বিনিয়োগক প্ৰদৰ্শন কৰিছে। নতুন আৰু ডিজিটেল ব্ৰেণ্ড সংযোজন কৰি কোম্পানীটোৱে নিজৰ ব্যৱসায় অহৰহ শক্তিশালী কৰি তুলিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
