ইৰাণ-আমেৰিকা সংঘাত৷ ইন্ধনৰ দামো ঊৰ্ধ্বমুখী৷ তেনে অৱস্থাত দেশৰ অৰ্থনীতিৰ স্বাৰ্থত এবছৰৰ বাবে সোণ নিকিনিবলৈ আবেদন জনাইছে প্ৰধানমন্ত্ৰী নৰেন্দ্ৰ মোদীয়ে৷ ইয়াৰোপৰি অপ্ৰয়োজনীয় যাতায়াত কমোৱা, ৱাৰ্কফৰ্ম হোম আৰু ইন্ধন সাশ্ৰয়ৰ ওপৰত জোৰ দিছে প্ৰধানমন্ত্ৰী৷ অৰ্থনীতিবিদৰ মতে ভাৰতৰ বৈদেশিক মুদ্ৰাৰ ওপৰত চাপ কমাবলৈ এই বাৰ্তা দিছে কেন্দ্ৰই৷
সম্প্ৰতি এক অনুষ্ঠানত প্ৰধানমন্ত্ৰীয়ে কয়, ‘মই দেশবাসীৰ ওচৰত আবেদন জনাইছো যে অন্তত এবছৰৰ বাবে বিবাহৰ অনুষ্ঠানত সোণ কিনা বন্ধ ৰাখক৷ তেওঁৰ এই মন্তব্যক লৈ ইতিমধ্যেই দেশজুৰি আলোচনা আৰম্ভ হৈছে৷ কাৰণ ভাৰতত সোণৰ কেৱল অলংকাৰেই নহয়, বহু পৰিয়ালৰ ওচৰত সেয়া সঞ্চয় আৰু সামাজিক ৰীতিৰো গুৰুত্বপূৰ্ণ অংশ৷ বিশেষকৈ ভাৰতীয়সকলৰ বিবাহত সোণৰ গহনাৰ গুৰুত্ব দীৰ্ঘদিনৰ৷
ভাৰত বিশ্বৰ অন্যতম বৃহৎ সোণ আমদানিকাৰী দেশ৷ ইয়াৰোপৰি দেশৰ প্ৰায় ৮৫শতাংশ খাৰুৱা তেলো বিদেশৰ পৰাই আমদানি কৰিব লাগে৷ এই দুই ক্ষেত্ৰতে বিপুল পৰিমাণৰ মাৰ্কিন ডলাৰ খৰচ হয়৷ ফলত আন্তৰ্জাতিক বজাৰত তেলৰ দাম বাঢ়িলে আৰু একে সময়তে সোণৰ আমদানি বাঢ়িলে দেশৰ বৈদেশিক মুদ্ৰাৰ ভাণ্ডাৰৰ ওপৰত চাপো বাঢ়ে৷
বিশেষজ্ঞসকলৰ মতে বৰ্তমান সেই পৰিস্থিতিয়েই তৈয়াৰ হৈছে৷ ইৰাণ, আমেৰিকা, ইজৰায়েল সংঘাত আৰু হৰমুজ প্ৰণালীক লৈ উত্তেজনাৰ বাবে আন্তৰ্জাতিক বজাৰত অপৰিশোধিত তেলৰ দাম বেৰেলে প্ৰতি প্ৰায় ৭০ ডলাৰৰ ওপৰত৷ ইয়াৰ সৈতে ডলাৰৰ তুলনাত টকাৰ দামো দুৰ্বল হৈছে৷
অৰ্থনীতিবিদসকলৰ একাংশৰ মতে তেল আমদানি কমোৱা ভাৰতৰ পক্ষে সহজ নহয়৷ কাৰণ পৰিবহন, শিল্প আৰু বিদ্যুৎ উৎপাদনৰ বাবে ইন্ধন অত্যন্ত জৰুৰী৷ কিন্তু সোণৰ আমদানিক তুলনামূলকভাৱে নিয়ন্ত্ৰণ কৰা সম্ভৱ৷ সেই কাৰণেই সোণ কিনা কমাবলৈ আবেদন জনাইছে কেন্দ্রই৷
বিশেষজ্ঞসকলৰ বাখ্যা যেতিয়া বিপুল সংখ্যক মানুহে বিদেশী সোণ কিনে, তেতিয়া সেই আমদানিৰ বাবে বিপুল পৰিমাণে ডলাৰ দেশৰ পৰা বাহিৰলৈ যায়৷ ইয়াৰ ফলত কাৰেণ্ট একাউণ্ট ডেফিচিট বা আমদানি-ৰপ্তানিৰ ঘাটিও বাঢ়ে৷ টকাৰ ওপৰত আৰু চাপ তৈয়াৰ হয়৷ টকাৰ দাম কমি গলে তেলসহ অন্যান্য আমদানি আৰু ব্যয়বহুল হৈ উঠে৷ ফলত মূল্যবৃদ্ধিৰ চাপো বাঢ়ি থাকে৷
এই পৰিস্থিতি অৱশ্যে নতুন নহয়৷ পূৰ্বেও সোণৰ আমদানি কমাবলৈ বিভিন্ন পদক্ষেপ লৈছিল কেন্দ্ৰই৷ কেতিয়াবা সোণৰ ওপৰত আমদানি শুল্ক বঢ়োৱা হৈছে, কেতিয়াবা গল্ড বণ্ডৰ দৰে বিকল্প বিনিয়োগত উৎসাহ দিয়া হৈছে৷ লক্ষ্য আছিল এটাই বৈদেশিক মুদ্ৰাৰ খৰচ কমোৱা আৰু টকাৰ স্থিতি বজায় ৰখা৷
প্রধানমন্ত্ৰীয়ে এইবাৰ কেৱল সোণেই নহয়, ইন্ধন সাশ্ৰয়ক লৈয়ো সাধাৰণ মানুহক সতৰ্ক কৰিছে৷ তেওঁ কয়, ‘পেট্ৰল ডিজেলৰ দাম বিশ্বজুৰি অত্যন্ত বাঢ়িছে৷ সেয়ে ইন্ধন বচোৱাটো প্ৰত্যেক নাগৰিকৰ দায়িত্ব৷’ সেই কাৰণেই কৰ’না পৰ্বৰ দৰে আকৌ ৱাৰ্ক ফ্ৰম হোম, অনলাইন মিটিং আৰু ভিডিঅ’ কনফাৰেন্সিঙৰ ওপৰতো জোৰ দিয়াৰ পৰামৰ্শ দিছে তেওঁ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
