পেট্ৰল-ডিজেলৰ ব্যৱহাৰ কমাবলৈ এটাৰ পাছত আনটো ডাঙৰ সিদ্ধান্ত লৈছে কেন্দ্ৰই৷ চৰকাৰী দপ্তৰক ভাৰ্চুৱেল বৈঠক, কৰ্মচাৰীসকলক ৱাৰ্ক ফ্ৰম হোম, চৰকাৰী বাহনৰ ব্যৱহাৰ কমোৱাৰ পৰা আৰম্ভ কৰি পাব্লিক ট্ৰান্সপৰ্ট ব্যৱহাৰত জোৰ দিছে কেন্দ্ৰই৷ কেন্দ্ৰৰ একাধিক আবেদনে জনতাক মনত পেলাইছে লকডাউনৰ স্মৃতি৷ কেন্দ্ৰই স্পষ্টকৈ জনাইছে যে দেশত লকডাউনৰ দৰে কোনো পৰিস্থিতি এতিয়াও অহা নাই৷ ইন্ধন সাশ্ৰয় আৰু বিদেশী মুদ্ৰাৰ ভাণ্ডাৰ ৰখাৰ বাবেহে এই পদক্ষেপ লৈছে কেন্দ্ৰই৷
মধ্যপ্ৰাচ্যত অস্থিৰতা কমাতকৈ দিনকদিনে বৃদ্ধিহে পাইছে৷ হৰমুজ ৰুটত সমস্যা এতিয়াও দূৰ হোৱা নাই৷ ফলত আন্তৰ্জাতিক বজাৰত খাৰুৱা তেলৰ দাম বৃদ্ধি পাইছে৷ তাৰ প্ৰভাৱ পৰিছে ভাৰততো৷ পেট্ৰল-ডিজেলৰ দামবৃদ্ধিৰ আশংকাৰ মাজতে কেন্দ্ৰৰ তৰফৰ পৰা ইন্ধনৰ ব্যৱহাৰত নিয়ন্ত্ৰণ অনাৰ বাৰ্তা দিছে কেন্দ্রই৷ প্রধানমন্ত্ৰী নৰেন্দ্ৰ মোদীয়েও সম্প্ৰতি দেশবাসীক ইন্ধন বচোৱাৰ আবেদন জনাইছে৷ তাৰপিছৰে পৰা বিভিন্ন চৰকাৰী নিৰ্দেশনা আহিছে৷ এই নিৰ্দেশনাসমূহৰ বাবেই চিন্তিত হৈ পৰিছে দেশৰ জনতা৷
কেন্দ্ৰৰ সাম্প্ৰতিক পদক্ষেপসমূহৰ মাজত সকলোতকৈ বেছি নজৰ কাঢ়িছে চৰকাৰী বেংক আৰু দপ্তৰসমূহৰ ভাৰ্ছুৱেল বৈঠকৰ নিৰ্দেশে৷ বিত্তমন্ত্ৰণালয়ৰ অধীনত আৰ্থিক পৰিসেৱা বিভাগে সমস্ত চৰকাৰী বেংক, আঞ্চলিক গ্ৰামীণ বেংক আৰু চৰকাৰী বীমা সংস্থাসমূহক ভিডিঅ’ কনফাৰেন্সৰ মাধ্যমেৰে বৈঠক কৰাৰ পৰামৰ্শ দিছে৷ অত্যন্ত প্ৰয়োজন নহ’লে বৈঠক এৰাই চলিবলৈ আহ্বান জনাইছে৷ ইয়াৰ ফলত যাতায়াত আৰু ইন্ধনৰ খৰচ বাচিব বুলি ধাৰণা কৰিছে কেন্দ্ৰই৷
কেৱল সেয়াই নহয়, আকৌ ৱাৰ্ক ফ্ৰম হোমতো গুৰুত্ব দিয়া হৈছে৷ দিল্লী চৰকাৰে ইতিমধ্যেই চৰকাৰী কৰ্মচাৰীসকলক সপ্তাহত দুদিন ঘৰৰ পৰা কাম কৰাৰ নিৰ্দেশ দিছে৷ বেচৰকাৰী সংস্থাসমূহকো একে পথ অনুসৰণ কৰিবলৈ অনুৰোধ জনোৱা হৈছে৷ উদ্দেশ্য এটাই পথত বাহনৰ সংখ্যা কমোৱা আৰু পেট্ৰল ডিজেলৰ ব্যৱহাৰ নিয়ন্ত্ৰণত ৰখা৷
বিদেশী মুদ্ৰা সাশ্ৰয়ৰ লক্ষ্যৰে সোণ কিনাতো সতৰ্কবাৰ্তা দিছে কেন্দ্রই৷ ভাৰতত বিপুল পৰিমাণৰ সোণ আমদানি কৰা হয়৷ ফলত প্ৰচুৰ ডলাৰ খৰচ হয়৷ সেই কাৰণেই প্ৰধানমন্ত্ৰীয়ে দেশবাসীৰ ওচৰত এবছৰৰ বাবে অপ্ৰয়োজনীয় সোণ ক্ৰয় এৰাই চলিবলৈ আবেদন জনাইছে কেন্দ্ৰই৷ ইয়াৰ সৈতে বিদেশ যাত্ৰা আৰু পৰ্যটনক লৈয়ো সংযমৰ বাৰ্তা দিয়া হৈছে৷ কাৰণ বিদেশ ভ্ৰমণৰ ক্ষেত্ৰতো বিপুল বৈদেশিক মুদ্ৰা খৰচ হয়৷
চৰকাৰী স্তৰতো ব্যয়ৰ ওপৰত নিয়ন্ত্ৰণ অনাৰ চেষ্টা আৰম্ভ হৈছে৷ মন্ত্ৰী আৰু আমোলাসকলৰ কনভয়ৰ বাহনৰ সংখ্যা কমোৱা হৈছে৷ বিদেশ যাত্ৰাৰ ক্ষেত্ৰতো নিয়ন্ত্ৰণ অনা হৈছে৷ ইয়াৰোপৰি দিল্লীৰ দৰে কেইবাখনো ৰাজ্যত আগন্তুক কেইবামাহ নতুন পেট্ৰল, ডিজেল বা চিএনজি বাহন কিনাত নিষেধাজ্ঞা জাৰি কৰা হৈছে৷ চৰকাৰী দপ্তৰসমূহক দ্ৰুত ইলেক্ট্ৰিক বাহন ব্যৱহাৰ কৰিবলৈ নিৰ্দেশ দিয়া হৈছে৷
ইয়াৰোপৰি ডাঙৰ চৰকাৰী অনুষ্ঠান আৰু উৎসৱ স্থগিত বা বাতিল কৰাৰো সিদ্ধান্ত লোৱা হৈছে বুলি জানিব পৰা গৈছে৷ সাধাৰণ মানুহকো ব্যক্তিগত বাহনৰ সলনি মেট্ৰ, বাছ আদি ব্যৱহাৰৰ পৰামৰ্শ দিয়া হৈছে৷ সপ্তাহত এদিন নো ভেহিকল ডে পালনৰ আবেদন কৰা হৈছে বিভিন্ন মহলত৷
অৱশ্যে কেন্দ্ৰৰ তৰফৰ পৰা স্পষ্টকৈ জনোৱা হৈছে যে দেশত ইন্ধনৰ কোনো ঘাটি নাই৷ পৰ্যাপ্ত বাফাৰ ষ্টক আছে৷ সেয়ে লকডাউনৰ দৰে পৰিবেশৰ বাবে আতংকিত হোৱাৰ কোনো কাৰণ নাই৷ বৰ্তমান পৰিস্থিতিক কৰোনা মহামাৰীৰ সৈতে তুলনা নকৰিবলৈকো বাৰ্তা দিয়া হৈছে৷ প্ৰশাসনিক মহলৰ মতে এই সকলো সিদ্ধান্তৰেই মূল লক্ষ্য এটাই৷ সেয়া হৈছে দেশৰ সামূহিক অৰ্থনৈতিক পৰিস্থিতি নিয়ন্ত্ৰণত ৰখা আৰু ইন্ধনৰ নিৰাপত্তা নিশ্চিত কৰা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
