বিনোদন জগতলৈ দুঃসংবাদ৷ লুধিয়ানাৰ পৰা অপহৰণ হোৱাৰ কেইটামান দিনৰ পাছতেই পঞ্জাৱৰ নীল হ্ৰদৰ পৰা উদ্ধাৰ হৈছে ২৯ বছৰ বয়সীয়া পাঞ্জাৱী গায়িকা আৰু মেকআপ শিল্পী ইন্দৰ কৌৰৰ নিথৰ দেহ৷ তেওঁৰ পৰিচিত নাম হৈছে যশিন্দৰ কৌৰ৷
পিটিছি পঞ্জাৱৰ তথ্য অনুসৰি বিগত ১৩ মেৰ পৰা নিখোঁজ হৈ আছিল যশিন্দৰ কৌৰ৷ ১৯ মে মঙ্গলবাৰে পুৱা প্ৰায় ১১ বজাত তেওঁৰ দেহ উদ্ধাৰ হয়৷ ইতিমধ্যে পৰিয়ালে দেহটো চিনাক্ত কৰিছে৷ গায়িকাৰ নিথৰ দেহ পোৱাৰ পাছতেই মৰোণোত্তৰ আৰু আইনী প্ৰক্ৰিয়াৰ বাবে ছামৰলাৰ ছিভিল হাস্পতাললৈ পঠিওৱা হৈছে৷
বিগত সপ্তাহত গায়িকাৰ ভাতৃ যতিন্দৰ সিঙে তেওঁ নিখোঁজ হোৱাৰ বিষয়ে আৰক্ষীৰ ওচৰত অভিযোগ দাখিল কৰিছিল৷ তাৰপিছতেই আৰম্ভ হৈছিল তদন্ত৷ ভাতৃৰ ভাষ্যৰ ভিত্তিত কৰ্তৃপক্ষই ১৫ মে’ত মোগা নিৱাসী সুখবিন্দৰ সিং ওৰফে সুখা রু তেওঁৰ সহযোগী কৰমজিৎ সিঙৰ বিৰুদ্ধেও এখন এফ আই আৰ নথিভুক্ত কৰিছে৷
অভিযোগ অনুসৰি ইন্দৰ কৌৰ ওৰফে যশিন্দৰ কৌৰ ১৩ মে সন্ধিয়া তেওঁৰ ফৰ্ড বাহনেৰে কিছু সামগ্ৰী ক্ৰয় কৰাৰ বাবে ঘৰৰ পৰা ওলাই গৈছিল৷ কিন্তু তেওঁ আৰু ঘৰলৈ উভতি নাহিল৷ বাৰে বাৰে ফোন কৰা স্বত্ত্বেও ফোনো ৰিচিভ নকৰিলে৷ অৱশেষত উপায়হীন হৈ পৰিয়ালে আৰক্ষীৰ কাষ চাপে৷
তদন্ত চলি থকাৰ সময়তে পৰিয়ালে জনাইছিল যে গায়িকাই মোগা জিলাৰ ভালুৰ গাওঁৰ বাসিন্দা সুখবিন্দৰ সিঙৰ সৈতে পৰিচিত আছিল৷ যতিন্দৰ সিঙৰ মতে অভিযুক্তই তেওঁৰ ভনীয়েকক বিয়া কৰোৱাৰো ইচ্ছা প্ৰকাশ কৰিছিলষ কিন্তু তেওঁৰ ভগ্নীয়ে বিবাহৰ প্ৰস্তাৱ প্ৰত্যাখ্যান কৰে৷
পৰিয়ালৰ অভিযোগ, বিবাহৰ প্ৰস্তাৱ প্ৰত্যাখ্যানৰ কাৰণেই ব্যক্তিগত শত্ৰুতাৰ কাৰণে অভিযুক্তই গায়িকাক অপহৰণ কৰি হত্যা কৰে৷ অভিযোগকাৰীয়ে আৰু দাবী কৰিছে যে ঘটনাৰ পাছত প্ৰধান অভিযুক্ত কানাডালৈ পলাই গৈছে৷ আৰক্ষী কৰ্মকৰ্তাই নিশ্চিত কৰিছে যে তদন্ত চলি আছে আৰু তদন্তৰ ফলাফলৰ ভিত্তিতহে পৰবৰ্তী আইনী ব্যৱস্থা লোৱা হ’ব৷
ইন্দৰ কৌৰ আছিল পঞ্জাৱৰ এগৰাকী গায়িকা আৰু মেকআপ শিল্পী৷ তেওঁৰ গীত, লাইভ কনছাৰ্ট আৰু ছচিয়েল মিডিয়া কাৰ্যকলাপৰ মাধ্যমেৰে পাঞ্জাৱী সংগীত জগতত নিজৰ এক স্থানো তৈয়াৰ কৰিছিল৷ বিগত বছৰসমূহত তেওঁ আফগান জট্টি, ছোহনা লাগদা, দেশি ছিৰৰে দে, ছোনে দি ৱাং আদি জনপ্ৰিয় পাঞ্জাৱী গীত ৰিলিজো কৰিছে৷ তেওঁৰ সংগীত আৰু লাইভ কনছাৰ্টসমূহে শ্ৰোতাৰ মাজত তেওঁৰ পৰিচয়ো গঢ়ি তুলিছিল৷ তেওঁৰ ইনষ্টাগ্ৰাম হেণ্ডেলতো আছে প্ৰায় ১ লাখ ২৪ হাজাৰ ফলোৱাৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
