প্ৰধানমন্ত্ৰীৰ বিশেষ পেকেজৰ অধীনত কাশ্মীৰ উপত্যকাত কৰ্মৰত কাশ্মীৰী পণ্ডিত কৰ্মচাৰীসকলৰ বাবে আহিছে এক সুখবৰ। বছৰ বছৰ ধৰি নিৰাপদ বাসগৃহৰ বাবে অপেক্ষা কৰি থকা কৰ্মচাৰীসকলে অৱশেষত নিজৰ ঘৰ লাভ কৰিবলৈ সক্ষম হৈছে। বহুদিনৰ অপেক্ষাৰ অন্তত লেফটেনেণ্ট গৱৰ্ণৰে ১,৪১৬ টা ফ্লেটৰ চাবি কৰ্মচাৰীসকলৰ হাতত গতাই দিবলৈ আৰম্ভ কৰিছে।
ইয়াৰ পূৰ্বে বহু কৰ্মচাৰীয়ে ভাড়াঘৰত থাকিবলৈ বাধ্য হৈছিল। প্ৰতিমাহে ভাড়া দিয়াৰ লগতে উপত্যকাটোত সংঘটিত বিভিন্ন হ*ত্যাকাণ্ডৰ ঘটনাৰ মাজত কৰ্মচাৰীসকলে নিৰাপত্তাহীনতাত ভুগি আছিল। এনে পৰিস্থিতিত নিজৰ ঘৰ লাভ কৰাটো তেওঁলোকৰ বাবে এক ডাঙৰ সপোন পূৰণৰ দৰে হৈছে বুলি মন্তব্য কৰে উপহাৰ লাভ কৰা কৰ্মচাৰীসকলে।
সংশ্লিষ্ট কৰ্মচাৰীসকলৰ বাবে নিজৰ ঘৰ লাভ কৰাটো কেৱল বাসস্থানৰ সুবিধা নহয়। বৰঞ্চ নিৰাপত্তা, মৰ্যাদা আৰু শান্তিৰে জীৱন যাপনৰ এক নতুন সুযোগ। প্ৰধানমন্ত্ৰীৰ পেকেজৰ অধীনত কাশ্মীৰ উপত্যকাত কৰ্মৰত কাশ্মীৰী পণ্ডিত কৰ্মচাৰীসকলে দীৰ্ঘদিন ধৰি চৰকাৰৰ ওচৰত সুৰক্ষিত বাসগৃহৰ দাবী জনাই আহিছিল। কৰ্মস্থলীৰ পৰা ঘৰলৈ উভতি আহি পৰিয়ালৰ সৈতে নিৰ্ভয়ে সময় কটাব পৰাকৈ এখন নিৰাপদ ঠাই তেওঁলোকৰ বাবে অত্যন্ত প্ৰয়োজনীয় আছিল।
কিন্তু বছৰ বছৰ ধৰি এই দাবী পূৰণ হোৱা নাছিল। বহু কৰ্মচাৰীয়ে অসুৰক্ষিত পৰিৱেশত ভাড়াঘৰত থাকিবলগীয়া হৈছিল। কাশ্মীৰ উপত্যকাত অশুভ শক্তিয়ে কাশ্মীৰী পণ্ডিতসকলক লক্ষ্য কৰি হ*ত্যা কৰা ঘটনাই তেওঁলোকৰ মাজত উদ্বেগ আৰু অধিক বৃদ্ধি কৰিছিল। কিন্তু দীৰ্ঘদিনীয়া অপেক্ষাৰ অন্তত প্ৰশাসনে ১৪১৬টা ফ্লেটৰ চাবি কৰ্মচাৰীসকলক গতাই দিবলৈ আৰম্ভ কৰিছে। এই ফ্লেটসমূহ শ্ৰীনগৰ, বুডগাম আৰু কুপৱাৰাত নিৰ্মাণ কৰা হৈছে। ইয়াৰ ভিতৰত শ্ৰীনগৰত সৰ্বাধিক প্ৰায় ৯৩০টা ফ্লেট আছে।
নিজৰ নতুন ঘৰৰ চাবি লাভ কৰাৰ পিছত কৰ্মচাৰীসকলৰ মুখত দেখা গৈছে আনন্দ আৰু স্বস্তিৰ হাঁহি। তেওঁলোকৰ বাবে এই ঘৰসমূহে এক নতুন জীৱনৰ আৰম্ভণি কঢ়িয়াই আনিছে। এতিয়া তেওঁলোকে প্ৰতিমাহে ভাড়া দিয়াৰ চিন্তাৰ পৰা মুক্ত হোৱাৰ লগতে নিৰাপদ পৰিৱেশত বাস কৰাৰ সুযোগ লাভ কৰিব। এই ফ্লেটসমূহত সহকৰ্মীসকল একেলগে ওচৰ-চুবুৰীয়া হিচাপে থাকিব। ফলত তেওঁলোকৰ মাজত পাৰস্পৰিক বিশ্বাস, সহযোগিতা আৰু পৰিচিতিৰ পৰিৱেশ গঢ়ি উঠিব বুলি আশা কৰা হৈছে।
নিজৰ নতুন বাসগৃহৰ চাবি লাভ কৰি বহু কাশ্মীৰী পণ্ডিত কৰ্মচাৰীয়ে আনন্দ প্ৰকাশ কৰিছে। তেওঁলোকৰ একাংশই কৈছে যে সহকৰ্মী আৰু চিনাকি লোকসকলৰ সৈতে একেটা আবাসিক এলেকাত থাকিব পৰাৰ বাবে তেওঁলোকে অধিক নিৰাপদ অনুভৱ কৰিছে। কিছুমান কৰ্মচাৰীয়ে এই ঘটনাক ঘৰলৈ উভতি অহাৰ অনুভূতিৰ সৈতে তুলনা কৰিছে। আন একাংশই ভগৱান ৰামৰ নিৰ্বাসনৰ উদাহৰণ দাঙি ধৰিছে।
তেওঁলোকৰ মতে, ভগৱান ৰামে ১৪ বছৰ নিৰ্বাসনত থকাৰ পিছত নিজৰ ঘৰলৈ উভতি আহিছিল। ঠিক সেইদৰে, দীৰ্ঘদিন ধৰি নিৰাপদ বাসগৃহৰ বাবে অপেক্ষা কৰি থকা তেওঁলোকৰ জীৱনতো এতিয়া এক নতুন অধ্যায়ৰ আৰম্ভণি হৈছে। প্ৰায় ১৬ বছৰৰ নিৰ্বাসনৰ পিছত যেন তেওঁলোকৰ জীৱনলৈ ঘৰ, নিৰাপত্তা আৰু শান্তিৰ অনুভূতি ঘূৰি আহিছে। নিজৰ ঘৰৰ চাবি হাতত লৈ কৰ্মচাৰীসকলে অনুভৱ কৰিছে এক বিশেষ আনন্দ আৰু মানসিক স্বস্তি।
সামগ্ৰিকভাৱে, ১৪১৬টা ফ্লেটৰ চাবি হস্তান্তৰৰ এই পদক্ষেপে কাশ্মীৰী পণ্ডিত কৰ্মচাৰীসকলৰ দীৰ্ঘদিনীয়া দাবী পূৰণৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে। নিৰাপদ বাসগৃহ লাভ কৰাৰ ফলত তেওঁলোকৰ জীৱনত নতুন আশা আৰু বিশ্বাসৰ সৃষ্টি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
