বহুতৰেই ধাৰণা ফাৰ্মসমূহত মাত্ৰ ৩৫ৰ পৰা ৪০ দিনৰ ভিতৰত মুৰ্গীসমূহক দ্ৰুতগতিত ডাঙৰ কৰিবৰ বাবে বিপজ্জনক সকলো ঔষধ, এণ্টিবায়োটিক আৰু গ্ৰোথ হৰমনৰ ইঞ্জেকছন দিয়া হয়৷ দাবী কৰা হয় ব্ৰয়লাৰ মুৰ্গী খোৱাৰ ফলত মানুহৰ বিশেষকৈ শিশুসকলৰ শাৰীৰিক বিকাশত মাৰাত্মক ক্ষতিকৰ প্ৰভাৱ পৰে৷ কিন্তু সঁচা কি? বিজ্ঞান আৰু আন্তৰ্জাতিক ফাৰ্ম বিশেষজ্ঞসকলে কিন্তু এই দাবীক সম্পূৰ্ণ গুজব বা ভ্ৰান্ত ধাৰণা বুলি উৰুৱাই দিছে৷ জানি থওক ইয়াৰ আঁৰৰ সত্য কি?
মুৰ্গীক কি সঁচাকৈয়ে হৰমন দিয়া হয় নেকি?
দ্যা হিউমেন লিগৰ ৰিপৰ্ট অনুসৰি সাধাৰণ মানুহৰ মাজত এক বদ্ধমূল ধাৰমা আছে যে ব্ৰয়লাৰ মূৰ্গীৰ দ্ৰুত বৃদ্ধিৰ বাবে কৃত্ৰিম হৰমন প্ৰয়োগ কৰা হয়৷ আন্তৰ্জাতিক বিশেষজ্ঞ আৰু চৰকাৰী সংস্থাসমূহে স্পষ্টকৈ জনাইছে যে এই ধাৰণা একেবাৰে ভিত্তিহীন৷
প্ৰকৃত সত্য হৈছে ব্ৰয়লাৰ মুৰ্গীক দ্ৰুত ডাঙৰ কৰাৰ বাবে যিকোনো ধৰণৰ গ্ৰোথ হৰমন দিয়া আইনমতে সম্পূৰ্ণ নিষিদ্ধ৷ কেৱল সেয়াই নহয় বৈজ্ঞানিক আৰু ব্যৱহাৰিক দৃষ্টিকোণৰ পৰা লাখ লাখ মূৰ্গীক প্ৰতিদিনে ইঞ্জেকছন দিয়াটো ফাৰ্মসমূহৰ পক্ষেও একপ্ৰকাৰে অসম্ভৱ৷
চিকিৎসকে জনোৱা অনুসৰি ব্ৰয়লাৰক লৈ মানুহৰ মনত যি ভয় আছে সেয়া একেবাৰেই মিথ৷ বাণিজ্যিকভাৱে বিক্ৰি হোৱা মুৰ্গীৰ দ্ৰুত বৃদ্ধিৰ বাবে কোনো ধৰণৰ কৃত্ৰিম হৰমন ব্যৱহাৰ কৰা নহয়৷ আৰু যদি হৰমনক মুৰ্গীৰ খাদ্যৰ সৈতে মিহলাই খুওৱা হয় তেতিয়া মুৰ্গীৰ পৰিপাকতন্ত্ৰই সেয়া সাধাৰণ প্ৰটিন হিচাপেই ভাঙি হজম কৰে৷ ফলত মানুহৰ শৰীৰলৈ কোনো ক্ষতিকাৰক প্ৰভাৱ যোৱাৰ প্ৰশ্নই নাহে৷
ঔষধ বা হৰমন অবিহনে ব্ৰয়লাৰ মুৰ্গী কেনেকৈ সোনকালে ডাঙৰ হয়?
এতিয়া প্ৰশ্ন উঠিব পাৰে, কৃত্ৰিম উপায় অৱলম্বন নকৰিলে মাত্ৰ ডেৰ মাহ এটা মুৰ্গী ইমান ডাঙৰ কেনেকৈ হয়৷ অৰ্গেনিক ফিডছৰ মতে ইয়াৰ আঁৰত আছে বিজ্ঞানৰ জাদু৷ ব্ৰয়লাৰ মুৰ্গীৰ প্ৰজাতি আমাৰ পৰিচিত দেশী মুৰ্গীতকৈ সম্পূৰ্ণ পৃথক৷ এই মুৰ্গী প্ৰাকৃতিকভাৱেই খুবেই দ্ৰুত বৃদ্ধি পায় আৰু মাত্ৰ ৪৫ দিনতেই পূৰ্ণাংগ আকাৰ ধাৰণ কৰে৷
ইয়াৰ আঁৰৰ মূল কাৰণসমূহ
উন্নত জেনেটিক্স আৰু চিলেক্টিভ ব্ৰিডিং
বিগত কেইবাদশক ধৰি পোলট্ৰি বিশেষজ্ঞসকলে কেৱলমাত্ৰ এইসমূহ মুৰ্গীৰ প্ৰজন্ন বা ব্ৰিডিং কৰিছে যিসমূহ শাৰীৰিকভাৱে সুস্থ থাকে আৰু খুবেই দ্ৰুত বাঢ়ে৷
বিশেষ পুষ্টিগুণ সম্পন্ন খাদ্য
ফাৰ্মসমূহত মুৰ্গীৰ খাদ্যৰ ওপৰত বিশেষ বৈজ্ঞানিক নজৰদাৰী থাকে৷ প্ৰটিন, ভিটামিন আৰু খনিজ সমৃদ্ধ একেবাৰে হিচাপৰ ডায়েট দিয়া হয়৷ এই হাইপ্ৰটিন ডায়েটৰ ফলতেই ব্ৰয়লাৰৰ ওজন দ্ৰুত বৃদ্ধি পায়৷
এণ্টিবায়োটিকৰ ব্যৱহাৰ স্বাস্থ্যৰ বাবে কিমান ক্ষতিকৰ?
হৰমনৰ ওপৰিও আৰু এক বৃহৎ উদ্বেগৰ বিষয় হৈছে এণ্টিবায়োটিকৰ ব্যৱহাৰ৷ মুৰ্গীক বিভিন্ন ৰোগৰ পৰা ৰক্ষা কৰিবলৈ ফাৰ্মত এণ্টিবায়োটিক দিয়া হয়৷ কিন্তু গ্লোবেল গাইডলাইন বা আন্তৰ্জাতিক নিয়ম অনুসৰি মুৰ্গী বজাৰত বিক্ৰি বা মাংস কটাৰ কেইদিনমান পূৰ্বে এই ঔষধ দিয়া সম্পূৰ্ণ বন্ধ কৰি দিয়া হয়৷ এই সময়কালক চিকিৎসকৰ ভাষাত কোৱা হয় উইথড্ৰয়েল পিৰিয়ড৷
স্বাস্থ্য বিষয়ক ৱেবচাইট হেলথলাইনৰ প্ৰতিবেদন অনুসৰি এই নিয়ম অত্যন্ত কঠোৰভাৱে পালন কৰা হয়৷ ইয়াৰ ফলত মাংস যেতিয়া ক্ৰেতাৰ প্লেট পাইগৈ তেতিয়া মুৰ্গীৰ শৰীৰত ঔষধৰ কোৱো অস্তিত্ব বা প্রভাৱৰ অৱশিষ্ট নাথাকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
