স্বেচ্ছাই যৌনকৰ্মী হ’লে সেয়া বেআইনী বা অবৈধ নহয় বুলি জনালে ছুপ্ৰিম কৰ্টে৷ ইয়াৰ সৈতে দেশৰ শীৰ্ষ আদালতে সোমবাৰে জনাইছে যে প্ৰাপ্তবয়স্ক কোনো পুৰুষ বা মহিলা বা উভয়ৰ সন্মতিত যৌনকৰ্ম হ’লে আৰক্ষীয়ে কোনোধৰণেই ইয়াক হাৰাশাস্তি বুলি ধৰিব নোৱাৰিব৷ বাণিজ্যিক কাৰণত যৌনতা বা মানৱ সৰবৰাহৰ চিকাৰ হোৱা মহিলাসকলৰ মৌলিক অধিকাৰ ৰক্ষাৰ বাবে নিৰ্দেশ বিচাৰি ছুপ্ৰিম কৰ্টত গোচৰ তৰা হৈছিল৷ সেই গোচৰৰ ৰায়ত সোমবাৰে এই কথা জনাইছে শীৰ্ষ আদালতে৷
Immoral Traffic (Prevention) Act (ITPA)-ৰ বিশ্লেষণ কৰিবলৈ গৈ ছুপ্ৰিম কৰ্টে তেওঁলোকৰ পৰ্যবেক্ষণত জনাইছে যে ৭০ বছৰৰ পুৰণি অবৈধ নাৰী সৰবৰাহ প্ৰতিৰোধ আইনে স্বেচ্ছাই যৌনকৰ্মত নিযুক্ত প্ৰাপ্তবয়স্কসকলৰ বিৰুদ্ধে আৰক্ষীক কঠোৰ কোনো পদক্ষেপ লোৱাৰ ক্ষমতা নিদিয়ে৷ কাৰণ সেই কাম অবৈধ নহয়৷ ছুপ্ৰিম কৰ্টে লগতে জনাইছে যে যদিও যৌনপল্লি চলোৱা অবৈধ তথাপিও সেই স্থানত অভিযান চলোৱাৰ সময়ত আৰক্ষীয়ে অৱশ্যেই মন কৰিব লাগিব যাতে স্বেচ্ছাই যিসকলে যৌনকৰ্মক পেছা হিচাপে বাচি লৈছে তেওঁলোকক যেন হাৰাশাস্তিৰ কৰা নহয়৷
যৌনকৰ্মীসকলৰ পুনৰ্বাসনৰ বিষয়ে সংশ্লিষ্ট কৰ্তৃপক্ষক নিৰ্দেশ দি ন্যায়াধীশ জেবি পাৰাদিৱালা আৰু ন্যায়াধীশ আৰ মহাদেৱনৰ ডিভিচন বেঞ্জে জনাইছে যে প্ৰাপ্তবয়স্ক যিসকল মানুহে নিজৰ ইচ্ছাত যৌনকৰ্মত লিপ্ত থাকিব তেওঁলোকক হাৰাশাস্তি কৰাৰ পৰা আৰক্ষী যেন বিৰত থাকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
