ক্ৰীড়া, বিভিন্ন সাংস্কৃতিক অনুষ্ঠানেৰে উত্তৰ পূবৰ প্ৰাণকেন্দ্ৰ গুৱাহাটী এতিয়া বিশ্বৰ মানচিত্ৰত লাহে লাহে এটা চিনাকি নামলৈ পৰিণত হ’বলৈ ধৰিছে। পোষ্ট মেলনৰ দৰে বিশ্বমানৰ সংগীত শিল্পীৰ পিছত এইবাৰ গুৱাহাটীলৈ আহিব প্ৰখ্যাত মাৰ্কিন বেণ্ড Guns N’ Roses। সকলো ঠিকে ঠাকে থাকিলে চলিত বৰ্ষৰ ১৭ নৱেম্বৰত গুৱাহাটীৰ খানাপাৰা পশু চিকিৎসা মহাবিদ্যালয়ৰ খেলপথাৰত অনুষ্ঠান পৰিৱেশন কৰিব Guns N’ Roses বেণ্ডটোৱে। ইতিমধ্যে মুখ্যমন্ত্ৰী হিমন্ত বিশ্ব শৰ্মাই ছচিয়েল মিডিয়াযোগে নিশ্চিতি কৰিছে এই খবৰ।
কেনেকৈ প্ৰতিষ্ঠা হৈছিল Guns N’ Rosesৰ?
বিশেষকৈ ৮০ৰ দশকত সমগ্ৰ বিশ্বত খলকনি তোলা Guns N’ Roses আমেৰিকাৰ লজ এঞ্জেলছৰ দুটা স্থানীয় বেণ্ড হলীউড ৰ’জ আৰু LA GUNSৰ মিশ্ৰণ। সংগীতশিল্পী এক্সেল ৰ’জ, স্লেছ, ইজি ষ্ট্ৰেডলিন, ডফ মেককগান আৰু ষ্টিভন এড্লাৰৰ সামূহিক প্ৰচেষ্টাত ১৯৮৫ত জন্ম হৈছিল Guns N’ Roses। এই বেণ্ডটোৰ মুখ্য কণ্ঠশিল্পীৰ দায়িত্ব লৈছিল এক্সেল ৰ’জে। ১৯৮৭ত বেণ্ডটোৱে তেওঁলোকৰ প্ৰথমটো এলবাম Appetite for Destruction মুকলি কৰে। প্ৰথমটো এলবাম মুকলি কৰিয়েই বিশ্বৰ সংগীতপ্ৰেমীৰ হৃদয়ত স্থান লাভ কৰিবলৈ সক্ষম হয় Guns N’ Roses-এ। বিশ্বৰ বাণিজ্যিক ৰক সংগীত ইতিহাসত সৰ্বাধিক বিক্ৰী হোৱা অভিষেক এলবামত পৰিণত হয় Guns N’ Rosesৰ Appetite for Destruction. এলবামটোত সন্নিৱিষ্ট Sweet Child O, Welcome to the Jungle, Paradise Cityৰ দৰে গানসমূহ এতিয়াও বহুলভাৱে সমাদৃত।
Guns N’ Rosesৰ বিবাদ আৰু বিচ্ছেদ
ধাৰাবাহিক সফলতাৰ পিছতো বিভিন্ন বিতৰ্কত নিজৰ নাম সাঙোৰ খোৱা, ড্ৰাগছৰ প্ৰতি আসক্তি আৰু বেণ্ডটোৰ সদস্যকেইজনৰ মাজত হোৱা মনোমালিন্যৰ ফলশ্ৰুতিত ৯০ দশকৰ মধ্যভাগত স্লেছ আৰু ডফ মেককগানে Guns N’ Roses এৰিবলৈ বাধ্য হয়। ইয়াৰ পূৰ্বে ১৯৯১ত Use Your Illusion I & II নামৰ আন এটা ছুপাৰহিট এলবাম বিশ্বৰ সংগীত অনুৰাগীসকলক উপহাৰ দিয়ে কেলিফৰ্নিয়াৰ এই বেণ্ডটোৱে। স্লেছ আৰু ডফ মেককগানৰ পৰা বিচ্ছেদ হৈ এক সুদীৰ্ঘ সময় এক্সেল ৰ’জে নতুন নতুন শিল্পীক লগত লৈ Guns N’ Roses বেণ্ডটো চলাই যায়। ২০১৬ত বেণ্ডটোৰ প্ৰতিষ্ঠাপক আৰু মুখ্য সংগীত শিল্পী এক্সেল ৰ’জে সমগ্ৰ বিশ্বত Not in This Lifetime.. নামৰ এক সংগীতৰ যাত্ৰা আৰম্ভ কৰে। সংগীতৰ এই যাত্ৰাৰ মধ্যভাগতে এক্সেল ৰ’জক পুনৰ সংগ দিয়ে স্লেছ আৰু ডফ মেককগানে। ইয়াৰ পিছতে Guns N’ Roses-এ পুনৰ যেন হেৰুওৱা ছন্দলৈ ঘূৰি আহে। Guns N’ Rosesৰ Not in This Lifetime… শীৰ্ষক সংগীতৰ বিশ্বযাত্ৰাটো ৰক সংগীত ইতিহাসৰ অন্যতম সফল আৰু সৰ্বাধিক উপাৰ্জন কৰা সংগীত যাত্ৰাত পৰিণত হয়।
এই লেখাটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
