টেষ্ট ক্ৰিকেটৰ পৰা ৰবিচন্দ্ৰন অশ্বিনে বিদায় লোৱাৰ সমান্তৰালভাৱে আঘাতৰ সমস্যাৰ বাবে জাদেজাৰ অনুপস্থিতিৰ সুযোগতে আন্তঃৰাষ্ট্ৰীয় ক্ৰিকেটত অভিষেক ঘটোৱা মানৱ সুথৰে সুদীৰ্ঘ ৩৮ বছৰে কোনো ভাৰতীয়ই কৰিব নোৱাৰা কাম কৰি দেখুৱালে। আফগানিস্তানৰ বিৰুদ্ধে একমাত্ৰ টেষ্টখনৰ বাবে দলত স্থান লাভ কৰা বাওঁহতীয়া স্পীনাৰজনে আন্তঃৰাষ্ট্ৰীয় ক্ৰিকেটত সপোনৰ আৰম্ভণি ঘটাবলৈ সক্ষম হৈছে। তুলনামূলকভাৱে দুৰ্বল আফগানিস্তানৰ বেটিং লাইনআপক কোঙা কৰি নিজৰ কেৰিয়াৰৰ প্ৰথমখন টেষ্টতে মানৱ সুথৰে দখল কৰে ৭টাকৈ উইকেট। ১৯৮৮ চনৰ পৰা এই পৰ্যন্ত যিকোনো ভাৰতীয় বলাৰৰ আন্তঃৰাষ্ট্ৰীয় ক্ৰিকেটৰ অভিষেক মেচত এয়া শ্ৰেষ্ঠ প্ৰদৰ্শন। ইয়াৰ পূৰ্বে ১৯৮৮ৰ নৱেম্বৰত ৱেষ্ট ইণ্ডিজৰ বিৰুদ্ধে নৰেন্দ্ৰ হিৰৱানীয়ে নিজৰ কেৰিয়াৰৰ প্ৰথমখন টেষ্টৰ প্ৰথম ইনিংছত ৬১ৰানৰ বিনিময়ত দখল কৰিছিল ৮টাকৈ উইকেট। কেৱল এয়াই নহয় মেচখনৰ দ্বিতীয় ইনিংছতো পুনৰ ৮টা উইকেট দখল কৰিছিল হিৰৱানীয়ে।
মানৱ সুথৰৰ বাবে এয়া সুৱৰ্ণ সুযোগ
ইতিমধ্যে ৰবিচন্দ্ৰন অশ্বিনে সকলো ফৰ্মেটৰ ক্ৰিকেটৰ পৰা বিদায় লোৱাৰ উপৰিও ৰবীন্দ্ৰ জাদেজায়ো এতিয়া কেৰিয়াৰৰ বিদায় বেলাত উপনীত হৈছে। এই দুগৰাকী কিংবদন্তী অলৰাউণ্ডাৰৰ স্থান লোৱাৰ বাবে এক দীঘলীয়া পৰিক্ৰমা পাৰ কৰিব লাগিব যদিও টীম ইণ্ডিয়াত ক্ৰিকেটাৰ দুগৰাকীৰ খালী হোৱা স্থান পূৰণৰ এয়াই হয়টো হ’ব পাৰে আৰম্ভণি। তাৰ বাবে বল আৰু প্ৰয়োজনত বেটেৰেও মানৱ সুথৰে দেখুৱাব লাগিব সুন্দৰ প্ৰদৰ্শন। কিয়নো দীৰ্ঘদিনৰ পৰা ৱাশ্বিংটন সুন্দৰে ভাৰতৰ টেষ্ট দলটোত আছে যদিও শেহতীয়াকৈ বলতকৈ বেটেৰেহে কিছু প্ৰদৰ্শন দেখুৱাবলৈ সক্ষম হৈছে সুন্দৰে। ইপিনে কুলদ্বীপ যাদৱেও শেহতীয়াকৈ নিজৰ নামৰ বিপৰীতে বিশেষকৈ টেষ্ট ক্ৰিকেটত দেখুৱাব পৰা নাই উন্নত প্ৰদৰ্শন। সমান্তৰালভাৱে বেটিঙৰ দিশেৰে দলক সহায় কৰাৰ দৃষ্টিকোণেৰেও প্ৰতিযোগিতাত কুলদ্বীপ যাদৱতকৈ অনাগত দিনত নিঃসন্দেহে মানৱ সুথৰ আগত থাকিব। টেষ্ট ক্ৰিকেটত স্থান লাভৰ বাবে ঘৰুৱা ক্ৰিকেটত যে ধাৰাবাহিক উন্নত প্ৰদৰ্শন আগবঢ়োৱাটো যে নিত্যান্তই প্ৰয়োজনীয় তাকে প্ৰমাণ কৰি দেখুৱাইছে মানৱ সুথৰে। মানৱ সুথৰে এই পৰ্যন্ত ২৯খন প্ৰথম শ্ৰেণীৰ মেচত ২৫.৭৭ গঢ়ে দখল কৰিছে ১২৯টা উইকেট। আনহাতে প্ৰথম শ্ৰেণীত বেটেৰেও মানৱে এটা শতক আৰু ৫টা অৰ্ধশতকসহ নিজৰ নামত সংগ্ৰহ কৰিছে ৯৪৫ ৰান।
এই লেখাটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
