সম্প্ৰতি বিশ্বৰ বিভিন্ন প্ৰান্তত বহু মহিলা স্তন কেঞ্চাৰৰ সৈতে যুঁজি আছে। কেঞ্চাৰত কিশোৰী কালৰ পৰা আৰম্ভ কৰি বৃদ্ধ মহিলালৈকে সকলোৱে আক্ৰান্ত হ’ব পাৰে। স্তন কেঞ্চাৰ আৰু ইয়াৰ চিকিৎসাক লৈ আজিও মানুহৰ মাজত বহু ভুল ধাৰণা আৰু ভয় বিদ্যমান হৈ আছে। স্তন কেঞ্চাৰৰ প্ৰতিৰোধ আৰু চিকিৎসা সম্ভৱ, কিন্তু ইয়াৰ বাবে সঠিক তথ্য জনাটোও সমানেই গুৰুত্বপূৰ্ণ। একেদৰে লক্ষণসমূহ চিনাক্ত কৰা আৰু প্ৰতিৰোধৰ উপায়সমূহ বুজি পোৱাটোও অতি গুৰুত্বপূৰ্ণ। যদি কোনো মহিলাৰ স্তন কেঞ্চাৰ হয়, তেন্তে ই জৰুৰী নহয় যে স্তন আঁতৰাই পেলাবই লাগিব। এই সন্দৰ্ভত বিশেষজ্ঞ চিকিৎসকৰ মতে স্তন কেঞ্চাৰ হ’লেই স্তন আঁতৰাই পেলাব লাগিব বুলি কোনো কথা নাই। বৰ্তমান অনকোপ্লাষ্টিক ব্ৰেষ্ট কনজাৰ্ভিং ছাৰ্জাৰী নামৰ আধুনিক পদ্ধতিৰে অস্ত্ৰোপচাৰ কৰা হয়। যদি ৰোগীয়ে আৰম্ভণিৰ পৰ্যায়তে চিকিৎসকৰ ওচৰলৈ যায়, তেন্তে চিকিৎসকে কেৱল গাঁঠিটো আঁতৰাই স্তনটো পূৰ্বৰ আকৃতিৰ দৰে ৰখাৰ চেষ্টা কৰে।
পুৰুষৰো স্তন কেঞ্চাৰ হ’ব পাৰে নেকি?
হয়টো এই কথাটো বহু পুৰুষে অস্বাভাৱিক বুলি ভাবিব পাৰে, কিন্তু বিশেষজ্ঞ চিকিৎসকৰ মতে স্তন কেঞ্চাৰ কেৱল মহিলাসকলৰেই নহয়, পুৰুষসকলৰো হ’ব পাৰে। অৱশ্যে মহিলাৰ তুলনাত পুৰুষৰ ক্ষেত্ৰত ইয়াৰ অশংকা যথেষ্ট কম। মহিলাৰ স্তন কেঞ্চাৰৰ বিপৰীতে পুৰুষৰ ক্ষেত্ৰত এই আশংকা ১%তকৈ বেছি নহয়। দৰাচলতে পুৰুষৰো নিপলৰ তলত স্তন টিছ্যু থাকে, য’ত কেঞ্চাৰ বিকাশ হ’ব পাৰে। পুৰুষৰ স্তন কেঞ্চাৰৰো লক্ষণসমূহো মহিলাৰ দৰেই, যেনে—স্তনত গাঁঠি, নিপলৰ পৰা পানী বা অন্য কোনো তৰল পদাৰ্থ ওলোৱা অথবা নিপল ভিতৰলৈ সোমাই যোৱা।
স্তন কেঞ্চাৰৰ লক্ষণসমূহ কি কি?
স্তন কেঞ্চাৰৰ প্ৰাৰম্ভিক লক্ষণসমূহ চিনাক্ত কৰাটো অতি গুৰুত্বপূৰ্ণ। বুকুত বিহহীন গাঁঠিৰ বিকাশ হোৱা, নিপলৰ পৰা পানী বা অন্য তৰল পদাৰ্থ ওলোৱা, নিপল ভিতৰলৈ সোমাই যোৱা, বুকুৰ ছাল কঠিন বা ৰঙা হৈ যোৱা, স্তনৰ আকাৰ বা আকৃতিত পৰিৱৰ্তন দেখা পোৱা আদি স্তন কেঞ্চাৰৰ প্ৰাথমিক লক্ষণ হ’ব পাৰে। কিছুমান অভ্যাস আৰু শাৰীৰিক পৰিৱৰ্তনে স্তন কেঞ্চাৰৰ আশংকা বৃদ্ধি কৰিব পাৰে। কম বয়সতে ঋতুস্ৰাৱ আৰম্ভ হোৱা, মেদবহুলতা, সন্তান নোহোৱাৰ উপৰিও সন্তানক স্তনপান নকৰোৱা, একেবাৰে ব্যায়াম নকৰা, মদ, চিগাৰেট বা ধঁপাতৰ আসক্তি আদিৰ অভ্যাসে কেঞ্চাৰৰ আশংকা বৃদ্ধি কৰে। ইয়াৰ উপৰিও যদি পৰিয়ালৰ কোনো সদস্যৰ আগতে স্তন কেঞ্চাৰ হৈছিল, তেন্তে এই আশংকা অধিক বৃদ্ধি পায়
কিধৰণে স্তন কেঞ্চাৰৰ পৰা বাচি থাকিব পাৰি?
যদি শৰীৰত অধিক মেদ থাকে, তেন্তে ইয়াক কমাবলৈ চেষ্টা কৰক। বিশেষকৈ ঋতুস্ৰাৱ বন্ধ হোৱাৰ পিছত পেটৰ চাৰিওফালে চৰ্বি জমা হ’ব দিব নালাগে। ৩০ বছৰ বয়সৰ আগতে সন্তান জন্ম দিয়াটো উপকাৰী বুলি ধৰা হয় আৰু সন্তানক অন্ততঃ এবছৰ স্তনপান কৰাব লাগে। ইয়াৰ লগতে স্বাস্থ্যকৰ আহাৰ গ্ৰহণ আৰু প্ৰতিদিনে কিছু ব্যায়াম কৰাটোও অতি প্ৰয়োজনীয়। এনেধৰণৰ সৰু-সুৰা অভ্যাসবোৰে স্তন কেঞ্চাৰৰ আশংকা যথেষ্ট হ্ৰাস কৰিব পাৰে। ২০ বছৰ বয়সৰ পিছত প্ৰতিগৰাকী মহিলাই মাহত অন্তত এবাৰ নিজে নিজৰ স্তন পৰীক্ষা কৰা উচিত। ইয়াৰ ফলত শৰীৰৰ স্বাভাৱিক অৱস্থা বুজি পোৱা যায় আৰু যদি কোনো অস্বাভাৱিক পৰিৱৰ্তন ধৰা পৰে সোণকালেই চিকিৎসকৰ পৰামৰ্শ লওক। কিয়নো যিমান সোনকালে স্তনৰ পৰিৱৰ্তন ধৰা পৰিব, সিমানেই চিকিৎসা সহজ হ’ব। সেয়েহে কোনো সন্দেহজনক লক্ষণ দেখা দিলে পলম নকৰি চিকিৎসকৰ ওচৰলৈ যাব লাগে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
