আমেৰিকাৰ লছ এঞ্জেলছ ষ্টেডিয়ামত নিউজীলেণ্ডৰ বিৰুদ্ধে ২-২ৰ ব্যৱধানত ড্ৰ’ খেলি ফুটবল বিশ্বকাপৰ অভিযান আৰম্ভ কৰিছে যুদ্ধ বিধ্বস্ত দেশ ইৰানে। ইৰানৰ হৈ মেচখনৰ ৩২ মিনিটত ৰমিন ৰেজায়েইয়ানে প্ৰথমটো গ’ল কৰাৰ বিপৰীতে মহম্মদ মোহেবিয়ে ৬৪ মিনিটত দ্বিতীয়টো গ’ল স্ক’ৰ কৰে। আনহাতে নিউজীলেণ্ডৰ হৈ ইলিজা জাষ্টে দুয়োটা গ’ল স্ক’ৰ কৰে।
ষ্টেডিয়ামৰ বাহিৰত দেখা গৈছিল প্ৰতিবাদমুখৰ পৰিৱেশ
লছ এঞ্জেলছ ষ্টেডিয়ামত মেচখন আৰম্ভ হোৱাৰ পূৰ্বেৰে পৰা ষ্টেডিয়ামৰ বাহিৰত দেখা গৈছিল এক প্ৰতীকী প্ৰতিবাদমুখ পৰিৱেশ। ষ্টেডিয়ামৰ বাহিৰত সহস্ৰাধিক ইৰানী পতাকাই লহৰ তুলিছিল। ইয়াৰ ভিতৰত অধিকাংশই আছিল বিপ্লৱৰ পূৰ্বৰ সিংহ আৰু সূৰ্যৰ প্ৰতীক থকা ইৰানী পতাকা। বহু ইৰানী মূলৰ মাৰ্কিন নাগৰিকৰ বাবে পূৰ্বৰ এই পতাকাখন আছিল বৰ্তমান ইৰানী চৰকাৰৰ বিৰুদ্ধাচৰণৰ প্ৰতীক। আনহাতে খেল আৰম্ভ হোৱাৰ পূৰ্বতেই FIFAই ৰাজনৈতিক প্ৰতিবাদ বুলি গণ্য কৰি ষ্টেডিয়ামৰ ভিতৰত পূৰ্বৰ সেই ইৰানী পতাকাখনক নিষিদ্ধ ঘোষণা কৰিছিল কিন্তু তাৰ পিছতো বহু লোকৰ হাতত আৰু টি-চাৰ্টত পূৰ্বৰ সেই পতাকাখনৰ উপস্থিতি দেখা গৈছিল। আনহাতে ষ্টেডিয়ামৰ বাহিৰত বহু লোকে FIFAৰ এই সিদ্ধান্ত আৰু ইৰান চৰকাৰৰ বিৰুদ্ধে একত্ৰিত হৈ প্ৰতিবাদ সাব্যস্ত কৰা দেখা যায়। ষ্টেডিয়ামৰ বাহিৰত বৰ্তমানৰ ইৰান চৰকাৰৰ বিৰুদ্ধে ‘মোল্লাসকলৰ দল, মোৰ দল নহয়’, ‘ইৰানত শাসন পৰিৱৰ্তন লাগিব’ ধৰণৰ শ্লোগানেৰে পৰিৱেশ উত্তাল কৰি তোলা দেখা যায়।
লছ এঞ্জেলছ ষ্টেডিয়ামৰ বাহিৰ আৰু ভিতৰৰ পৰিৱেশৰ পাৰ্থক্য
ষ্টেডিয়ামৰ বাহিৰত ইৰান চৰকাৰ বিৰোধী শ্লোগানেৰে ইৰানী মূলৰ মাৰ্কিন নাগৰিকসকলে পৰিৱেশ উত্তাল কৰিলেও ষ্টেডিয়ামৰ ভিতৰৰ পৰিৱেশ আছিল সম্পূৰ্ণ ওলোটা। মেচখনৰ আৰম্ভণিৰ পৰাই ইৰানৰ খেলুৱৈসকলৰ সমৰ্থনত কঁপি উঠিছিল আমেৰিকাৰ লছ এঞ্জেলছ ষ্টেডিয়াম। তীব্ৰ উত্তেজনাপূৰ্ণ মেচখনত ইৰানে দুবাৰকৈ পিছ পৰি থাকিও অৱশেষত নিউজীলেণ্ডৰ বিৰুদ্ধে ২-২ গ’লত সমতা স্থাপন কৰে।
ফুটবলেই উভতাই আনক ইৰানী জনতাৰ ওঁঠলৈ হাঁহি
ষ্টেডিয়ামৰ গেলাৰীত হাজাৰ হাজাৰ ইৰানী পতাকাই বতাহৰ সৈতে লহৰ তুলিছিল। দূৰৰ পৰা সকলো পতাকা একে যেন লাগিলেও প্ৰতিখন পতাকাৰেই যেন আছিল একো একোটা কাহিনী। উপস্থিত দৰ্শকসকলৰ কিছুমানে ইছলামিক গণৰাজ্যৰ চৰকাৰী পতাকাক সন্মান প্ৰদৰ্শন কৰাৰ বিপৰীতে আন কিছুমানে সিংহ আৰু সূৰ্য চিহ্ন অংকিত ইৰানৰ পূৰ্বৰ পতাকাৰ প্ৰতি দেখুৱাইছিল সন্মান আৰু শ্ৰদ্ধা। পতাকাৰ ৰং ভিন্ন হ’লেও এই সকলো দৰ্শকৰ হৃদয়ত গুঞ্জৰিত হৈ আছিল এটাই নাম, ইৰান আৰু ইৰান। ইৰান বনাম নিউজীলেণ্ডৰ উপৰিও সমগ্ৰ ষ্টেডিয়ামখনতেই চলি আছিল অন্য এখন যুদ্ধ আৰু সেয়া আছিল ইৰান বনাম ইৰান। আমেৰিকাত বিগত কেইবাবছৰ ধৰি বসবাস কৰি থকা ইৰানী মূলৰ মাৰ্কিন নাগৰিকসকলৰ মতে তেওঁলোকে ষ্টেডিয়ামলৈ ইৰানক সমৰ্থন কৰিবলৈহে আহিছে, ইৰান চৰকাৰক নহয়। মেচখন আৰম্ভণিৰ পূৰ্বে যেতিয়া ইৰানৰ জাতীয় সংগীত বাজি উঠিছিল তেতিয়া আৱেগৰ চকুপানীৰে হাজাৰ হাজাৰ দৰ্শকৰ চকু ভৰি উঠিছিল। ফুটবলেই ইৰানক একত্ৰিত কৰক, ফুটবলেৰে হলেও ইৰানৰ কোটি কোটি যুদ্ধবিধ্বস্ত জনতাৰ ওঁঠত বিৰিঙ উঠক অলপ হাঁহি আৰু আনন্দ
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
