চীনে বিভিন্ন অত্যধুনিক প্ৰযুক্তি নিৰ্মাণেৰে প্ৰায়ে বিশ্ববাসীক চমক দিয়ে। এইবাৰ চীনে বায়ু প্ৰদূষণৰ ভয়ংকৰ সমস্যাৰ সৈতে মোকাবিলা কৰিবলৈ বিশ্বৰ অন্যতম বৃহৎ বায়ু-শোধন (Air Purification) প্ৰকল্প নিৰ্মাণ কৰিছে। চীনে ১০০ মিটাৰতকৈ অধিক উচ্চতাৰ এক বিশাল ‘এয়াৰ পিউৰিফায়াৰ টাৱাৰ’ উত্তৰ চীনৰ শ্বানশি প্ৰদেশৰ শ্বিয়ান চহৰত নিৰ্মাণ কৰি উলিয়াইছে। এই টাৱাৰটোক বিশ্বৰ আটাইতকৈ বৃহৎ বায়ু-শোধন ব্যৱস্থাসমূহৰ ভিতৰত অন্যতম বুলি গণ্য কৰা হৈছে। প্ৰকল্পটো চীনা বিজ্ঞান একাডেমীৰ Institute of Earth Environment-এ বিকশিত কৰিছে।
বায়ু প্ৰদূষণে ভয়ংকৰ সমস্যাৰূপে থিয় দিছে চীনত
দীৰ্ঘদিন ধৰি চীনৰ বহু চহৰত ঔদ্যোগিক উৎপাদন, কয়লাৰ ব্যৱহাৰ, যান-বাহনৰ ধোঁৱা আৰু নিৰ্মাণ কাৰ্যৰ বাবে বায়ু প্ৰদূষণ অত্যন্ত বৃদ্ধি পাইছিল। বিশেষকৈ শীতকালত চীনৰ বহু চহৰ ধূলি-ধোঁৱাৰ ঘন আচ্ছাদনে আৱৰি পেলায়। ইয়াৰ ফলত লাখ লাখ লোকে শ্বাস-প্ৰশ্বাসজনিত ৰোগ, হৃদৰোগ, হাঁপানি আদি সমস্যাত আক্ৰান্ত হোৱা দেখা যায়। এই পৰিস্থিতিৰ পৰা পৰিত্ৰান পাবলৈ চীনা বিজ্ঞানীসকলে এই অভিনৱ আৰু পৰিৱেশৰ অনুকুলে সমাধান বিচাৰি উলিয়াইছে।
বায়ু-শোধন টাৱাৰটোৰ গঠন আৰু আকাৰ
এই টাৱাৰটোৰ উচ্চতা ১০০ মিটাৰতকৈও বেছি অৰ্থাৎ প্ৰায় ২০ মহলীয়া অট্টালিকাৰ সমান। টাৱাৰটোৰ তলৰ অংশত বৃহৎ কাঁচেৰে নিৰ্মিত গ্ৰীণহাউছ স্থাপন কৰা হৈছে, যাৰ আয়তন কেইবা হাজাৰ বৰ্গমিটাৰ জুৰি বিস্তৃত। ইয়াৰ লক্ষ্য হৈছে বায়ুক স্বাভাৱিকভাৱে ওপৰলৈ উঠিবলৈ সহায় কৰা আৰু সেই সময়তে বিভিন্ন স্তৰৰ ফিল্টাৰৰ জৰিয়তে বায়ু পৰিষ্কাৰ কৰা।
টাৱাৰটোৱে কেনেকৈ কাম কৰিব?
সাধাৰণ এয়াৰ পিউৰিফায়াৰৰ দৰে এই টাৱাৰটো সম্পূৰ্ণৰূপে বিদ্যুতৰ ওপৰত নিৰ্ভৰশীল নহয়। ইয়াৰ কাম কৰাৰ প্ৰক্ৰিয়াটো যথেষ্ট অভিনৱ—টাৱাৰৰ তলত থকা কাঁচৰ গ্ৰীণহাউছসমূহত চাৰিওফালৰ প্ৰদূষিত বায়ু প্ৰৱেশ কৰে। সূৰ্যৰ পোহৰ কাঁচৰ মাজেৰে প্ৰৱেশ কৰি ভিতৰৰ বায়ুক উত্তপ্ত কৰে। উত্তপ্ত বায়ু স্বাভাৱিকভাৱে ওপৰলৈ উঠিবলৈ আৰম্ভ কৰে। ওপৰলৈ উঠি যোৱাৰ সময়ত বায়ু বহু স্তৰৰ উচ্চ-ক্ষমতাসম্পন্ন ফিল্টাৰৰ মাজেৰে পাৰ হয়। এই ফিল্টাৰসমূহে ধূলিকণা, ধোঁৱা, ক্ষতিকাৰক PM2.5 কণা আৰু অন্যান্য দুষিত পদাৰ্থ আঁতৰায় পেলায়। ফিল্টাৰ কৰা বায়ু টাৱাৰৰ ওপৰৰ অংশৰ পৰা পুনৰ পৰিৱেশলৈ এৰি দিয়া হয়। এই সমগ্ৰ ব্যৱস্থাত সূৰ্য শক্তি ব্যৱহাৰ হোৱাৰ বাবে দিনৰ ভাগত অতি কম পৰিমাণৰ বাহ্যিক শক্তিৰ প্ৰয়োজন হয়।
গৱেষকসকলৰ মতে, এই টাৱাৰটোৰ প্ৰতিদিনে প্ৰায় ১ কোটি ঘন মিটাৰ (১০ মিলিয়ন কিউবিক মিটাৰ) বায়ু পৰিষ্কাৰ কৰাৰ ক্ষমতা আছে। এই পৰিমাণৰ বায়ু এটা বৃহৎ নগৰাঞ্চলৰ বায়ুৰ গুণগত মান উন্নত কৰাত যথেষ্ট সহায়ক বুলি ধৰা হয়।
শ্বিয়ান চহৰৰ এই বিশাল এয়াৰ পিউৰিফায়াৰ টাৱাৰটো আধুনিক পৰিৱেশ প্ৰযুক্তিৰ এক ব্যতিক্ৰমী উদাহৰণ। সৌৰশক্তিৰ সহায়ত প্ৰতিদিনে কোটি কোটি ঘন মিটাৰ বায়ু পৰিষ্কাৰ কৰাৰ ধাৰণাই বিশ্বজুৰি বিজ্ঞানীসকলৰ দৃষ্টি আকৰ্ষণ কৰিছে। যদিও এই প্ৰযুক্তিয়ে বায়ু প্ৰদূষণ সম্পূৰ্ণৰূপে নিৰ্মূল কৰিব নোৱাৰে, তথাপি ই স্মগ আৰু ক্ষতিকাৰক কণাৰ মাত্ৰা হ্ৰাস কৰাত এক গুৰুত্বপূৰ্ণ সহায়ক ব্যৱস্থা হিচাপে পৰিগণিত হৈছে। ভৱিষ্যতে যদি এই প্ৰযুক্তি অধিক উন্নত হয়, তেন্তে বিশ্বৰ বহু প্ৰদূষিত চহৰৰ বাবে ই এক নতুন আশা কঢ়িয়াই আনিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
