বহুতে বিশ্বাস কৰে যে এবাৰ চুলিত ৰং ব্যৱহাৰ কৰিলে লাহে লাহে সকলো চুলি বগা হৈ যায় আৰু তাৰ পিছত নিয়মীয়াকৈ ৰুট টাচ-আপ কৰিবলগীয়া হয়। কিন্তু এই ধাৰণাটো বৈজ্ঞানিকভাৱে সঠিক নহয়। চুলি বিশেষজ্ঞ তথা ডাৰ্মেট’লজিষ্টসকলৰ মতে, চুলিৰ ৰংঙে পোনপটীয়াকৈ চুলি বগা নকৰে। ৰঙে কেৱল মূৰৰ ছালৰ ওপৰত ওলাই থকা চুলিৰ অংশত কাম কৰে, আনহাতে চুলিৰ ৰং নিৰ্ধাৰণ হোৱা প্ৰক্ৰিয়া আৰম্ভ হয় মূৰৰ ছালৰ তলত থকা হেয়াৰ ফলিক’লত। সেয়ে চুলিৰ ৰং এবাৰ কৰিলে পিছলৈ বাকী থকা ক’লা চুলিবোৰো বগা হৈ যায় বুলি কোনো প্ৰত্যক্ষ বিজ্ঞানসন্মত তথ্য নাই। বহুতে লক্ষ্য কৰে যে চুলিত লগোৱা ৰং লাহে লাহে মচি যোৱাৰ পিছত চুলি বগা দেখা যায়। তেতিয়া তেওঁলোকে ভাবে যে ৰঙৰ বাবেই চুলি বগা হৈছে। কিন্তু বাস্তৱত চুলি বগা হোৱাৰ প্ৰক্ৰিয়া আগতেই আৰম্ভ হৈছিল। ৰঙে কেৱল সেই বগা চুলিবোৰ সাময়িকভাৱে ওপৰে ওপৰে ক’লা কৰে। ৰং আঁতৰি যোৱাৰ পিছত স্বাভাৱিকভাৱে বগা চুলিবোৰ পুনৰ দৃশ্যমান হয়।
কি কি কাৰণত চুলি বগা হয়?
চুলিৰ স্বাভাৱিক ৰং নিৰ্ভৰ কৰে মেলানিন নামৰ ৰঞ্জকৰ ওপৰত। হেয়াৰ ফলিক’লত থকা মেলানোচাইট কোষে এই মেলানিন উৎপাদন কৰে। যেতিয়ালৈকে এই কোষসমূহে যথেষ্ট মেলানিন উৎপাদন কৰে, তেতিয়ালৈকে নতুনকৈ গজা চুলি ক’লা বা স্বাভাৱিক ৰঙৰেই থাকে। কিন্তু মেলানিন উৎপাদন কমি গ’লে নতুনকৈ গজা চুলি বগা হ’বলৈ আৰম্ভ কৰে। এই প্ৰক্ৰিয়াত হেয়াৰ কালাৰৰ কোনো ভূমিকা নাথাকে। চুলি বগা হোৱাৰ কেইবাটাও মূল কাৰণ আছে। বয়স বৃদ্ধি হ’লে মেলানিন উৎপাদনৰ ক্ষমতা স্বাভাৱিকভাৱে কমি যায়। ইয়াৰ উপৰিও বংশগত বৈশিষ্ট্য, দীৰ্ঘদিনীয়া মানসিক চাপ, অপুষ্টি, বিশেষকৈ ভিটামিন ডি, ভিটামিন বি-১২, বায়’টিন আৰু আইৰণৰ অভাৱ, লগতে অক্সিডেটিভ ষ্ট্ৰেছ আদিয়েও চুলি সোনকালে বগা কৰিব পাৰে। ধূমপান, অত্যধিক ৰ’দ, প্ৰদূষণ আৰু শৰীৰত দীৰ্ঘদিনীয়া প্ৰদাহ থাকিলেও এই সমস্যাৰ আশংকা বৃদ্ধি পায়।
চুলিৰ ৰঙৰ প্ৰকাৰসমূহ
চুলিৰ ৰঙৰো বিভিন্ন প্ৰকাৰ আছে। সাময়িক চুলিৰ ৰঙে চুলিৰ ওপৰত মাত্ৰ এখন আৱৰণ সৃষ্টি কৰে, যি কেইবাবাৰ চেম্পু কৰাৰ পিছত আঁতৰি যায়। ছেমি-পাৰ্মানেণ্ট কলাৰে চুলিৰ ভিতৰলৈ কিছু পৰিমাণে প্ৰৱেশ কৰি ৰং দিয়ে, কিন্তু সময়ৰ লগে লগে ইয়াৰ প্ৰভাৱো কমি যায়। পাৰ্মানেণ্ট হেয়াৰ কলাৰে ৰাসায়নিক পদাৰ্থৰ সহায়ত চুলিৰ কিউটিক’ল খুলি ৰং গভীৰভাৱে প্ৰৱেশ কৰায়, যাৰ ফলত ৰং বহুদিন স্থায়ী হয়। কিন্তু এই ৰঙো মূৰৰ ছালৰ তলত থকা হেয়াৰ ফলিক’ল বা DNAত কোনো প্ৰভাৱ পেলাব নোৱাৰে।
কেনেধৰণৰ চুলিৰ ৰং ব্যৱহাৰ কৰিব?
যদিও চুলিৰ ৰঙেৰে চুলি বগা নকৰে, তথাপিও নিম্নমানৰ বা বাৰে বাৰে ব্যৱহাৰ কৰা পাৰ্মানেণ্ট হেয়াৰ কলাৰে চুলি আৰু মূৰৰ ছালৰ ক্ষতি কৰিব পাৰে। ইয়াত থকা হাইড্ৰ’জেন পেৰাক্সাইডে চুলিৰ স্বাভাৱিক ৰং হ্ৰাস কৰে আৰু বাৰে বাৰে ব্যৱহাৰ কৰিলে অক্সিডেটিভ ষ্ট্ৰেছ বৃদ্ধি কৰিব পাৰে। এম’নিয়াই চুলিৰ কিউটিক’ল খুলি দিয়াৰ ফলত চুলি শুকান, নিৰ্জীৱ আৰু সহজে ভাঙি যোৱা হয়। আনহাতে, পি.পি.ডি. (PPD) নামৰ ৰাসায়নিক পদাৰ্থই সংবেদনশীল ছালত এলাৰ্জি, খজুৱতি, জ্বলনৰ সৃষ্টি কৰিব পাৰে।
সেয়েহে চুলিৰ ৰং বাছনি কৰাৰ সময়ত এম’নিয়া-মুক্ত আৰু PPD-মুক্ত সামগ্ৰী বাছনি কৰা উচিত। কম পেৰাক্সাইডযুক্ত, ছেমি-পাৰ্মানেণ্ট বা উদ্ভিদ-ভিত্তিক চুলিৰ ৰং যেনে উন্নত মানৰ হেনা ব্যৱহাৰ কৰাটো অধিক নিৰাপদ। ৰঙৰ ব্যৱহাৰৰ আগতে সদায় পেচ টেষ্ট কৰাটো প্ৰয়োজনীয়। যিসকলৰ মূৰৰ ছাল সংবেদনশীল, তেওঁলোকে অত্যধিক চুলিৰ ৰঙৰ ব্যৱহাৰৰ পৰা বিৰত থাকিব লাগে। দীৰ্ঘদিন চুলি ক’লা আৰু সুস্থ ৰাখিবলৈ কেৱল হেয়াৰ কালাৰৰ ওপৰত নিৰ্ভৰ নকৰি সুষম আহাৰ, পৰ্যাপ্ত পুষ্টি, মানসিক চাপ নিয়ন্ত্ৰণ আৰু সুস্থ জীৱনশৈলী বজাই ৰখাটো অতি প্ৰয়োজনীয়। যদি চুলিৰ ৰং ব্যৱহাৰৰ পিছত চুলি বেছিকৈ সৰে, ভাঙে, পাতল হয় অথবা মূৰৰ ছালত খজুৱতি, জ্বলা-পোৰা বা এলাৰ্জিৰ সমস্যা দেখা দিয়ে, তেন্তে তৎক্ষণাত এজন ডাৰ্মেট’লজিষ্টৰ পৰামৰ্শ লোৱা উচিত।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
