আজিৰে পৰা ভাৰত-ইংলেণ্ডৰ মাজত ৫খন T20 মেচৰ শৃংখলাটো আৰম্ভ হ’ব। শৃংখলাৰ প্ৰথমখন T20 মেচ চেষ্টাৰ-লে- ষ্ট্ৰীটত অনুষ্ঠিত হ’ব। শৃংখলাৰ প্ৰথমখন মেচ আৰম্ভ হোৱাৰ আগতেই ক্ৰিকেট মহলত পুনৰবাৰ চৰ্চিত হৈ আছে এটাই প্ৰশ্ন- বৈভৱ সূৰ্যবংশীয়ে আজি সুযোগ পাবনে? মাত্ৰ ১৫ বছৰ বয়সতে ভাৰতীয় ছিনিয়ৰ দলত স্থান লাভ কৰা বিস্ফোৰক বেটাৰ বৈভৱে চেষ্টাৰ-লে-ষ্ট্ৰীটত ইতিহাস ৰচিব নেকি? এই প্ৰশ্নই এতিয়া সামাজিক মাধ্যমৰ পৰা আৰম্ভ কৰি ক্ৰিকেট অনুৰাগীৰ মাজত তীব্ৰ চৰ্চাৰ বিষয় হৈ পৰিছে।
বৈভৱৰ ছ’চিয়েল মিডিয়াত বিশেষ ইংগিত
যদিও বৈভৱে আজি মূল একাদশত স্থান পাব নে নাই সেয়া নিশ্চিত হোৱা নাই, তথাপিও বিস্ময় বালকজনৰ ছ’চিয়েল মিডিয়াৰ এটা পোষ্টে নতুনকৈ অনুৰাগীৰ হৃদয়ত আশাৰ সঞ্চাৰ দিছে। মেচৰ পূৰ্বে ইংলেণ্ড ভ্ৰমণৰ কেইবাখনো ছবি শ্বেয়াৰ কৰি বৈভৱে কেৱল ‘Grateful’ বুলি এটা শব্দ লিখিছে।
ইয়াৰ লগতে সংযোজন কৰে এটা Hourglassৰ ইম’জি। ‘কৃতজ্ঞ’ হোৱা মানে বৈভৱে আজি মূল একাদশত স্থান পাব বুলি জানিয়েই এনেকৈ ‘কৃতজ্ঞ’ বুলি লিখিছে নেকি? তাকে লৈ অনুৰাগীৰ মনত আশাৰ সঞ্চাৰ ঘটিছে। আনহাতে বৈভৱে নিজৰ ফটো পোষ্টত আকৌ একেলগে Hourglassৰ ইমোজিটোও সংযোজন কৰিছে। Hourglass মানে আৰু অধিক অপেক্ষা কৰিব লাগিব নেকি বুলিও মত পোষণ কৰিছে একাংশ অনুৰাগীয়ে।
শ্ৰেয়াছ আয়াৰৰ মন্তব্যক লৈ অসন্তুষ্ট অনুৰাগী
ইপিনে মেচৰ পূৰ্বে অনুষ্ঠিত সংবাদমেলত অধিনায়ক শ্ৰেয়াছ আয়াৰে বৈভৱৰ অভিষেক সম্পৰ্কে কোনো স্পষ্ট মন্তব্য নকৰাত অনুৰাগীৰ হতাশা বৃদ্ধি পাইছে। সাংবাদিকৰ আগত শ্ৰেয়াছ আয়াৰে কৰা মন্তব্যৰ ভিডিঅ’ সামাজিক মাধ্যমত দ্ৰুতগতিত ভাইৰেল হৈছে। বহু অনুৰাগীয়ে দল পৰিচালনা, প্ৰশিক্ষক আৰু নেতৃত্বৰ ওপৰত অসন্তুষ্টি প্ৰকাশ কৰিছে। অৱশ্যে ভাৰতীয় ক্ৰিকেটত সাধাৰণতে মেচৰ আগদিনাই কোনো খেলুৱৈৰ অভিষেক আনুষ্ঠানিকভাৱে ঘোষণা কৰাৰ নজিৰ অতি কম। সেয়েহে বৈভৱে খেলিব নে নাই, সেই সিদ্ধান্ত মেচ আৰম্ভ হোৱাৰ প্ৰায় আধা ঘণ্টা পূৰ্বে টছৰ পিছতেই স্পষ্ট হ’ব।
উল্লেখ্য, IPL ২০২৬ত বিস্ফোৰক প্ৰদৰ্শন কৰি ৭৭৬ ৰান সংগ্ৰহ কৰাৰ পিছত বৈভৱ সূৰ্যবংশীয়ে প্ৰথমবাৰৰ বাবে ভাৰতীয় জ্যেষ্ঠ দলত সুযোগ লাভ কৰে। আয়াৰলেণ্ড ভ্ৰমণত তেওঁৰ অভিষেক প্ৰায় নিশ্চিত বুলি ধৰা হৈছিল যদিও দুয়োখন টি-২০ মেচতে তেওঁ বেঞ্চতে বহি থাকিবলগীয়া হয়। ভাৰতে সেই দুয়োখন মেচতে পৰাজিত হোৱাত দল পৰিচালনাৰ সিদ্ধান্তক লৈ তীব্ৰ সমালোচনা হৈছিল।
এতিয়া সকলোৰে দৃষ্টি প্ৰথম টি-২০ৰ প্লেয়িং ইলেভেনৰ ওপৰত। যদি বৈভৱে এই মেচত সুযোগ লাভ কৰে, তেন্তে মাত্ৰ ১৫ বছৰ বয়সতে ভাৰতৰ হৈ আন্তঃৰাষ্ট্ৰীয় ক্ৰিকেটত অভিষেক ঘটোৱা অন্যতম কনিষ্ঠ খেলুৱৈ হিচাপে তেওঁ নতুন ইতিহাস ৰচিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
