৩৫ বছৰ বয়স পাৰ হোৱাৰ পিছতে চাকৰিৰ দৰমহাকেইটাই সমগ্ৰ পৰিয়ালৰ দায়িত্ব বহন কৰাৰ এক গুৰুত্বপূৰ্ণ আধাৰ হৈ পৰে। লাহে লাহে সন্তানৰ শিক্ষা, বাহন, গৃহকে ধৰি বিভিন্ন সৰু-ডাঙৰ সম্পত্তিৰ বাবে লোৱা ঋণৰ কিস্তি, পিতৃ-মাতৃৰ চিকিৎসা আৰু প্ৰতিমাহে বিভিন্ন সমস্যাৰ বাবে বাঢ়ি অহা খৰচৰ মাজত যদি হঠাতে চাকৰি হেৰুৱাবলগীয়া হয়, তেন্তে পৰিস্থিতি কেনেকুৱা হ’ব আপোনাৰ? এই প্ৰশ্নই আজিকালি বহু ব্যক্তিগত চাকৰিয়ালৰ মনত উদ্বেগ আৰু মানসিক চাপৰ সৃষ্টি কৰে। কিন্তু এই ভয়ত জীৱন কটোৱাৰ পৰিৱৰ্তে আগতীয়াকৈ কিছুমান প্ৰস্তুতি ল’লে কঠিন সময়তো আত্মবিশ্বাস অটুট ৰাখিব পাৰি।
প্ৰথমে এটা জৰুৰীকালীন জমা (Emergency Fund) গঢ়ি তোলক
যদি আপোনাৰ সমগ্ৰ জীৱন কেৱল মাহিলী দৰমহাৰ ওপৰত নিৰ্ভৰশীল হ’বলগীয়া হয়, তেন্তে চাকৰি হেৰুৱাৰ ভয় অধিক অনুভৱ হ’ব। সেয়ে অন্ততঃ ৬ মাহৰ অত্যাৱশ্যকীয় খৰচৰ সমান ধন জৰুৰীকালীন সময়ৰ বাবে জমা ৰাখিবলৈ চেষ্টা কৰক। ইয়াত ঘৰুৱা ব্যয়, EMI, সন্তানৰ স্কুলৰ মাচুল আৰু অন্যান্য অপৰিহাৰ্য খৰচসমূহ অন্তৰ্ভুক্ত কৰক। এনে সঞ্চয়ে সংকটৰ সময়ত চিন্তা ভাবনা কৰি সিদ্ধান্ত ল’বলৈ সময় দিয়ে।
নতুন দক্ষতা আহৰণ কেতিয়াও বন্ধ নকৰিব
বৰ্তমানৰ চাকৰিৰ বজাৰ দ্ৰুতগতিত সলনি হৈ আছে। নতুন প্ৰযুক্তি, কৃত্ৰিম বুদ্ধিমত্তা (AI) আৰু কাম কৰাৰ ধৰণ অহৰহ পৰিবৰ্তন হৈছে। সেয়ে ৩৫ বছৰ বয়স মানেই সকলো শিকি শেষ হোৱা নহয়; বৰং নিজকে সময়ৰ সৈতে খাপ খুৱাই সদায় নতুন দক্ষতা আয়ত্ত কৰাৰ সময়। নিজে কাম কৰা ক্ষেত্ৰখনৰ নতুন জ্ঞান আৰু দক্ষতা আহৰণ কৰিলে নতুন সুযোগ বিচাৰি উলিওৱা সহজ হয় আৰু আত্মবিশ্বাসো বৃদ্ধি পায়।
কেৱল দৰমহাৰ ওপৰতে সম্পূৰ্ণ নিৰ্ভৰশীল নহ’ব
সম্ভৱ হ’লে উপাৰ্জনৰ এটা বিকল্প উৎস গঢ়ি তোলক। ইয়াৰ বাবে ডাঙৰ ব্যৱসায় আৰম্ভ কৰিব লাগিব বুলিয়েই কোনো কথা নাই। বৰঞ্চ ডাঙৰ ব্যৱসায়ত আপুনি সম্পূৰ্ণ সময় দিলেহে ভাল ফলাফল লাভ কৰিব। গতিকে দিনটোৰ ৩/৪ ঘণ্টা সময় দি সৰু ব্যৱসায় চাকৰিৰ লগে লগে চলাই নিব পাৰি নেকি চেষ্টা কৰিব চাব পাৰে। তেনে ব্যৱসায় অতি কম মূলধেনেৰে আৰম্ভ কৰিব পৰা তেনে বহু ব্যৱসায় আছে। দৰমহাৰ লগে লগে তেনে সৰু ব্যৱসায়ৰ পৰাও কিছু ধন আপোনাৰ হাতলৈ আহিব। ইয়াৰ উপৰিও ফ্ৰিলেঞ্চিং, পৰামৰ্শদাতা (Consulting) হিচাপে কাম কৰা, অনলাইন সেৱা, ব্যক্তিগত শিক্ষক হিচাপে কাম কৰা অথবা নিজৰ বিশেষ দক্ষতাৰ জৰিয়তে অতিৰিক্ত আয় কৰিও ভৱিষ্যতৰ অনিশ্চয়তাৰ সময়ত সহায় লাভ কৰিব পাৰি। ইয়াৰ ফলত প্ৰয়োজনৰ সময়ত আন এটা বিকল্প পথ হাতত থকাৰ নিশ্চয়তা থাকে।
পেছাদাৰী সম্পৰ্ক শক্তিশালী কৰি ৰাখক
বহুতে একেটা প্ৰতিষ্ঠানত দীঘলীয়া সময় কাম কৰাৰ পিছত পুৰণি সহকৰ্মী বা উদ্যোগৰ লোকসকলৰ সৈতে যোগাযোগ কমাই দিয়ে। কিন্তু শক্তিশালী পেছাদাৰী নেটৱৰ্কে বহু সময়ত নতুন চাকৰি বা নতুন সুযোগ লাভ কৰাত গুৰুত্বপূৰ্ণ ভূমিকা পালন কৰে। সেয়ে পুৰণি সহকৰ্মীসকলৰ সৈতে নিয়মিত যোগাযোগ ৰাখক আৰু পেছাদাৰী প্লেটফৰ্মসমূহতো সক্ৰিয় উপস্থিতি বজাই ৰাখক।
স্বাস্থ্য আৰু স্বাস্থ্য বীমাক অৱহেলা নকৰিব
চাকৰি হেৰুৱালে কেৱল দৰমহাই নহয়, বহু ক্ষেত্ৰত কোম্পানীয়ে আগবঢ়োৱা চিকিৎসা বীমাৰ সুবিধাও বন্ধ হৈ যায়। সেয়ে আগতীয়াকৈ ব্যক্তিগত স্বাস্থ্য বীমা (Health Insurance) গ্ৰহণ কৰাটো বুদ্ধিমানৰ কাম। লগতে মানসিক চাপ হ্ৰাস কৰিবলৈ পৰ্যাপ্ত নিদ্ৰা, নিয়মীয়া ব্যায়াম আৰু সুস্থ জীৱন শৈলী অনুসৰণ কৰাটোও সমানেই গুৰুত্বপূৰ্ণ। শৰীৰ আৰু মন দুয়োটা সুস্থ থাকিলে যিকোনো কঠিন পৰিস্থিতিৰ সন্মুখীন হোৱাটো সহজ হয়।
ভয় নহয়, প্ৰস্তুতিয়েই হ’ল সফলতাৰ চাবিকাঠি
চাকৰি সদায় থাকিব নে নাথাকিব, সেয়া আমাৰ নিয়ন্ত্ৰণত নাথাকে। কিন্তু সেই সম্ভাৱ্য পৰিস্থিতিৰ বাবে আগতীয়াকৈ প্ৰস্তুতি লোৱাটো সম্পূৰ্ণৰূপে আমাৰ হাতত আছে। যদি আপোনাৰ হাতত পৰ্যাপ্ত সঞ্চয় থাকে, নতুন দক্ষতা থাকে, শক্তিশালী পেছাদাৰী সম্পৰ্ক থাকে আৰু বিকল্প উপাৰ্জনৰ ব্যৱস্থাও থাকে, তেন্তে চাকৰি হেৰুৱাৰ ভয় বহু পৰিমাণে কমি যায়। সেয়ে ভৱিষ্যতৰ অমূলক চিন্তাত বৰ্তমানৰ শান্তি নষ্ট নকৰি, প্ৰতিটো পৰিস্থিতিৰ বাবে নিজকে সাজু কৰি ৰখাটোৱেই হ’ল প্ৰকৃত দূৰদৰ্শিতা আৰু বুদ্ধিমত্তাৰ পৰিচয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
