২১ বছৰৰ পৰা ৬০ বছৰ বয়সৰ মহিলাসকলৰ বাবে সুখবৰ। এই বয়সৰ মহিলালৈ চৰকাৰে আগবঢ়াব মাহিলী ২৫০০ টকাকৈ। ৰাখী বন্ধনৰ সময়ত চৰকাৰে আৰম্ভ কৰিব এই অভিলাষী আঁচনি। অৱশ্যে এই বয়সৰ ভিতৰত থাকিলেও সকলো মহিলাই এই আঁচনিৰ ধন নাপাব। বিশেষ পৰিয়ালৰ বিশেষ মহিলাইহে লাভ কৰিব এই আঁচনিৰ ধন।
কোনবোৰ মহিলাই লাভ কৰিব এই আঁচনিৰ সুবিধা?
বৈঠকত আঁচনিখনৰ যোগ্যতাৰ মানসমূহো বিস্তৃতভাৱে আলোচনা কৰা হয়। সিদ্ধান্ত অনুসৰি— আবেদনকাৰী মহিলা বা তেওঁৰ পৰিয়াল কমেও ১০ বছৰ ধৰি দিল্লীৰ স্থায়ী বাসিন্দা হ’ব লাগিব। আবেদনকাৰী অথবা তেওঁৰ পৰিয়ালৰ বিৰুদ্ধে কোনো ধৰণৰ অপৰাধমূলক ৰেকৰ্ড থাকিব নালাগে। এটা পৰিয়ালৰ জ্যেষ্ঠ মহিলাগৰাকীহে এই আঁচনিৰ বাবে যোগ্য হ’ব। এটা পৰিয়ালৰ মাত্ৰ এগৰাকী মহিলাই এই সুবিধা লাভ কৰিব পাৰিব। পৰিয়ালৰ বাৰ্ষিক আয় ২.৫ লাখ টকাৰ অধিক হলে নাপাব এই আঁচনিৰ ধন। যিসকল মহিলা ইতিমধ্যে চৰকাৰৰ কোনো পেঞ্চন বা নিয়মীয়া আৰ্থিক সহায়তা লাভ কৰি আছে, তেওঁলোক এই আঁচনিৰ বাবে যোগ্য নহ’ব। চাৰিচকীয়া বাহন থকা পৰিয়ালৰ মহিলায়ো এই আঁচনিৰ সুবিধা লাভ নাপাব।
আঁচনিক লৈ বিষয়াসকলক মুখ্যমন্ত্ৰীৰ কঠোৰ নিৰ্দেশ
অৱশ্যে এই আঁচনিখন আমাৰ অসমৰ মহিলাসকলৰ বাবে নহয়। দিল্লীৰ মহিলাসকলৰ বাবেহে দিল্লী চৰকাৰে ঘোষণা কৰিছে এই আঁচনি। আঁচনিখনৰ নাম হৈছে ‘দিল্লী লক্ষ্মী যোজনা’। দিল্লী চৰকাৰৰ মহিলা সমৃদ্ধি আঁচনিৰ নাম সলনি কৰি পুনৰাই এই আঁচনিৰ শুভাৰম্ভ কৰাৰ কথা ঘোষণা কৰে দিল্লী চৰকাৰে। এই আঁচনিক লৈ মুখ্যমন্ত্ৰী ৰেখা গুপ্তাই সোমবাৰে দিল্লী সচিবালয়ত এখন উচ্চস্তৰীয় পৰ্যালোচনা বৈঠকত সভাপতিত্ব কৰে। বৈঠকত মুখ্য সচিব ৰাজীৱ বর্মাকে ধৰি সংশ্লিষ্ট বিভাগসমূহৰ জ্যেষ্ঠ বিষয়াসকল উপস্থিত আছিল। মুখ্যমন্ত্ৰীয়ে বিষয়াসকলক স্পষ্ট নিৰ্দেশ দিয়ে যে আঁচনিৰ সুবিধা যাতে সম্পূৰ্ণ স্বচ্ছ, সহজ আৰু সময়মতে প্ৰকৃত হিতাধিকাৰী মহিলাসকলৰ ওচৰলৈ পৌঁছে, আৰু ৰূপায়ণ প্ৰক্ৰিয়াত কোনো ধৰণৰ প্ৰশাসনিক বাধা নাহে।
মহিলা সশক্তিকৰণেই এই আঁচনিৰ মূল উদ্দেশ্য
মুখ্যমন্ত্ৰী ৰেখা গুপ্তাই কয় যে প্ৰধানমন্ত্ৰী নৰেন্দ্ৰ মোদীৰ নেতৃত্বত মহিলা সশক্তিকৰণ কেৱল সামাজিক দায়বদ্ধতা নহয়, ই উন্নত ভাৰত গঢ়াৰ অন্যতম ভেটি হিচাপে পৰিগণিত হৈছে। তেওঁৰ মতে, প্ৰধানমন্ত্ৰীয়ে সদায়েই মহিলাৰ নেতৃত্বাধীন উন্নয়নক দেশৰ অগ্ৰগতিৰ আটাইতকৈ ফলপ্ৰসূ মাধ্যম হিচাপে গুৰুত্ব দি আহিছে। সেই আদৰ্শক আগুৱাই নিয়েই দিল্লী চৰকাৰে ‘দিল্লী লক্ষ্মী যোজনা’ৰ জৰিয়তে ৰাজধানীৰ মহিলাসকলক আৰ্থিকভাৱে স্বাৱলম্বী, সবল আৰু সন্মানজনক জীৱন যাপনৰ সুযোগ প্ৰদান কৰিব বিচাৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
