ধৰ্মেন্দ্ৰ প্ৰধানে কেন্দ্ৰীয় শিক্ষামন্ত্ৰীৰ পদ ত্যাগ কৰাৰ পিছতে এইবাৰ CJPৰ প্ৰতিষ্ঠাপক অভিজিৎ দীপকেই দেশৰ কেন্দ্ৰীয় গৃহমন্ত্ৰী অমিত শ্বাহৰ পদত্যাগৰ দাবী উত্থাপন কৰিছে। দীপকেই অভিযোগ কৰে যে-২০ জুলাই অনুষ্ঠিত “সংসদ চলো” সমদলত অংশগ্ৰহণ কৰা ছাত্ৰ-ছাত্ৰীৰ ওপৰত আৰক্ষীয়ে কৰা কঠোৰ ব্যৱস্থা কেৱল কেন্দ্ৰীয় গৃহমন্ত্ৰী অমিত শ্বাহৰ নিৰ্দেশতেই হ’ব পাৰে। তেওঁ এই ঘটনাৰ দায় স্বীকাৰ কৰি অমিত শ্বাহে পদত্যাগ কৰিব লাগে বুলি দাবী জনায়। উল্লেখ্য যে কংগ্ৰেছ নেতা ৰাহুল গান্ধীৰ অমিত শ্বাহৰ পদত্যাগৰ দাবীক সমৰ্থন জনাই দীপকেই কয় যে-প্ৰতিবাদী ছাত্ৰ-ছাত্ৰীসকলৰ ওপৰত বল প্ৰয়োগৰ নিৰ্দেশ দিয়াৰ বাবে কেন্দ্ৰীয় গৃহমন্ত্ৰীয়েই দায়ী।
অভিজিৎ দীপকেই লগতে কয়, “তেওঁলোকে অভিযোগ কৰিছে যে ককৰোচ জনতা পাৰ্টীয়ে বিদেশৰ পৰা ধন লাভ কৰিছে অথবা এই আন্দোলন বিদেশৰ পৰা পৰিচালিত হৈছে। যদি সঁচাকৈয়ে তেনে হৈছে, তেন্তে ই অমিত শ্বাহৰ দৰে এজন গৃহমন্ত্ৰীৰ ব্যৰ্থতাৰেই পৰিচয় দিয়ে।”
কেন্দ্ৰীয় তদন্ত সংস্থাসমূহৰ কথা উল্লেখ কৰি দীপকেই অভিযোগ কৰে যে-এই সংস্থাসমূহক ৰাজনৈতিক স্বাৰ্থত ব্যৱহাৰ কৰা হৈছে। তেওঁ কয়, “ন্যায়পালিকাৰ ওপৰতো এতিয়া প্ৰশ্ন উত্থাপিত হৈছে। আমি সকলোৱে দেখিছোঁ যে ED আৰু CBIক শিৱসেনা আৰু NCPৰ দৰে ৰাজনৈতিক দল ভাঙিবলৈ ব্যৱহাৰ কৰা হৈছিল। দেশৰ ডাঙৰ প্ৰতিষ্ঠানসমূহৰ দায়িত্ব আছিল গণতন্ত্ৰক জীয়াই ৰখা, এজন ব্যক্তিৰ একনায়কত্ববাদ প্ৰতিষ্ঠা কৰাত সহায় কৰা নহয়। কিন্তু সেয়া তেওঁলোকে হ’বলৈ দিলে। ইয়াক ৰোধ কৰিবলৈ কেৱল বিৰোধী দলেই নহয়, সাধাৰণ জনতাও একত্ৰিত হ’ব লাগিব।”
দীপকেই ধৰ্মেন্দ্ৰ প্ৰধানৰ পদত্যাগৰ পিছত প্ৰহ্লাদ যোশীক নতুন কেন্দ্ৰীয় শিক্ষামন্ত্ৰী হিচাপে নিযুক্তি দিয়াকো সমালোচনা কৰে। তেওঁ কয়, “যদি দেশৰ শিক্ষামন্ত্ৰীয়ে ধৰ্ষণকাৰীক প্ৰশংসা কৰে, তেন্তে ইয়াৰ অৰ্থ হ’ল ধৰ্মেন্দ্ৰ প্ৰধানক আঁতৰাই আন এজন অদ্ভুত ব্যক্তিক আনি বহুওৱা হৈছে। ইয়াৰ জৰিয়তে দেশবাসীক কি বাৰ্তা দিব বিচৰা হৈছে? তেওঁলোকৰ দলে গুণ্ডাৰে ভৰি আছে, সেয়েহে ইয়াতকৈ বেলেগ একো কৰিব নোৱাৰে। ৰাম ৰহিমৰ দৰে লোকসকলেও তেওঁলোকৰ শাসনকালত পেৰ’লত জেলৰ পৰা ওলাই আহে। “
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
