অসমৰ বানপীড়িত লোকসকলৰ সহায়ৰ নামত ছ’চিয়েল মিডিয়াৰ জৰিয়তে ধন সংগ্ৰহৰ অভিযোগক কেন্দ্ৰ কৰি অসম আৰক্ষীৰ অপৰাধ অনুসন্ধান বিভাগে ব্যাপক তদন্ত আৰম্ভ কৰিছে। তদন্তকাৰী সংস্থাই সন্দেহ প্ৰকাশ কৰিছে যে কিছুমান ব্যক্তি বা গোটে বান সাহায্যৰ নামত জনসাধাৰণৰ সহানুভূতিৰ সুযোগ লৈ অনলাইন জালিয়াতিৰে ধন সংগ্ৰহ কৰি আছে। অসম আৰক্ষীৰ সূত্ৰ অনুসৰি, বৰ্তমান চাইবাৰ চেলে তেনে প্ৰায় ৫০টা সন্দেহজনক ছ’চিয়েল মিডিয়া একাউণ্ট কটকটীয়াকৈ নিৰীক্ষণ কৰি আছে। এই একাউণ্টসমূহৰ জৰিয়তে বিভিন্ন UPI ID, QR Code আৰু অনলাইন পেমেণ্টৰ মাধ্যম প্ৰচাৰ কৰি বান সাহায্যৰ বাবে অনুদান বিচৰা হৈছিল বুলি অভিযোগ উত্থাপন হৈছে।
CIDৰ তদন্তকাৰী বিষয়াসকলে জনাইছে যে এই সন্দেহজনক একাউণ্টসমূহৰ সৈতে জড়িত সকলো বেংক লেনদেন আৰু ডিজিটেল পেমেণ্টৰ তথ্য তীক্ষ্ণতাৰে পৰীক্ষা কৰা হ’ব। কোনে কিমান ধন সংগ্ৰহ কৰিছে, সেই ধন প্ৰকৃততে বানপীড়িতসকলৰ সহায়ত ব্যৱহাৰ কৰা হৈছে নে ব্যক্তিগত স্বাৰ্থত অপব্যৱহাৰ কৰা হৈছে—এই সকলো দিশ তদন্তৰ আওতালৈ অনা হৈছে।
CID-এ স্পষ্ট কৰি দিছে যে বান সাহায্যৰ নামত সংগৃহীত জনসাধাৰণৰ ধনৰ অপব্যৱহাৰ বা আত্মসাৎ কৰাৰ প্ৰমাণ পোৱা গ’লে সংশ্লিষ্ট ব্যক্তি বা সংগঠনৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব। প্ৰয়োজনত তেনে সংশ্লিষ্ট লোকৰ বিৰুদ্ধে চাইবাৰ জালিয়াতি, প্ৰতাৰণা আৰু জনসাধাৰণক বিভ্ৰান্ত কৰাৰ দৰে অভিযোগত ফৌজদাৰী গোচৰো ৰুজু হ’ব পাৰে।
ইফালে, অসম আৰক্ষীয়ে সাধাৰণ ৰাইজক উদ্দেশ্যি বিশেষ সতৰ্কবাণী জাৰি কৰিছে। আৰক্ষীয়ে আহ্বান জনাইছে যে যিকোনো ব্যক্তি বা সংগঠনলৈ ধন প্ৰেৰণ কৰাৰ আগতে তেওঁলোকৰ পৰিচয়, বিশ্বাসযোগ্যতা আৰু বৈধতা নিশ্চিত কৰিব লাগে। বিশেষকৈ কেৱল ছ’চিয়েল মিডিয়াত ভাইৰেল হোৱা পোষ্ট, UPI ID বা QR Code দেখি ধন স্থানান্তৰ নকৰিবলৈ ৰাইজক অনুৰোধ জনোৱা হৈছে।
আৰক্ষীৰ মতে, বানৰ দৰে দুৰ্যোগৰ সময়ত বহু অসাধু চক্ৰই মানৱীয় সহানুভূতিক অস্ত্ৰ হিচাপে ব্যৱহাৰ কৰি প্ৰতাৰণাৰ অপচেষ্টা কৰে। সেয়ে কেৱল চৰকাৰীভাৱে অনুমোদিত সংস্থা, জিলা প্ৰশাসন, চৰকাৰী সাহায্য পুঁজিৰ লগতে সুপৰিচিত আৰু বিশ্বাসযোগ্য স্বেচ্ছাসেৱী সংগঠনৰ জৰিয়তেহে অনুদান আগবঢ়োৱাটো অধিক নিৰাপদ।
লগতে, যদি কোনো লোকে ছ’চিয়েল মিডিয়াত সন্দেহজনক ধন সংগ্ৰহ অভিযান, অচিনাকি UPI ID, QR Code বা ভুৱা সাহায্যৰ আবেদন দেখা পায়, তেন্তে তৎক্ষণাত অসম আৰক্ষী বা চাইবাৰ অপৰাধ শাখাক অৱগত কৰিবলৈও অনুৰোধ জনোৱা হৈছে। সময়মতে অভিযোগ দাখিল কৰিলে এনে জালিয়াতি ৰোধ কৰাৰ লগতে জনসাধাৰণৰ ধন সুৰক্ষিত ৰখাত সহায় হ’ব বুলি আৰক্ষীয়ে উল্লেখ কৰিছে।
দুৰ্যোগৰ সময়ত সহায়-সহযোগিতাৰ মানসিকতা সমাজৰ এক ইতিবাচক দিশ। কিন্তু সেই মানৱীয় অনুভূতিক পুঁজি কৰি যদি কোনো অসাধু চক্ৰই অবৈধভাৱে ধন সংগ্ৰহ কৰে, তেন্তে সেয়া কেৱল আইন ভংগ কৰাই নহয়, প্ৰকৃত বানপীড়িতসকলৰ অধিকাৰৰ প্ৰতিও এক গুৰুতৰ অন্যায়। সেইবাবে সকলো নাগৰিকক সচেতন হৈ দায়িত্বশীলভাৱে অনুদান আগবঢ়াবলৈ অসম আৰক্ষীয়ে পুনৰ আহ্বান জনাইছে।
এই প্ৰতিবেদনটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
