বলীউড তথা টিভিৰ প্ৰবীণ অভিনেত্ৰী সুস্মিতা মুখাৰ্জীয়ে নিজৰ ইনষ্টাগ্ৰাম একাউণ্টত জীৱনৰ এটা কঠিন সময়ৰ কথা মনত পেলাইছে। যেতিয়া অভিনেত্ৰীগৰাকী আৰু তেওঁৰ স্বামীয়ে আৰ্থিকভাৱে সংগ্ৰাম কৰি আছিল। এসময়ত ১ কোটি টকাতকৈও অধিক ঋণৰ বোজা তেওঁলোকৰ ওপৰত আছিল। সেই সময়ছোৱা তেওঁলোকৰ বাবে অতি কঠিন আছিল আৰু সুস্মিতা মুখাৰ্জীয়ে আৰ্থিক দীনতাৰ বাবে C গ্ৰেডৰ ছবিতো কাম কৰিবলগীয়া হৈছিল।
সুষ্মিতা মুখাৰ্জীয়ে নিজৰ কেৰিয়াৰত অজয় দেৱগানৰ “গোলমাল” আৰু শ্বাহৰুখ খানৰ “কিং আংকল”কে ধৰি বহুতো ডাঙৰ ডাঙৰ ছবিত কাম কৰিছে। অৱশ্যে ইয়াৰ মাজতে অভিনেত্ৰীগৰাকীয়ে C গ্ৰেডৰ কিছুমান ছবিতো আৰ্থিক দীনতা দূৰ কৰিবলৈ কাম কৰিবলগীয়া হৈছে। শেহতীয়াকৈ তেওঁ নিজৰ ইনষ্টাগ্ৰামত এটা ভিডিঅ’ শ্বেয়াৰ কৰিছিল, য’ত তেওঁ কয়, “কোনোবাই মোক সুধিছিল, ‘মেম, বেয়া ছবিত কিয় কাম কৰিছিল?’ মোৰ অতীতৰ জীৱনৰ কথা ভাবিলেই মই স্তম্ভিত হৈ পৰো, সেই সময়খিনি মোৰ কেৰিয়াৰৰ সবাটোকৈ বেয়া দিন আছিল।”
অভিনেত্ৰীগৰাকীয়ে আৰু কয়, “সেয়া প*ৰ্ণগ্ৰাফী নাছিল, কিন্তু C গ্ৰেডৰ ছবি আছিল। মানে একপ্ৰকাৰ ভাল চিনেমা নাছিল। সেই ছবিবোৰ কৰি আচলতে মই মোৰ আত্মাটোক বিক্ৰী কৰিলোঁ। কিন্তু সেয়া মোৰ জীৱনৰ সেই সময়খিনিৰ এটা বাধ্যবাধকতা আছিল।” সুষ্মিতা মুখাৰ্জীয়ে লগতে কয়, ‘যদি মই মোৰ জীৱনৰ কথা কওঁ, তেন্তে মোৰ স্বামী আৰু মোৰ প্ৰডাকচন কোম্পানীটো ২০০২ চনত দেউলীয়া হৈছিল। আমাৰ হাতত ১ কোটি টকাৰ ঋণ আছিল। সেই সময়ত প্ৰযুক্তিৰ নতুন যুগ আহিছিল আৰু আমি ইয়াৰ বিষয়ে একো নাজানিছিলো, গতিকে আমি দেউলীয়া হৈছিলো। লোন ৰিকোভাৰী এজেণ্টে আহি আমাক গালি-গালাজ কৰিছিল।গতিকে, সেই সময়ত মোৰ একমাত্ৰ চিন্তা আছিল প্ৰথমে ঋণ পৰিশোধ কৰা।”
সুষ্মিতা মুখাৰ্জীয়ে কয় যে সেই সময়ত তেওঁৰ আন কোনো উপায় নাছিল, যাৰ বাবে তেওঁক C গ্ৰেডৰ ছবিত কাম কৰিবলৈ বাধ্য কৰাইছিল। অৱশ্যে প্ৰায় চাৰি দশক ধৰি চলচ্চিত্ৰ জগতৰ অংশ হিচাপে কাম কৰি আহিছে তেওঁ। ১৯৮৭ চনত “য়েহ ৱহ মানজিল টোহ নেহি” ছবিৰ জৰিয়তে অভিনয় জীৱন আৰম্ভ কৰে অভিনেত্ৰীগৰাকীয়ে। সম্প্ৰতি তেওঁ ছবি আৰু ৱেব ছিৰিজৰ কামত ব্যস্ত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
