বলিউডৰ ‘ভাইজান’ অভিনেতা ছলমান খান আৰু তেওঁৰ ভগ্নী আলভিৰা খান অগ্নিহোত্ৰীক ‘বিং হিউমেন’ গহনা শ্ব’ৰুমৰ সৈতে জড়িত এক প্ৰতাৰণাৰ গোচৰত চণ্ডীগড়ৰ জিলা আদালতে চমন জাৰি কৰিছে। এই চমন ‘ষ্টাইল এণ্ড কণ্টেণ্ট জুৱেলাৰী প্ৰাইভেট লিমিটেড’ নামৰ প্ৰতিষ্ঠানটোৰ পৰিচালককো জাৰি কৰা হৈছে। আদালতে ৫ অক্টোবৰত সংশ্লিষ্টসকলক হাজিৰ হৈ অভিযোগসমূহৰ ওপৰত নিজৰ পক্ষ আৰু উত্তৰ দাখিল কৰিবলৈ নিৰ্দেশ দিছে। চণ্ডীগড়ৰ অৰুণ গুপ্তা নামৰ এজন ব্যৱসায়ীয়ে ২০২১ চনত দাখিল কৰিছিল এক গোচৰ। ছলমান খানৰ বিৰুদ্ধে এই চমন অভিযুক্ত হিচাপে নহয়, বৰং অভিযোগৰ প্ৰতি নিজৰ বক্তব্য আৰু স্পষ্টীকৰণ দাখিল কৰাৰ উদ্দেশ্যেহে জাৰি কৰা হৈছে।
ব্যৱসায়ী অৰুণ গুপ্তাই অভিযোগ কৰিছে যে কেইবছৰমান আগতে তেওঁ ‘বিগ বছ’ৰ ছেটত ছলমান খানক সাক্ষাৎ কৰিছিল। সেই সময়ত ছলমানে তেওঁক ‘বিং হিউমেন’ গহনাৰ শ্ব’ৰুম খুলিবলৈ উৎসাহিত কৰিছিল আৰু উদ্বোধনী অনুষ্ঠানত নিজে উপস্থিত থাকিব বুলি আশ্বাস দিছিল। এই আশ্বাসৰ ওপৰত বিশ্বাস ৰাখিয়েই তেওঁ আলভিৰা খানৰ ‘বিং হিউমেন জুৱেলাৰী’ ব্ৰেণ্ডৰ ফ্ৰেঞ্চাইজী গ্ৰহণ কৰে আৰু প্ৰায় ৩ কোটি টকা বিনিয়োগ কৰি এটা শ্ব’ৰুম মুকলি কৰে। অভিযোগ অনুসৰি, তেওঁ ‘বিং হিউমেন’ গহনাৰ বিপণনৰ অধিকাৰ থকা ‘ষ্টাইল এণ্ড কণ্টেণ্ট জুৱেলাৰী প্ৰাইভেট লিমিটেড’ৰ সৈতে চুক্তিবদ্ধ হৈছিল।
ব্যৱসায়ী অৰুণ গুপ্তাৰ দাবী অনুসৰি, কেৱল শ্ব’ৰুমটো সাজু কৰাতেই প্ৰায় ১ কোটি টকা ব্যয় হৈছিল। তেওঁ চুক্তিৰ সকলো চৰ্ত পালন কৰিছিল যদিও, শ্ব’ৰুম আৰম্ভ হোৱাৰ পিছত কোম্পানীয়ে প্ৰতিশ্ৰুতি অনুসৰি ব্যৱসায়িক সহায় আগবঢ়োৱা নাছিল। ইয়াৰ উপৰিও তেওঁ অভিযোগ কৰে যে, শ্ব’ৰুম মুকলি হোৱাৰ কিছুদিনৰ ভিতৰতে ‘বিং হিউমেন’ গহনা যোগান ধৰা ষ্ট’ৰ হঠাতে বন্ধ হৈ যায়। ২০২০ চনৰ ফেব্ৰুৱাৰীৰ পৰা যোগান ব্যৱস্থা ব্যাহত হোৱাৰ ফলত পণ্যৰ অভাৱ দেখা দিয়ে আৰু ব্যৱসায়ত ব্যাপক লোকচানৰ সন্মুখীন হ’বলগীয়া হয়।
আনহাতে ‘ষ্টাইল এণ্ড কণ্টেণ্ট জুৱেলাৰী প্ৰাইভেট লিমিটেড’-এ এই অভিযোগসমূহ আগতেই অস্বীকাৰ কৰিছে। কোম্পানীৰ দাবী অনুসৰি, ২০১৮ চনত হোৱা চুক্তিত ছলমান খানৰ কোনো প্ৰত্যক্ষ ভূমিকা নাছিল। কোম্পানীয়ে কয় যে, ২০১৫ চনত ‘বিং হিউমেন’ ফাউণ্ডেচনে ‘ষ্টাইল এণ্ড কণ্টেণ্ট জুৱেলাৰী প্ৰাইভেট লিমিটেড’ক ‘বিং হিউমেন’ ব্ৰেণ্ড ব্যৱহাৰৰ লাইচেঞ্চ প্ৰদান কৰিছিল। গহনাৰ উৎপাদন, বিপণন আৰু বিক্ৰীৰ সম্পূৰ্ণ দায়িত্ব কোম্পানীটোৰ ওপৰতেই আছিল। ইফালে অৰুণ গুপ্তাই অভিযোগ কৰিছে যে তেওঁক আকৰ্ষণীয় প্ৰতিশ্ৰুতিৰে বিনিয়োগ কৰিবলৈ প্ৰেৰণা দিয়া হৈছিল। তেওঁক কোৱা হৈছিল যে শ্ব’ৰুমৰ উদ্বোধনত ছলমান খান নিজে উপস্থিত থাকিব। কিন্তু শেষত ছলমানৰ সলনি তেওঁৰ ভগ্নীপতি আয়ুষ শৰ্মা অনুষ্ঠানত উপস্থিত হয়। অভিযোগকাৰীৰ মতে, এই সমগ্ৰ বিষয়টোৰ বিষয়ে ছলমান খান অৱগত আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
