আজিকালি একেবাৰে কম বয়সীয়া কিশোৰ-কিশোৰীয়েও সৰু সৰু কথা পাহৰি যোৱাৰ বহু অভিযোগ আহে। অহৰহ মানসিক চাপ, টোপনিৰ অভাৱ, ভাৰসাম্যহীন খাদ্য আৰু ডিজিটেল ডিভাইচৰ অত্যধিক ব্যৱহাৰে মগজুত প্ৰভাৱ পেলাব পাৰে। এই সমস্যাবোৰৰ পৰা হাত সাৰিবলৈ মানুহে বনৌষধিৰ ফালে আকৰ্ষিত হৈছে। ৰোজমেৰী এনেকুৱা এটা সুগন্ধি বনৌষধি, যাৰ বিষয়ে আয়ুস মন্ত্ৰালয়েও তথ্য ভাগ-বতৰা কৰিছে। বৈজ্ঞানিক অধ্যয়নত দেখা গৈছে যে ৰোজমেৰীৰ কিছুমান প্ৰাকৃতিক যৌগই মগজুৰ কোষক সুৰক্ষা দিয়াত সহায় কৰে।
ৰোজমেৰী এবিধ সুগন্ধি বনৌষধি যাক মছলা হিচাপে, বনৌষধি চাহত, পৰম্পৰাগত চিকিৎসাত ব্যৱহাৰ কৰা হয়। আয়ুস মন্ত্ৰালয়ৰ মতে, ই স্মৃতিশক্তি উন্নত কৰাত সহায়ক হয় ৷ ৰোজমেৰীত পোৱা প্ৰাকৃতিক এন্টিঅক্সিডেন্ট আৰু জৈৱ সক্ৰিয় যৌগসমূহে শৰীৰ আৰু মগজুক অক্সিডেটিভ চাপৰ পৰা ৰক্ষা কৰাত সহায় কৰে। সুস্থ জীৱনশৈলীৰ অংশ হিচাপে ইয়াক উপযোগী বুলি গণ্য কৰা হয়, কিন্তু কোনো গুৰুতৰ ৰোগৰ চিকিৎসাৰ বিকল্প হিচাপে নহয়।
NCBIৰ মতে, ৰোজমেৰী আৰু ইয়াৰ সক্ৰিয় উপাদানৰ গোন্ধে স্মৃতিশক্তি আৰু একাগ্ৰতাত ইতিবাচক প্ৰভাৱ পেলায়। অৱশ্যে বিশেষজ্ঞসকলে কয় যে এই বিষয়ত বৃহৎ ক্লিনিকেল ট্ৰায়েলৰ প্ৰয়োজন। গতিকে ইয়াক স্মৃতিশক্তি বৃদ্ধিৰ বাবে একেবাৰে নিৰাময়ক বুলি নাভাবি, বৰঞ্চ ইয়াক সহায়ক প্ৰাকৃতিক বিকল্প বুলি গণ্য কৰা উচিত।
NCBI আৰু অন্যান্য গৱেষণাৰ মতে ৰোজমেৰীত থকা কাৰ্ন’চিক এচিড, কাৰ্ন’ছল আৰু ৰছমাৰিনিক এচিডক শক্তিশালী এন্টিঅক্সিডেন্ট বুলি গণ্য কৰা হয়, যিবোৰ মগজু আৰু সামগ্ৰিক স্বাস্থ্য দুয়োটাৰে বাবে উপকাৰী।
কোষক ফ্ৰী ৰেডিকেলৰ পৰা ৰক্ষা কৰিব পাৰে। নিউৰনক অক্সিডেটিভ ক্ষতিৰ পৰা ৰক্ষা কৰিব পাৰে। শিক্ষণ আৰু স্মৃতিশক্তি প্ৰক্ৰিয়াত গুৰুত্বপূৰ্ণ স্নায়ুসংবহনকাৰী এচিটাইলক’লিনৰ মাত্ৰা বজাই ৰখাত সহায় কৰিব পাৰে। জীৱ-জন্তুৰ ওপৰত কৰা অধ্যয়নত কাৰ্নোচিক এচিডে স্নায়ু সুৰক্ষামূলক প্ৰভাৱ পেলোৱা দেখা গৈছে যদিও মানুহৰ ক্ষেত্ৰত অধিক গৱেষণাৰ প্ৰয়োজন। লগতে NCBIৰ মতে গেছ, বদহজমৰ দৰে ৰোগৰ বাবেও ৰোজমেৰী উপকাৰী। পৰম্পৰাগত চিকিৎসাত ইয়াক হজম শক্তি উন্নত কৰাৰ বাবে ব্যৱহাৰ কৰা হয়।
ৰোজমেৰীত ভিটামিন, পলিফিনল, এন্টিঅক্সিডেন্ট আদি প্ৰচুৰ পৰিমাণে থাকে। এইবোৰে শৰীৰৰ ৰোগ প্ৰতিৰোধ ক্ষমতা শক্তিশালী কৰাত সহায় কৰিব পাৰে। নিয়মীয়াকৈ সেৱন কৰিলে শৰীৰে সংক্ৰমণৰ বিৰুদ্ধে যুঁজিবলৈ ভালদৰে সক্ষম হ’ব পাৰে। যদিও ই কোনো ৰোগৰ নিৰাময়ক নহয়, তথাপিও ই সুস্থ জীৱনশৈলীৰ অংশ হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
